執到叮噹 殺死大雄: 15. 到底幫邊個

15. 到底幫邊個

大雄係地下爬起身，當佢企返起身嘅時候，佢手上已經多咗一枝空氣炮。

“你條友！搞到叮噹咁樣，依家仲要打我？嚟丫！你郁一郁，我就一嘢打爆你個頭！”大雄舉起空氣炮，對住我咆哮。

睇怕呢枝空氣炮就係由我身上搶走嘅嗰枝，見識過空氣炮威力嘅我，一時間真係連半步都唔敢郁。

“大雄，唔好啊。”又係靜香擋係中間做和事佬。





“大家冷靜啲，大雄你都放低枝空氣炮先，成件事的確係我地做得唔好。陳強佢唔係壞人，不如...我地一齊諗下點解決呢件事仲好？”斷咗左手左腳嘅叮噹，只能坐係地上講。

“係啊！咁你講丫！我地可以點做！”大雄揮舞住佢雙手講，我真係好怕佢隨時擦鎗走火。

我強忍住怒氣：“我都唔知可以點，點解你地會搞成咁？明明當初有百寶袋係身，一定會有啱用嘅法寶，可以無咁柒咁解決到呢件事。”

大雄剛剛回應咗一聲“你！”之後，就俾叮噹截住咗佢。

叮噹點點頭講：“係，你講得好啱，有百寶袋就會有大把解決方法。唉，原本我仲有個後備百寶袋，最衰俾叮鈴拎咗去唔知做咩...如果唔係都唔駛好似依家咁愁。”





我沉思左一陣後講：”總之，依家最緊要嘅就係，係嗰個所謂假大雄身上攞返嗰百寶袋返嚟用，有咗百寶袋就萬事大吉，連叮噹嘅傷都可以醫到。咳，雖然嗰個大雄佢無講我知百寶袋係邊，但照計實係佢身上或身邊先係。”

“你同嗰個大雄好熟？你...可唔可以幫我地？”靜香誠懇咁望住我講。

“唔駛你講我都會，我份人唔鐘意半途而廢，既然我都叉咗隻腳入嚟，我都想件事有完滿嘅結果。所以...依家我郁得未呢？我可以返去搵百寶袋未呢？大雄。”

大雄知我串佢，嬲到漲紅晒塊面，又講唔出嘢咁。

呢個時候，又係靜香出嚟打完場。靜香行近我身邊，一路鞠躬一路講：“咁我地就等你好消息啦，唔該晒你啊，陳強先生。”





最後，我地互相講啲無營養嘅廢話後，我係叮噹嘅指點之下，再次利用時光機返去我自己原來嘅世界。

我一路行返屋企，一路思考，到底係咪真係會有完滿嘅解決方法呢？係真大雄嘅立場，佢似乎係想要假大雄消失。

或者，係我地得到百寶袋之後，可以搵到方法，令到假大雄唔駛好似假靜香咁“消失”得咁慘。甚至乎，可以回到過去，咁樣，假大雄就連出現都無出現過。

無錯，呢種可能就係真大雄想要嘅結果。但，呢啲結果，絕對唔係我想要嘅。我唔想一個有血有肉嘅人，就咁俾人抹殺咗存在。

真大雄可能覺得假大雄係假嘅，由於係假，所以不必認真對待。但對我嚟講，假大雄比真大雄更真更好。你話真大雄好衰咩？咁又唔係，但我就更鐘意“假”大雄咁解。

我想幫呢個大雄，我想佢可以好好咁生活落去。

我fing fing頭，清醒一下個人，心諗：“無論點都好，我要再去見一見大雄先！”