執到叮噹 殺死大雄: 18. 誤傷

18. 誤傷

我懷住忐忑不安嘅心情打開房門，果然，出現係眼前嘅正正就係大雄，呢個大雄當然唔係青山嗰個，估計係叮噹教大雄點樣過嚟搵我。

大雄係我間房來回踱步，見到我先停低落嚟。

「你過嚟係想做咩？」我對呢個大雄毫無好感，招呼都唔打，劈頭第一句就問佢來意。

「點樣？百寶袋拎到未？」大雄一臉焦急走近問我。





「仲未喎。」我敷衍式咁回答。

點知大雄聽完，竟然激動咁揪住我衣領，大叫：「點搞啊！都過咗咁多日！」

我一手拍開大雄：「你咁激動做咩？我仲急過你啊！」

「叮噹佢就快唔得啦！如果叮噹死咗，到時個假大雄就用到百寶袋！咁成件事就會好亂！」大雄又再捉住我雙肩，不斷係到搖晃我。

「下...點解會咁？」我講完後立即就明白，原本叮噹已經俾假大雄打傷，之後仲俾我補多兩炮，會出事其實都係遲早嘅事。





「點解！咪就係你搞出嚟㗎囉！」大雄講完一拳打落我塊面到。本身我都對於叮噹感到十分內疚，但依家，就俾大雄嘅呢一拳打走咗。

「所有嘢都係你搞出嚟先真！唔係你！邊得嚟咁多事！」我都不甘示弱，邊講邊掄起拳頭還返大雄一嘢。

大雄後退幾步，伸手摸向佢嘅心口。我一見就知大雄想點，論拳頭交，我自信係唔會輸俾大雄，但俾佢拎到枝空氣炮出嚟就難講了。

於是乎我即刻衝上前阻止，大雄堪堪拎咗枝空氣炮出嚟，都未揸穩，佢成個人就已經俾我撲倒在地，枝空氣炮跌落一旁。

如是者，我地係地上扭打纏鬥，伴隨住打鬥聲越嚟越大，終於都驚動咗係出面嘅啊媽。





「搞咩啊你地！」啊媽氣沖沖咁打開房門。見我地打得激烈，啊媽馬上走上前，想分開我地。

突然“砰”的一聲，啊媽應聲倒地，心口鮮血長流。

我同大雄都呆咗，停止毆鬥，我率先企起身，只見躺係地上嘅大雄手上拎住枝空氣炮，睇怕係混亂中俾佢執到，然後失手打中咗啊媽。

我見啊媽訓係地上，郁都唔郁， 心中大感不安，戰戰兢兢咁蹲係啊媽旁邊，輕輕叫咗聲：「啊...啊媽？」

啊媽毫無反應，我顫抖住手指探一探啊媽脈搏－－－已經無咗生命跡像。

「你個仆街！」悲憤之下，我無視大雄手上嘅空氣炮，紅住眼衝上前就對住大雄一通亂打。

「對唔住！我唔係有心架！」大雄一邊格擋，一邊連聲道歉。我唔聽唔理，手腳並用，一心只想當場就打死大雄。

忽然大雄高聲咁叫：「等...等等！仲有百寶袋，有百寶袋就可以救返你媽媽！」





大雄一言驚醒夢中人，我摸摸收埋係褲袋嘅百寶袋，心諗：「無錯，我仲有百寶袋！我要快啲搵叮噹，佢生又好死又好，一定要佢幫我拎法寶出嚟救返啊媽！」

大雄渾身傷痕咁慢慢爬起身，然後講：「我地快啲去搵嗰個複制人，今次點都要迫佢交出百寶袋。」

我冷眼望住大雄講：「點解，你地明明係一個餅印印出嚟嘅人，但，點解你可以咁令人討厭？」

「你，你想講啲咩？」大雄俾我望到有啲慌。

我將啊媽抱起，然後安放好係張牀到，低聲講咗句：「啊媽等我。」

然後我先冷冰冰對大雄講：「好，我地依家就出發，去搵嗰個大雄，好好解決咁耐以嚟發生嘅事。」

第三次入青山，呢一次，我真正知道點樣完滿解決所有事。