執到叮噹 殺死大雄: 16. 再入青山

16. 再入青山

我帶住疲憊不堪嘅身體，終於返到屋企。望住開始入夜嘅天色，睇嚟呢邊同嗰邊嘅世界，時間上無咩差異，唔會話一返到嚟，就已經過咗幾年咁樣。

返到屋企，少不免係要同老媽子交代幾句，包括嗰隻識行識走嘅機械貓，同埋出現係我面上嘅傷痕。

好彩我平時曳開，又鐘意做啲古靈精怪嘅事，隨便作啲嘢出嚟，啊媽就無再理我，只係拋低咗一句：“唔好再搞搞震啦下！廳有枝藥酒，你一陣自己拎嚟用！”

入到自己間房後，我摸一摸塊面，望住手腳因捆綁而勒出嘅傷痕，心入面不禁詛咒咗大雄幾句：“正柒頭！”





鬧完呢個大雄，自然就諗起嗰個大雄。我駕輕就熟咁再一次預約探望身處青山嘅大雄。

時光飛快，五日後，我再一次出現係青山醫院嘅大門外。有咗上一次經驗之後，今次我直接走到接待處查詢。

講明來意後，接待小姐叫我稍等，然後過咗陣，就有另一個男職員過嚟，由佢帶我去見大雄。

對於呢個咁特別嘅安排，我提出咗疑問。

“哦......咁係因為王雄佢最近病情開始惡化，所以佢無得再去活動室啦，佢暫時要留係獨立病房到。”男職員邊行邊講。





“惡化咗？點解會咁嘅？”

“咁你又唔駛擔心，對於呢啲病人嚟講，病情嘅反覆都係好平常嘅事。你多啲嚟探佢，同佢傾下計啦，對佢有幫助架。”

我心諗：“大雄搞咩？搞到要入獨立病房？佢唔係已經學識扮嘢啦咩？”

係同職員閒談之間，我地終於嚟到目的地，一間房仔前面。職員講：“你地慢慢傾，有咩事嗌我，我就係出面。”然後就打開門俾我入去。

“呯”一聲，我入到去之後，房門就俾職員順手關上咗。





呢到與其話係獨立病房，倒不如話係獨立囚室。四周環境甚為簡陋，一眼望晒，感覺只係比監倉好少少。

我同坐係病牀嘅大雄打了個照面，只見大雄嗰樣真係憔悴咗好多。

原本毫無生氣嘅大雄一見到我，眼神立即稍為恢復咗一啲光采，佢激動咁走落牀，講：“你終於嚟搵我啦...我等咗你好耐。叮噹...叮噹佢...”

上次同大雄分別時，我同大雄明示過，我會幫佢殺咗叮噹佢，所以大雄雖然欲言又止，我都知佢想講咩。

我行近大雄，搖搖頭講：“對唔住，我仲未殺到叮噹。”

“哦...嗯，百寶袋仲未拎到法寶出嚟，我就應該知道叮噹無事，只不過忍唔住...對唔住，要你做呢種事。”大雄重重咁坐返落張牀到。

我心諗：“大雄咁講，姐係百寶袋係佢身上，估唔到咁重要嘅情報咁就得到咗。”

知道咗百寶袋係大雄身邊，我呢幾日諗嘅嘢，似乎係可行嘅！





“大雄，你放心，我講過會幫你，並唔係隨便亂講，呢幾日我已經諗到個方法，絕對可以幫到你，只要你肯聽我講！”我真摯咁對大雄講。