若你信了我的大話 我就能聽見你的真話: 27. FWB (上)
在處理Brandon和Wing的關係時，因初初在app等待Wing的出現時會無聊，所以間中我也有和其他玩家傾偈解悶。事實上也許香港真的太多寂寞的人，和她們談天當中也確實聽了不少有趣的故事，其中一個是關於FWB- Friends with Benefit。
其實起初我並不知道這故事的女主角的名字，直至故事中段我才知道她叫Sandy。在一個等待Wing出現的無聊夜晚，因看見一個標題說想找人傾偈，於是我便嘗試點了她，而她亦很快接受了我的邀請。
「係咪有咩煩惱呀? 可以講我聽?」我主動提問。
「可以呀。」
「咁我洗耳恭聽~」
「其實好簡單，幾個字講完，沉左FWB。」
坦白說，起初我並不知道甚麼是FWB，幸好GOOGLE大神很快告訴了我答案。
何謂FWB? 最簡單理解應該便是會上床的朋友?兩個會有性行為的朋友同時又不會對對方有任何責任和承諾，大家繼續過大家各自的生活。
「咁點解唔一齊呀? 佢有女朋友?」我好奇問道。
「無呀，大家都單身嘅，不過我知佢唔會鍾意我啦… 應該話佢唔會夠鍾意我到肯同我一齊。」
「點解咁肯定?」我更加不明白。
「要一齊就一早一齊左啦…」
「你地係點識?」
「我同佢係大學同學，一直大家都係好朋友關係， 直至有次同佢係hall嘅酒局大家都飲醉左然後就咩左… 之後唔知點解就變左衣種關係喇…」
「咁你地之後都無傾過衣個問題?」
「無呀… 其實初初我無諗過會有第二次， 大家都扮無野發生過… 但有次咁岩d人走晒房入面又係得返我地兩個，然後佢就突然主動走過黎攬住我同錫我，我又果刻無特別想推開，慢慢就變左衣種關係… 之後我見佢無主動講咩我又覺得自己handle到，就默默接受左…」
「但衣家你沉左喎… 你甘心唔試下由佢咁?」
「我驚要求太多連衣家嘅關係都無埋呀…」
「其實如果佢唔肯同你一齊，但又想keep住衣家個關係，你唔會覺得佢只係為左同你搞野?」我直接問道。
「嗯… 我覺得佢唔係為左同我搞野，反而更多係心靈上嘅安慰。其實我地唔係成日搞架，反而係就咁攬住傾計多…」
「如果係咁就更加無理由唔可以係埋一齊啦…」搞得又傾得，但不想在一起，這怎樣聽也是難以解釋，除非真的只是純玩樂性質。
「唔知呀…但我感受到佢唔想…. 同埋佢有問過我，如果第日大家是但一個有另一半，可唔可以繼續維持衣家嘅關係。」
「佢就梗係想啦~ 咁你點答呀? 唔係答會掛…」我有點著緊問道。
「我好firm咁答佢唔會，將心比己我都唔會想自己男朋友背後有個FWB。」幸好她沒有答會。
「其實我覺得如果你想有突破，都要同佢玩下心計先得。例如暗示下佢聽你有其他人approach，或者自己都主動接觸下其他人。始終人都係犯賤，有時真係失去先識珍惜。至於你都要真係試下搵其他人，分散下自己注意力，等自己無咁著緊同被動。你有無聽過若要對方著緊，你首先要唔著緊呀?」也許是因為慣了接受委託，不知不覺失我竟真的認真幫她想起辦法來。
「我其實都有試過搵呀，不過感覺都唔太岩，有D又超chur…」
「介唔介意講下你幾大同埋外表其實大概係點?」
「27，我唔會話自己好靚，正常啦，身型唔肥唔瘦咁囉。」
「咁應該都夠好多人埋你身架喎…」
「哈，其實我知之前見親我果D男仔之後都會想食我…」
「咁你唔憂啦，一於一路搵其他一路試下吊你個FWB癮…. 可能有意外收穫!」
「其實… 我主要苦惱緊嘅唔係衣樣，而係懷疑佢近排有左女朋友…」
「點解咁講?」
「只可以話係女人嘅直覺… 佢近排對我有D唔同左，有時又見佢會同同一個人text… 有次我地攪完野，佢電話響我又見佢即刻拎左個電話入廁所…」
「咁你唔直接問佢?」
「我有扮晒野chok佢，扮無野咁問佢係咪女朋友呀，佢話痴線，同事咋，工事黎，咁囉。」Sandy加了一個無奈的表情在最後。
「不過做得FWB，你就預左有衣一日，亦都無權過問啦… 所以一係將佢變做你男朋友，一係就調節好自己心態只係當佢係單純FWB唔好再沉，不過不幸地你已經動左情，所以要做到後者好難喇…」
「唉… 我都唔知。一方面我好想知佢係咪真係有，但一方面我又好驚知道左原來真係有後要同佢完。」
「我都明嘅… 不過逃避都唔係辦法，你要明白就算今次唔係，遲早有日都會係…」我繼續理智分析著。
「我知嘅… 好啦，我要訓喇，再傾…」
這就是我和Sandy的對話，之後其實我們都沒有再傾談，直至大半個月後的一晚我因無聊再次進入了這個app，然後發現了Sandy半星期前的留言。
「我忍唔住喇，無論有定無，我都希望可以有個解脫…」
「你肯定?」我覆了一句。
不過Sandy隔了一會都沒有回應，我想她應該不在線上。於是我便留了自己工作的電話號碼給她。
「如果你真係好想知答案，衣個人會幫到你。」
數天後，我真的收到Sandy的委託。她說的故事跟之前沒太大出入，只是多了點細節，但又少了點感情抒發。而她的目的是想知道對方是不是有女朋友。
對方的名字叫阿Fred，工作是醫院的一名行政文員，這變相讓我不太容易接觸到他。不過知他在那間醫院工作，要和他有個偶遇還是不太困難的，只需在他放工必經的地點徘徊和等待。
Fred不算英俊，但卻有接近一米九的身高。正當我正打算接近他的時候，一個人的出現卻讓我直接知道了Sandy問題的答案。因為一名女子突然出現走到他身旁，然後二人很快便十指緊扣離開了。
不過雖然已經有答案，但一場來到，單是這個資訊好像略嫌乏味，於是我便決定繼續本身的計劃為將來留下一條尾巴。
「Fred?」我走到Fred身後叫道。
「Sorry…你係?」他回身看見我後帶著不解問道。
「我係Sandy朋友Victor呀，你唔記得喇? 有次我地飲過酒架呢。」我故意提起Sandy。
「哦… 好似有D印象… Victor呀嘛，我記得喇!」明顯地他並不是真的有印象，因為Victor這人根本不存在，只是他不好意思說不記得罷了。但當我提起Sandy這名字，可以看得見他臉上出現了點不自然，然後帶點心虛地很快望了一望身邊的女朋友，不過他女朋友似乎並沒為意。
「咦，恭喜你有新女朋友喎~ 搵日再出黎飲過啦~」我湊緊他耳邊以一個微弱的聲線說道。
「哈哈，多謝，好呀…」他尷尬地笑著回應，然後我們便分別了。
晚上我找了Sandy。
「其實如果佢真係有女朋友，咁你會點?」
「我估至少我會終止衣段關係，但我都唔肯定同佢仲可唔可以繼續做朋友…」
「咁我要嘅報酬好簡單，唔好比自己變第三者，同埋唔好比機會自己受傷，你要相信自己都可以有段美好嘅愛情。」
「好…多謝你。」