執到叮噹 殺死大雄: 19. 重新出發

19. 重新出發

搭車路上，我問咗大雄一個問題：「拎返百寶袋之後，你希望係點？」

大雄答：「當然係叮噹靜香安好，一切回復以前！」

轉眼間，我同大雄已經出現係青山門口。為免引起混亂，我借咗頂帽同高領嘅褸俾大雄著。從外面睇，唔會認得出佢就係大雄。

我帶住大雄照樣嚟到青山醫院嘅接待處。





「又見王雄？你今日唔係嚟過啦咩？」女職員皺住眉問。

「唔好意思，我有啲好重要嘅嘢要唔記得同王雄講，可唔可以請你通融一下？」我鞠晒躬。

係我不斷哀求之下，女職員終於鬆口講：「嗱，唔到我話事㗎，要睇下今日帶你嘅嗰個人肯唔肯。」女職員講完就幫手撥打咗一通電話。

過咗陣，今日見過嘅嗰位男職員再一次出現，佢竟然表示歡迎我再次探望大雄。

原來，呢到預約嘅作用係睇下駛唔駛搵人監場。而呢位男職員係因為我今日嘅預約而過咗嚟，所以只要呢位男職員未走，係佢同意之下，就可以探到大雄。





估唔到一切嚟得咁簡單，本身我打算如果唔得就夾硬嚟，反正我有底氣，出咗事之後可以用百寶袋嘅法寶嚟挽救。

就快去到大雄間獨立病房時，我同男職員講：「唔好意思，我想去一去廁所先。」

由於嚟過一次，我知道同一層嘅呢到有廁所，所以並唔需要男職員帶路。係我意料之中，人生路不熟嘅大雄當然會跟埋我一齊去。

過咗一陣，我由廁所走出，搵返原地等候嘅男職員。

「咦，你朋友呢？」





「哦，佢肚痾，唔駛等佢住，我地先去見王雄。」

如是者，我再次進入獨立病房見大雄。男職員好好人，佢表示會係走廊出面留意「我朋友」，如果佢出嚟，會帶佢入嚟搵我地。

我單獨入去搵大雄，今次我決定一五一十講晒俾大雄知。包括佢係複制人嘅真相，同我接下嚟嘅決定。事情有啲難以置信同複雜，我同大雄傾咗好耐，直至傳嚟敲門聲。

「陳生，你駛唔駛去搵下你朋友，佢好耐都未出嚟。」男職員打開門，探頭向我講。

「好！等我一陣，我依家就嚟。」

等男職員關上門，我轉頭凝重對大雄講：「點樣，你決定好未？」

大雄終於點點頭。

我知道大雄一定會答應，因為佢地本質上係同一個人。係一個自私嘅人。





「好！咁出發。」

***********************************

我同戴住帽，著高領嘅大雄步出青山醫院門口。

「你講過，你想叮噹靜香安好，一切回復以前，你就快可以實現到。」

「我...我唔係好記得我講過，但我的確係咁諗。總之...多謝你！」

我笑了笑。

************************************





我同大雄，帶住百寶袋，穿過時光機，終於再一次嚟到叮噹靜香面前。

大雄一見到靜香，已經雙眼通紅，如果唔係我暗中拉住佢，佢好可能已經衝上去攬實靜香。

「大雄，你無嘢啊ma？」靜香關心咁問。

「無，我無事。我地拎到百寶袋啦！我地醫返叮噹先！」大雄馬上克制自己，冷靜落嚟。

我行近躺係地上嘅叮噹，只見佢雖然精神委靡，但總算未去到下一刻會一命嗚呼。不過，就算死咗，好似都無咩影響...最緊要嘅係，可以用到百寶袋。

於是，隨時會死機嘅叮噹將百寶袋解鎖，然後係佢協助之下，我地搵到一個可以起死回生嘅「身體復原噴霧」，係叮噹身上噴兩噴，轉眼間，叮噹已經回復正常，識行識走。

「陳強，多謝你！」叮噹一邊活動筋骨，一邊對我講。

我搖搖頭表示唔駛，然後講：「如果要多謝我嘅，請你借呢枝噴霧俾我救我啊媽，然後請你地俾嗰個大雄安靜咁係嗰邊生活，唔好騷擾佢。」





叮噹大雄靜香，都一致同意咗我嘅要求。滿懷心事嘅我，無意係到多作逗留。

最後大雄陪我帶住噴霧返去，返到屋企我馬上將噴霧噴係啊媽身上，見到啊媽奇跡咁有返生命跡像，臉色開始紅潤，我終於鬆咗一口氣。

未等到啊媽完全醒返，我將噴霧還俾大雄，並送佢到時光機入口處道別。

「好多謝你，陳強。」

「再見啦，唔係，唔好再見啦，叫叮噹關咗呢到個時光機入口，我地一切回復正常啦！」

望住大雄離去後，我深深嘆咗一口氣。本身幫到人係一件值得高興嘅事，但我完全高興唔到。因為我知道，我嘅所作所為或者稱不上係幫人，甚至係害咗某啲人。

「一切都回復正常。」





講就簡單，但真相係，已經變唔返從前咁樣。對於青山嘅大雄，有叮噹靜香相伴嘅大雄，甚至係我自己都一樣，都一樣已經返唔到從前。