［少甜］同女神喺校長室扑嘢，點知畀我發現咗學校嘅秘密…: 第一章（上）

第一章（上）

藤英中學出名多壞學生，據聞當中有唔少都同出面嘅黑社會有啲關係，當中最難搞嗰個，叫做孫家齊，幾乎所有出名嘅曳學生，喺學校都要叫佢一聲「大哥」。

但係偏偏就係呢個孫家齊，完全冇任何黑社會背景，之所以咁有江湖地位，純粹係因為太好揪。

傳說中呢一區好幾個社團聽過孫家齊嘅大名，都帶齊人馬去兇佢，想夾硬踢佢入會，第二日個個都口腫面腫咁樣，問起發生咩事都冇人敢講，於是大家開始流傳，孫家齊好揪到以一敵百，有「藤英百人斬」嘅稱號。

九月一號開學日，下晝兩點半，孫家齊大模廝樣咁由藤英正門走入學校，1米75嘅瘦削身形，雖然唔高，但係深綠色嘅雙眼就好凌厲，有種不怒而威嘅感覺，天生嘅淺啡色頭髮剪得好短，短到梳完都好似冇梳過咁，加上少少寒背，腳步輕飄飄咁，睇落好似猴王一樣。





保安梁叔眼尾睄到孫家齊嘅身影，即刻扮睇唔到，低頭專心扮睇嘢，心諗：痴線！死𡃁仔遲到仲要咁串喺正門入，好心你喺後門自己擒入嚟啦，我唔理你又畀人話我失職，截你又唔夠你揪，而家明玩阿叔啫！

「喂梁叔！你份馬經調轉咗嚟睇喎，因住買錯咗賭輸馬喎！」孫家齊特登行去更亭前面大聲問，梁叔俾佢激到生蝦咁跳，成塊面紅到好似就嚟爆血管咁，而孫就毫無顧忌，繼續邊行邊笑。

孫家齊返到班房，咁啱放緊小息，本來吵吵鬧鬧成個街市咁，所有人一見到佢，即刻企唒起身，好齊咁嗌咗聲「大哥！」

孫家齊揮揮手，示意大家可以坐返低，於是班房又繼續嘈喧巴閉。孫快步行去班房嘅角落，一腳踢落張枱度，「喂老朱！返咗嚟喇！」

本來趴喺枱上面瞓覺嘅人，俾孫家齊踢醒之後，一啲都唔嬲，伸咗個懶腰之後，喺褲袋攞咗一塊鏡出嚟，摷咗幾下頭髮，但係佢本來就gel到個頭好硬，其實啲頭髮本身就冇因為佢瞓覺而亂咗。





「老朱」其實叫做朱栢佳，不過人人都叫佢叫二哥，大家都知道，佢同另一個孫嘅兄弟，係藤英鐵三角。朱栢佳比孫高少少，啱啱到180，皮膚青靚白淨，桃花眼好似無時無刻都放緊電咁，嘴唇又薄又紅，係典型嘅花心靚仔樣，吸引一大班女fans。

聽講朱栢佳屋企有啲錢又醒目，本來係讀名校出身，但係因為同時溝咗兩條女，其中一條個老母就係校董，俾條女嘅老母發現佢搞完個女仲要一腳踏兩船，嘈咗幾次之後因為畀面朱老豆，先至轉校了事。

啱啱轉校嘅時候，佢同孫家齊勢成水火，但係突然有一日，佢哋兩個一齊曠課，返嚟之後就突然變成兄弟。大家都知道孫家齊揪得，加埋IQ 180朱栢佳嘅頭腦，更加係如虎添翼，完全冇人敢惹佢哋。

「返嚟嘅時候有冇發現學校有咩唔同？」朱栢佳一邊同孫講嘢，一邊繼續照鏡，摷完個頭又開始掃自己嘅眼眉毛，就算只係對住條仔都依然不改自戀嘅風格。

孫家齊立即收起吊兒郎當嘅笑容，面色凝重咁答：「每個樓梯轉角都裝唒閉路電視，學校後門多咗個黑色貨櫃，有門冇窗，平時最廢嗰個訓導張sir都唔見咗，我頭先喺正門入嚟都冇人攔我。」





「張sir俾人調咗去第二間學校，」朱放低塊鏡，罕有地皺唒眉頭，「今日返嚟覺得所有嘢都好唔妥，但係又講唔出有咩咁唔妥，聽我老豆個friend講，學校今年俾第二個辦學團體接咗，之前搞開金融，從來未做過教育，唔知做乜突然想做學校。」

孫家齊雖然成日遲到早退，但係本身都幾鐘意呢度咁頹嘅校風，加上有成班手足喺學校，自然會關心呢間學校嘅去向，聽到朱栢佳講起新學年嘅改變，佢都忍唔住沉思猜測。

「阿正呢？」孫家齊突然醒起，唔見咗鐵三角之一嘅吳正。

「阿正俾唐sir捉咗去幫手呀，你知佢幾乖仔㗎啦，任勞任怨，不過今次好似特別麻煩咁，搞咁耐都未返。」諗起老實嘅吳正，朱栢佳都有啲勞氣，嬲啲老師成日搵佢笨。

孫家齊越諗越唔對路：「去教員室搵搵阿正。」