［少甜］同女神喺校長室扑嘢，點知畀我發現咗學校嘅秘密…: 第一章（下）

第一章（下）

兩個人都係出名嘅曳學生，平時根本唔會去教員室呢種地方，本來都預咗嚟到會俾啲老師眼睥睥，點知一路行過嚟，見親嘅都係唔識嘅老師，而每遇到一個新老師，朱就感受到孫更加戒備，成個人都充滿殺氣，但係呢度人多口雜，朱決定陣間再問清楚孫究竟咩事。

本來兩個人想直接行去唐sir個位搵吳正，點知經過校長室，朱栢佳突然伸手示意叫停，拉埋孫縮喺簿架後面，孫家齊一早知道朱栢佳聽力過人，一定係有問題，於是好有默契咁拉埋側邊嘅窗簾遮好，等朱栢佳可以放心偷聽。

「⋯⋯明白！知道了領導！我們會盡力的，給我們一年的時間，我們肯定會給您看到您想要的結果。」朱栢佳從來未聽過校長用普通話講嘢，原來，佢嘅普通話相當標準。

跟住校長掛咗電話，腳步聲越嚟越近，好似想推門出嚟，朱栢佳就即刻拉埋孫家齊細聲跑走，直奔班主任唐sir個位，果然見到吳正喺度整理一啲文件，而唐sir本人就唔知去咗邊。





「大哥！禮返咗嚟呀？」吳正幾年前先喺鄉下落嚟，講嘢仲有啲鄉音，黑黑實實咁，矇豬眼又戴副超厚眼鏡，個口因為下頷骨突出，好似成日都合唔埋咁。之前個個都蝦佢，當佢工人咁使，而佢都冇乜所謂，尤其崇拜孫家齊，於是跟出跟入，終於有一次喺孫同人打架之後，咁啱救返孫一命，從此就成為鐵三角之一。

「唐sir又點你做嘢？」孫家齊好唔滿意咁問。

「唔係典禾做嘢嘅⋯⋯唐老師真係好忙呀⋯⋯咁禾咪幫手執下啲文件囉⋯⋯」見到孫咁嬲，吳正都有啲緊張。

「等陣，呢份咩嚟㗎？」朱栢佳見到吳正手上一份英文文件有啲奇怪，即刻攞咗過嚟睇，孫家齊同吳正嘅英文大概只有小三程度，唯有等朱栢佳睇完先講。

「喂！點呀？究竟講咩？」孫家齊終於唔耐煩。





「份文件話⋯⋯今年嘅學校將會解散所有學會，將活動時間改為思想教育課⋯⋯」朱栢佳皺唒眉頭。

「思想教育課？咩嚟㗎？」孫家齊完全聽唔明。

「⋯⋯禾知道，以前喺老家，禾哋人人都要學㗎⋯⋯」吳正個樣好驚，好似諗返起一啲好差嘅回憶咁。

「頂！點諗嘢都有得學嘅咩？我係咁諗就係咁諗㗎啦，多鬼餘！」孫反唒白眼。

「⋯⋯我聽過，佢哋會好煩膠咁洗你腦，到時你諗咩做咩就唔到你話事㗎喇。」朱好認真咁講。





「唔怪之得，我頭先經過走廊，見到咁多新老師，全部都好古怪，雙眼無神好似俾人落咗降頭咁，梗係新董事派嚟搞事！佢當全校係傻仔呀？坐喺度聽佢講耶穌，最多咪走堂！」孫家齊完全覺得佢哋係白痴。

「⋯⋯大哥，禾⋯⋯」

「你估個個都好似你咁咩，話走就走，大把同學俾老豆老母管住㗎，一唔返學即刻冇零用錢㗎喇，仲有阿正呢啲乖仔呢？唔返學分分鐘激死佢屋企人啦！」朱栢佳拍拍吳正膊頭，表示理解。

「咁點呀？冇理由眼白白睇住佢哋咁搞間學校㗎？」孫家齊已經開始燥底。

「有一個辦法⋯⋯」朱栢佳靈機一觸，孫吳即刻雙眼發光，「所有學會都歸學生會管理，而學生會係唯一一個學生組織，可以直接同校董會對話⋯⋯」

「⋯⋯我哋想阻止佢哋解散學會同埋搞思想教育，唯一嘅辦法就係做學生會。」朱栢佳意味深長咁望住孫家齊。

「我？選學生會會長？你搞笑呀？」