［少甜］同女神喺校長室扑嘢，點知畀我發現咗學校嘅秘密…: 第三章（上）

第三章（上）

「我知道，你哋一定會覺得好意外，唔知點解我孫家齊會突然想做學生會主席，因為，我平時連功課都唔做，一係走堂、一係瞓覺，呢個學校嘅事，好似完全唔關我事咁⋯⋯」聽到孫家齊嘅開場白，朱栢佳翻唒白眼，頂你唔跟稿讀都算，仲要自揭瘡疤話畀人知你有幾頹，明玩嘢啦而家？

「講真我真係唔care人哋點睇自己，總之我開心，喺我嘅世界裡面我鐘意點都得⋯⋯」家齊難得認真。

「但係，一個人嘅世界冇可能永遠都係得自己，喺呢度，就好似我半個屋企咁，我有我嘅兄弟，我嘅兄弟又會有佢哋嘅兄弟，我兄弟嘅兄弟又會有佢哋嘅兄弟⋯⋯」台下幾個細路以為家齊搞gag，於是捧場大笑。

家齊清一清喉嚨，繼續講：「⋯⋯到最後，我發現，原來成個藤英都同我有關係，我哋每一個人、每一個決定，都會影響呢個地方，如果有一啲嘢，我覺得好重要嘅話，憑我一個人嘅能力，係改變唔到啲乜嘢⋯⋯」台下嘅人屏息靜氣，開始思考家齊講嘅嘢。





「但係，我哋可以為咗呢個地方一齊努力，好嘅嘢，我哋要爭取繼續保持，唔好嘅嘢，由呢一刻開始，我哋可以試吓改變，喺我哋有限嘅時間裡面，喺呢個地方留低一啲屬於我哋嘅痕跡。」聽到呢度，校長嘅豆豉眼瞇得更埋，好似好唔滿意咁。

「我諗唔到有咩理由，你哋唔投票畀我，所以⋯⋯我唔晒時間拉票喇！」孫家齊霸氣轉身走落台，等到最後一刻終於忍唔住除呔除眼鏡。

台下嘅同學仔呆咗幾秒，之後紛紛企唒起身，爆發如雷嘅掌聲，冇諗過一向悶到嘔嘅學生會選舉，可以聽到似返個人嘅演講。

迪路見到全個禮堂嘅學生反應咁熱烈，表情尷尬咁望咗一望校長，校長嘅眼神好似想殺人咁，睥咗迪路一眼，就暗示佢唔好輕舉妄動。

估唔到，呢個唔顯眼嘅小動作，竟然會畀唐老師咁啱望到，忍唔住覺得奇怪：點解校長同迪路會眉來眼去？只係區區一個學生會選舉，喺藤英裡面一向唔算係咩大事，點解校長會咁緊張？





結果不出所料，係由孫家齊高票當選，好大程度上，係因為佢嘅演講，感動咗唔少同學仔，而投票畀佢嘅人當中，亦都不乏一啲人，根本聽唔明家齊講乜（又甚至係瞓著咗），只係見到名單上面有孫家齊個名，好驚佢選唔中就會發爛渣，於是都好「乖」咁投佢一票。

「超，早知啲人咁驚你，我哋就唔使搞咁多嘢，直接揼你上台就算啦！」朱栢佳半開玩笑咁講，其實心裡面，都好以孫家齊為傲，平時兩個人成日互串，但係朱打從心底裡，唔覺得孫好似人哋講咁衝動，相反，佢覺得呢個兄弟，事實係一個有勇有謀有膊頭嘅職安真漢子。

「大哥！我真係恭喜你呀！終於都做到何生會會長喇！」吳正講到眼濕濕。

孫家齊就打唒冷震：「妖唔好咁肉麻啦，而家先啱啱開始炸，我哋之後仲有好多嘢要做，佢哋最錯就係睇唔起我哋，當我哋玩玩吓唔係認真想做學生會，我哋係時候要畀佢哋見識吓，佢哋口中所謂嘅『壞學生』，可以做到幾多野！」

「好！」三個人充滿鬥志，開始籌組屬於佢哋嘅學生會內閣。