［少甜］同女神喺校長室扑嘢，點知畀我發現咗學校嘅秘密…: 第二章（上）

第二章（上）

唐老師好疑惑咁望住眼前三隻馬騮，完全諗唔明，點解放咗學成粒鐘，孫家齊同朱栢佳都仲未走，平時叫佢哋補課都唔肯，唔通放完個暑假返真係咁掛住佢？

諗到呢度，唐老師忍唔住心裡面笑鳩自己白痴⋯⋯

「喂，講啦。」朱撞咗一撞孫嘅膊頭，特登拱佢企前啲。

「屌！撞咩啫？點講呀？」孫家齊竟然有少少面紅？





「大哥⋯⋯禾求下你啦～禾唔爽再上嗰啲洗腦班喇，為咗其他同學，你邦下手啦！」吳正好誠懇咁望住孫家齊，好似就算天大嘅事情發生，只要孫肯出手，就一定有救咁。

「妖！求撚其啦，喂！我想做學生會呀！」孫家齊雖然語氣依然囂張，但係就正眼都唔敢望住唐老師。

唐老師當堂成個呆咗：「⋯⋯你話咩話？」

「屌你係咪唔識聽廣東話呀？」孫家齊惱羞成怒，「我話我要做學生會呀！」

「你飲大咗？」唐老師無法置信，「定係玩遊戲輸咗有咩大懲罰？」





「無人同你玩呀！我認真㗎！」孫睇落就嚟打人咁嘅樣。

「係呀⋯⋯唐老師⋯⋯禾哋想跟大哥一齊選學生會，你邦下禾哋啦⋯⋯」吳正楚楚可憐嘅樣，令到本來要開片嘅兩個人都冷靜咗少少。

「唔知你有冇發現，今年新學期有好多新老師。」朱栢佳未知唐是敵是友，只係講咗兩句，想試探吓佢嘅反應。

「係呀，有一批老師要退休吖嘛，咁辦學團體嗰邊咪推薦咗一啲新老師過嚟囉⋯⋯」唐老師皺起眉頭，「做咩提起呢件事？同學生會有咩關係？」唐老師都係聰明人，隱約感覺到，孫家齊決定參加學生會嘅原因一定唔簡單。

朱栢佳好似審犯咁，皺眉睥住唐老師好耐，然後先講出個原因：「我哋收到風，今年學校要摺唒所有學會，唔俾我哋玩任何課外活動，仲要上思想教育堂，我哋唔想上。」朱懷疑背後仲有更大嘅陰謀，不過呢一刻，佢亦唔想毫無保留咁同唐講，慎防老師出賣佢哋。





「⋯⋯嗯，呢個我都有聽聞，我都唔係咁贊成，雖然讀書係好，不過都應該有多啲活動發展嘅。」唐老師認同咁點點頭，跟住又即刻擰頭，「咪住先，你哋做學生會就係想阻止呢件事？憑你哋三個？」

「而家有咩問題呀？」孫最憎俾人睇唔起。

「唔怕得罪講句，吳正都好啲，你兩個出名係問題學生，全校都怕咗你哋，仲點敢俾你做學生會會長呀？唔驚你反轉間學校呀？」

「我屌⋯⋯」孫家齊正想問候唐老師嘅祖宗十八代，就俾朱栢佳阻止咗：「所以咪要你幫手囉，我哋要做學生會，一定要有個擔保人。」

唐老師冷笑一聲：「我點解要幫你哋？」

吳正急到就嚟喊出嚟：「唐老師呀⋯⋯」

「除非～」唐老師露出狡詐嘅笑容，「由今日開始，你哋三個每日都準時返學，唔再走堂，每次測驗都要合格，仲有，返學唔準gel頭，跟足校規著好套校服，咁我就考慮吓啦。」

孫同朱你眼望我眼，心諗呢個唐老師實在欺人太甚，點知就喺呢個時候，吳正軍訓式敬咗個禮，然後大聲應：「明白！禾哋一定會努力㗎！」





「喂！」兩個人阻都阻唔切。

「好！」唐老師好滿意咁笑，「一言為定。」