若你信了我的大話 我就能聽見你的真話: 31. 我以為(下)
糾結了數星期，在一晚Ron打電話給她的時候，她終於忍不住決定和Ron講分手。只是當她說出口後，卻又發現自己原來並不像想像中那樣灑脫，她馬上就有後悔的感覺，繼而淚留不止，然後她知道原來自己還是很愛他，但同時間Ron對她提出分手後的反應卻又讓她無比失望…
「Ron，我有D野想同你講…不如我地…分手啦…我覺得我地衣家似朋友多過男女朋友…」當說分手的時候，Icy突然鼻一酸，一種後悔的感覺油然而生，然後眼淚便開始不爭氣起地流下來。
只是Icy一直喊，對方都沒出過一句聲。
「喂?...」過了兩分鐘Icy終於忍不住邊喊便喂了一聲。
「Sorry… 太突然我完全無諗過，所以唔知點比反應… 不過你唔好喊啦，聽到你喊我都好心痛…」
可惜聽到這一句，Icy只是喊得更加大聲。
「其實我只係想要一個錫自己嘅男朋友，但你真係太忙喇…」Icy邊喊邊說。
「我都知可能係我唔好，太忙無咩比時間你，其實我都有諗過做埋衣兩個月就辭職轉工，等自己可以多返D時間陪你同屋企人…」
「真係? 如果你唔係衣份工，我地關係應該會好D…」聽到Ron的想法，Icy心裏閃過一絲歡喜。
「我係有諗過，不過都仲未決定… 不如我地冷靜下，遲D先再傾再決定?」
「好…」因為分手後一分鐘便有後悔聲音，所以Icy亦同意了延遲決定。
之後二人又像沒事一樣，Ron間中會多了關心一下Icy，有時又會share一些有趣的youtube影片給她，然後晚上大家繼續會談一輪電話。
「今日真係好累，我連野都無乜點食過… 跟住我先發現原來近衣幾個月我輕左十幾磅…」兩日後的一晚，Ron message Icy。
「你本身已經好瘦… 其實如果你唔返衣份工，多D時間陪我，我地可以返返以前咁架…」因這幾天Ron多了關心自己，所以Icy有點感動亦想嘗試開一扇門給Ron。
Ron:「返返以前即係點呀?」
Icy:「即係大前晚講嘅野，我可以當無講過…」
Ron:「當無講過就最好啦，到年尾我再睇下點啦…」
可惜Ron的對答很快讓Icy再次跌人谷底，她沒想過自己給對方的一個機會，對方的回答竟然會是這樣。
Icy:「哦…」
「其實我衣兩日我都好唔開心，然後令我諗返起以前我都曾經係咁唔開心，好彩果陣有你我先可以再開心返… 以前我地都真係好開心呀…」之後Ron又說。
可惜當Icy嘗試回想以前的片段，卻發現自己原來不開心的時間是遠比開心多…
結果她一直等，都等不到Ron說任何想挽留自己和愛自己的說話…
之後她們雖然仍繼續保持每晚通話，但Icy的感覺都只是失望和失望…
而另一方面，她雖然看得出Ted知自己和男朋友分手後對方是有點高興，只是對方卻一直沒說出甚麼能讓他們關係再進一步的說話。而她自己其實亦對對方有點猶豫，因為她並不確定對方是不是真的對自己認真，於是二人便成為了現在像SP的關係。
這時我不禁想問，如果世界只剩下兩個男人，一個是不懂愛你但專一，一個是懂愛你能讓你開心但會花心出軌，你會怎樣選擇?
不過一方面我同情Ron帽已戴，但另一方面我又覺得到底是Ron真的完全不明白女人心，還是其實他真的並不太愛Icy? 從他還懂得找我求救，我相信他是真心想挽救這段關係。但從Icy的回憶中，他的對答和表現卻確實難以讓人感受到這一點。事後，我決定找Ron出來和他詳談一番。
「其實你同你女朋友平時相處係點?」
「無呀，你知我份工都忙，好多時我地都係夜晚傾陣電話… 就算放假，好多時都想自己一個靜靜地休息下，所以平時拍拖時間都真係唔多…」他自己說著說著都有點不好意思。
「咁你覺得Icy對於咁嘅相處模式會唔會滿意?」所謂授人以魚不如授人以漁，我決定嘗試用自已一貫的誘導反問方式希望Ron能自己思考多一點。
「應該唔滿意啦，唔係都唔會講分手…」
「咁我想問自從佢講分手後，你做左D咩改變去令佢覺得你真係想改善大家嘅關係?」
「我多左message佢同關心佢，同埋我都有同佢講過下遲D有機會會轉工…」Ron想了一回後答道。
「你係Promise佢會轉工定係純粹講有衣個可能性?」聽後我針對性地追問。
「有衣個可能性… 我都係講要年尾再睇下點…」
「所以你覺得對方會因為你衣句連承諾都唔算嘅說話而留低?」雖然有點憤怒，但我還是盡力保持冷靜。
「唔係…」
「相反，你咁講比人更加覺得你係唔重視佢… 調返轉問你，自從佢提出分手後，你有無直接講過類似想挽留佢，你愛佢嘅說話?」
「無呀… 但我都主動搵同關心佢多左呀， 我覺得佢會get到我嘅取態…」
「Ron，女人其實係一樣可以好簡單又可以好複雜嘅動物，視乎你點對佢。就拎你衣個例子黎講，Icy同你講分手，但又唔決絕仲聽你講延遲個決定，其實代表佢都有猶豫，對你仲有感情唔係真係完全想分開。但事實上佢又真係知道有D野佢頂唔順接受唔到，所以佢覺得好唔開心想放棄。你諗返佢同你講過D咩，到底衣家佢對你最不滿嘅到底係咩? 又或者其實你有無真係有去關心過佢到底係不滿D咩?」我開始忍不住連珠炮發。
「um…從佢口中，佢有講過覺得我地似朋友多過情侶，同埋有講過我份工太忙無時間陪佢…」Ron有點不好意思地答道。
我:「佢有無講過佢想要d咩?」
Ron:「佢想要個錫佢嘅男朋友…」
我:「咁你覺得自己之前做唔做到?」
Ron:「做唔到…」
我:「衣幾日呢?」
Ron:「都做唔到…」
「咁你應該知個問題係邊啦? 知唔知點解佢覺得你地似朋友多過情侶? 因為你根本無表示過你係愛佢。 你份工忙，無時間陪佢，平時淨係夜晚先同佢傾電話，好間中先出下街，你自問咁似拍拖咩? 到到佢講分手喇，你又有無表現得你好緊張?
唔好比我睇死你，你連問佢原因，嘗試去深入了解個問題都無，所有野都係佢主動同你講… 你有無講你好唔想分手好想佢繼續係你身邊? 有無話比佢聽你好愛佢? 好多野你要講出口佢先知架… 而且你又唔係等錢駛，真係想留佢，點解連應承佢會轉工多D時間陪佢都做唔出?
女人其實好易氹，佢地好多時都係想聽你講出口同埋想要一D承諾。我知你唔想口輕輕隨便落承諾，不過你不如都諗清楚自己真係有幾鍾意佢，可以為佢做到咩地步，然後講同做比佢睇啦… 坦白講就咁聽你講，其實我都感受唔到你真係有幾重視佢， 除左你仲識搵我問我拎意見外…」我終於把自己所有不滿一次過向Ron說了出來。
「我以為一齊左咁耐大家都會有個默契知大家點諗，唔駛咩都講出口…」Ron還嘗試為自己解釋。
「咁我衣家話你知事實係你一直都唔了解佢而佢咁多年其實都只係一直遷就緊你。男人的思考方式同女人係好唔同，所以唔好再用你嘅角度去代入Icy。唔好嫌麻煩，唔好嫌肉麻，直接D講多D你嘅真實感受比佢聽。不論佢本身feel唔feel到，佢都會想聽你親自說出口。
而且有時兩個人一齊最棹忌就係”我以為”三個字，因為”我以為”所以好多野都唔講出口，結果越黎越少溝通同去了解，惡性循環下更加多”我以為”會出現，但原來事實從來都唔係咁，到到最後先發現已經太遲…
另外如果你問我，我會話你為佢所做嘅野根本遠遠唔夠佢所需要嘅囉… 你真係想挽救，係要做多好多好多野先得。」
「我會好好諗下… 所以搵你真係無錯，係我識嘅朋友當中，真係無一個及得上你咁了解女人…」
其實我之所以這樣生氣，除了因為Ron的爛泥扶唔上柄，最主要是看見這樣的他便想起了以前的自己。曾經，我一樣都是粗線條，完全不懂女人，不解溫柔。但為甚麼在Ron眼中的我卻又完全不是這樣一回事? 一切都要回到我大學Year 1時繼續說起。