若你信了我的大話 我就能聽見你的真話: 30. 我以為(上)
「Kenny，我可唔可以問你一D意見?」有日我一個大學hallmate Ron突然message我。
「嘩，Ron哥，好耐無見，咩事呀?」
「我女朋友前幾日突然係電話同我講分手…」
「我記得你地一齊左都好耐架喇喎… 佢有無講咩原因?」印象中Ron跟他女朋友一齊應該至少也有六七年時間。
「佢話覺得我地似朋友多過男女朋友…」
「七年之癢? 咁你想唔想留住佢?」
「想呀… 其實聽到佢講分手，我係呆左完全無諗過，個腦好似hang左機咁比唔到反應… 不過佢講講下就自己係咁喊，最後仲調返轉變左我安慰返佢轉頭… 我覺得佢唔係真係對我無晒感覺架， 之後我地都贊成話等大家冷靜D遲D先再傾… 衣幾日我地好似無事咁都會傾電話，我得閒又會專登send下message比佢同佢傾下計…」
「但衣D都係好基本嘅野，應該解決唔到你地最主要個問題架喎…」為了幫他我直接潑了他冷水。
「因為我份工好忙，我其實都有同佢講我有諗過過埋衣兩個月會辭工，等自己可以多D時間陪佢同屋企人，佢聽到都好似有D感動…」Ron又補充道。
「咁聽落都幾好呀，唔係無機會救返喎。」這聽落感覺好好多。
「但唔知點解，我總係覺得佢有時仲係會突然唔開心，唔想再同我一齊， 我覺得我地嘅距離好似慢慢變得越黎越遠咁，所以先想問你意見… 你知你有幾了解女人架啦，當年食女無數，個個都唔知幾羨慕你…」
「都係以前嘅事啦… 而且你霎時間咁問我又唔太識佢，好難比意見你喎… 有無機會我可以了解下佢?」了解女人也不等於可以憑空去解讀一個自己完全不認識的女人。
「咁又有D難…我約佢出黎突然又叫埋你好似有D怪?」
「或者你可以比下佢IG, FB, Twitter果D我先，咁至少等我可以大概了解下佢平時D生活習慣。」我提出了折衷的方法。
「衣個無問題，我轉頭比你。」
「同埋我衷心建議你約佢出黎面對面傾清楚，唔好咩都經電話或者message，始終有D感覺面對面先係最真實…」
「好… 我會諗下架喇…」
之後Ron把女朋友Icy的社交媒體給了我。可幸除了FB外，其他都是公開帳戶，對我來說最重要的是要知道Icy的樣貌。Icy的IG就像一般港女一樣都是以食物，風景和獨照居多，而我留意到的一點是她的IG好像從沒有Ron的身影，就正如Ron的FB和IG都不曾有Icy的身影一樣，不然我亦不用特意要拿她的社交媒體在此查探了。這讓我對他們的問題，有了多一點的揣測。
過了數天，Ron聽從我的指示約了Icy出來，而我側把握機會希望能再他們碰頭前和Icy碰過頭。跟據我對Ron的認識，他是例遲到的人，所以我一早便出現在他們約定地點的附近，希望能襯早截著Icy留下前設，而一切都在我預料之中，約定時間還沒到Icy已出現在我視線範圍裏。
「咦，Icy?」我扮作偶遇和Icy打招呼。
「你係…」而她當然不認識我。
「我係阿Ken呀，你小學同學呢~」
「小學同學? 但我讀女校架喎…」
剎那間，我再一次為我的思慮不周感到懊悔，因自己一直都讀男女校，所以我竟下意識忽略了對方有是讀女校的可能性…
「呀… 咁我可能記錯… 但你係叫Icy?」見慣風浪的我只好執生發揮自己的急才。
「係呀，所以你應該真係識我?」幸好她亦沒有立刻落閘。
「咁可能係我記錯左細個唔知幾時識你?」避免再度出錯我只好拋下問題讓Icy幫手思考。
「莫非係補習班? 你叫咩名呀?」幸好Icy果然自己給出了一個可能性。
「我係Vincent呀，周啟仁，有無印象?」
「周啟仁? 真係無喎… 可能年紀大記性開始差… 所以你咁都仲記得我又認到我都真係好叻呀~」Icy甜甜一笑。
「我對靚女嘅記性一向比較好嘅~」看見這笑容又讓我潛意式展現出我的本性。
「有個咁口花花嘅朋友我應該記得架喎… 好啦，我約左男朋友，有機會再傾啦。」她的臉立刻變得有點紅，然後婉轉地告訴我她有男朋友。
「好呀，我本身都係諗住自己黎食D野，唔阻你喇~」說完我便先一步走入餐廳。
過了大概十分鐘左右，Ron終於亦到達，不過他並沒發現我的存在。
而在閒聊了一段時間後，Ron終於入正題。不過據我觀察，這十多分鐘在他們身上確實感受不到任何戀人之間應有的火花和氣場，彷彿只是兩個普通朋友在一起午餐。
「Icy，其實你仲鍾唔鍾意我? 點解我地會變成咁? 我地仲有無得救?」他一口氣問出了三個問題。
當一個又一個影像和感受出現在我腦海中，我既為Ron感到難過，但同時間又覺得他是有點咎由自取。
Ron和Icy一起，其實某程度上是建基於Ron那時剛剛和前任分手，然後在認識了Icy後Icy一直陪伴著他讓他從傷痛中很快走回出來。二人一起後的初段亦曾經過著十分開心甜密的日子。
可惜自從Ron轉了現在的工作後變得十分忙碌，而二人的關係亦漸漸變得疏離。Ron一般每晚都會打給Icy，但其餘一整天的時間基本上連普通message的溝通也欠奉，而二人可能一至兩星期才會有一次見面的時間。有時Ron雖然放假有時間，但很多時他都會選擇自己me time。 慢慢Icy覺得二人根本不像情侶，甚至她根本感覺不到Ron是愛和著緊自己。
然後在一個無聊寂寞的夜晚，她下載了一個交友app，希望找人陪自己說下話… 很快，數位男性都找上了她，而當中有一位，她覺得和他特別投緣…
這位自稱叫Ted的男性很快便向Icy剖白，告訴她自己以前是一個賤男，很易喜歡人又經常出軌，只是近來玩夠開始想安定下來希望尋找一個長遠的對像。而他除了和Icy談得來外，他平常很多的舉動都肯貼心，例如每朝會和她說早晨，然後定時會向她匯報自己整天的行踪和活動，不時又會關心Icy問她吃飽了沒有，工作辛不辛苦，有沒有不開心等等。這些本應是Ron該做卻從沒出現過的舉動全都讓Icy感到久違了的被愛感覺,…
而在大家認識了兩星期多後，Icy終於敵不過寂寞和好奇，答應了和Ted出來見第一次面。可是不見還好，一見Icy便更加覺得淪陷。Ted除了高大更長著一副彭于晏的外貌，正正是Icy喜歡的那類型，結果在第二次出街，他們便發生了關係… 而Ted在性這方面的能力和技術更昰遠遠勝過Ron因而讓Icy感受到前所未有的快樂和滿足… 所以緃使她知道對方很可能只是一個玩家，但她還是不能自控地沉船了，亦因而開始生出了和Ron分手的念頭…