執到叮噹 殺死大雄: 17. 百寶袋

17. 百寶袋

大雄聽到我講話會幫到佢，隻眼霎時間都亮咗起嚟，但亦都好快咁變返暗淡。

大雄搖搖頭，嘆口氣講：「對唔住，我都好想相信你，但都已經過咗咁多日...你明明拎咗我枝空氣炮，又知道叮噹係邊...」

我指指自己身上仲未痊癒嘅傷口，對大雄講：「你睇下我身上啲傷。」

大雄表示疑惑。





我接住講：「我仲用空氣炮打咗叮噹佢兩炮，可惜最後俾佢用時光機走甩咗。」

我係基於事實之下，講咗我追殺叮噹嘅過程，但我就隱瞞咗之後發生嘅事，我話俾大雄知，我追到時光機入口就唔敢入去。

我之所以有所隱瞞，第一，成件事講起上嚟有啲複雜麻煩。第二，設身處地，如果我係複制人，我會唔會想知道呢一個事實呢？我仲未諗清楚我應唔應該如實相告，或者係之後，但我依家仲未想講住。

大雄靜靜聽完後，吸咗一口氣講：「竟然發生過啲咁嘅事，好...好多謝你，原來你背後為我做咗咁多嘢，明明呢啲應該係由我自己嚟做。」

然後“砰”的一聲，只見大雄一拳打落張牀到，好嬲咁講：「又係時光機！」





「今次我打算入去時光機入面搵叮噹，但去之前我想同你借樣嘢。」我坐係房入面唯一嘅一張凳上講。

坐係牀上嘅大雄講：「係嘜嘢？」

「百寶袋。」我答。

大雄沉默不語，過咗唔知幾耐，終於講咗聲「好。」然後大雄就揭開佢件衫，露出肚皮，只見百寶袋，俾佢用膠紙痴住係自己肚到。

我心諗：「利害，原來收埋咗係到。」大雄將百寶袋撕落嚟，遞俾我。





我伸手接過，講：「多謝你信我。」

大雄又係搖搖頭，坦誠咁講：「我諗完之後，只係覺得我仲留住百寶袋係幫唔到成件事，倒不如交俾你，博下。咳，另外，你可唔可以講俾我知你打算點做？」

我打算點做？其實我嘅打算好簡單，就係帶住百寶袋去搵叮噹，要求佢地用道具複制多個靜香，俾大雄同靜香係我呢邊世界生活。

感覺呢個方案，叮噹同真大雄都可以接受，因為已經完全唔會影響到佢地。

再者，如果佢地唔接受，其實我已經打算帶定武器，到時當場反面，要脅叮噹開返百寶袋嘅使用權，有法寶就做咩都得。反正叮噹已重傷，靜香係女仔，得個無用嘅真大雄，只要睇準機會，感覺我十拿九穩。

當我諗住咁答嘅時候，望住大雄嘅我，突然為之口窒。我忽然發覺呢一切都係我一廂情願嘅諗法。我知道有兩個大雄嘅立場下，呢個似乎係最好嘅解決方法。

但係假大雄並唔知道！佢想要嘅或者唔係安穩咁係呢邊同靜香生活。佢可能想知點解叮噹要咁對佢，佢可能想回復返當初愉快生活嘅日子。

但呢一切都同真大雄對立咗。





對於我嘅默然，大雄講：「唔緊要，總之反正我都無辦法，只能相信你了。」

大雄以為我唔想講，但其實係我已經唔知點答佢。我當初自以為幫到大雄嘅自信，已經消磨咗一大半。

「係呢，點解你會被搬咗嚟呢到？啲職員話你病得嚴重咗。」我嘗試叉開頭先嘅話題。

「你可能唔知，其實叮噹有個後備百寶袋，佢借咗俾叮嚀，叮嚀隨時都會還返俾叮噹。我唔知點解叮噹想殺我，但只要佢有返百寶袋，我估我隨時都會無命，一諗到咁樣，再加上有時掛住靜香，我精神狀態的確變得好差，好差...所以，就被安排咗嚟呢到。」大雄揉一揉自己憔悴嘅臉頰講。

我點點頭講：「嗯，我要盡快去搵叮噹先得，唔可以拖。」我當然無透露我一早已經知道有後備百寶袋呢一回事。

於是我地長話短說，最後我帶住到手嘅百寶袋，結束咗呢次青山嘅行程。

「到底可以點做？」





回家路上，我腦海不斷出現呢六隻字。唔通我要講個真相俾假大雄知，等佢可以接受我嘅方案，安心留係到生活？

唔理點都好，當務之急都係先搵叮噹開返個百寶袋嘅使用權限，有百寶袋先有主導權。

我打開屋企大門，原本打算一入到屋，拎把菜刀就去搵叮噹。點知一打開門，就見到啊媽係大廳到。

啊媽一見到我就講：「返嚟啦？你有個朋友嚟搵你，我招呼佢入咗你房到等。」

我疑惑咁講：「邊位？我有咩朋友會走到上門嚟搵我？」

「點知你識埋啲咩人！自稱大雄，又扮到成個大雄咁！好心你啦，識返啲正正經經嘅人啦！」啊媽又嬲但又唔敢太大聲咁講。

「係大...大雄！？」我心面不禁打咗個突。