執到叮噹 殺死大雄: 12. 不再猶疑

呢幾日同叮噹一直出出入入，叮噹已經熟晒架步，識得禁𨋢搭𨋢，我追到出去，咁啱俾叮噹搭到班𨋢走咗。

心急如焚嘅我，終於落到樓下大堂，只見周圍嘅人都係到議論紛紛，睇怕佢地都係俾叮噹呢隻識行識走嘅機械貓嚇親。

明白到呢一點之後，要追踪叮噹嘅行踪就相當簡單，邊一到嘅途人神情唔自然，受驚或好奇等等，都透露住叮噹所經過嘅方向。

我一路追過去，叮噹所去嘅地方越嚟越偏僻，到後來已經無途人嘅表情可以俾我做指標。

由於跑得太快，我已經喘晒氣咁濟，呢一刻我開始有啲想放棄。我大口大口咁喘住氣，扶住牆壁咁慢慢轉入一條後巷，只見係後巷中間位置，叮噹赫然出現係我眼前！





叮噹對住牆壁，一副專心搜尋事物嘅模樣，左摸右摸，完全察覺唔到我嘅存在。

“叮噹！你同我企係到！”我舉起空氣炮，對準叮噹大喝。

叮噹聞言，停低手腳向我望過嚟。

“陳強...你想殺我？”叮噹木然咁問我。

“...”





我答唔出話嚟，俾叮噹咁樣當面一問，我心入面不禁猶疑：“我真係要開炮？真係要殺左叮噹佢？”

“點解...點解你要幫大雄，而唔幫我？”

叮噹嘅發問，堅定左我嘅決心。

我回想起大雄係我面前流露出嘅情感，佢嗰種傷心，嗰種悲憤，我到依家都仲記得清清楚楚，我唔信呢啲係做戲可以做到出嚟。

我望實叮噹，堅決咁講：“我睇人好準，我知道大雄佢無講大話呃我。”





叮噹搖搖頭：“我啲記憶慢慢返緊嚟，你俾啲時間我，但我可以肯定話你知，大雄佢一定係有問題！你要信我！”

“咁你話我知！你到底係咪殺左靜香！”我舉住空氣炮，向住叮噹步步進迫。

“靜香？我殺左靜香？”叮噹用力咁拍拍自己腦袋，接著神情略帶痛苦咁講：“嗯？我...我好似真係...殺死左靜香...點解？”

聽到呢到，既然叮噹自己都已經直認不諱，咁我心中僅存嘅嗰一絲猶疑，都可以拋去。

我唔想再糾纏落去，我對準叮噹，一炮就轟咗落去。

“嘭！”地下出現一個大洞。呢一炮打歪咗，打左咗落叮噹腳邊。

叮噹一個激靈咁跳起，突然大聲講：“我記得啦！我記得啦！個時光機入口，個入口！係呢到！”

只見叮噹衝到靠牆邊嘅一堆垃圾到，將所有垃圾掃走，牆壁露出一個深邃嘅黑洞。





唔駛問啊貴，呢個肯定就係叮噹一直搵緊嘅時光機入口，我再唔郁手，下一秒叮噹就會由呢到逃走。

“咪走啊！”

我邊叫邊立時連開兩炮，“嘭！嘭！”兩聲，兩炮都結結實實咁打咗落叮噹身上。

“啊！”叮噹發出一聲慘叫，佢不顧自己傷勢，奮力咁躍入黑洞之中。

望住逃離嘅叮噹，我大腦都未決定好，我身體已經擅自行動起嚟，我竟然跟住叮噹，一嘢就跳入黑洞入面！