執到叮噹 殺死大雄: 13. 靜香與大雄

13. 靜香與大雄

“叮噹！叮噹！”

“叮噹！你有無事啊！”

我耳邊不斷傳嚟一陣陣喚喊叮噹嘅聲音，將我由昏迷狀態喚醒過嚟。

我慢慢咁張開眼睛，略略望咗一下四周環境，根據我睇咗咁多集叮噹嘅經驗，呢到應該就係大雄間房。





除左我訓係地下之外，仲有一個人訓咗係地，正確啲講係一隻貓，機械貓，嗰個就係叮噹。叮噹身邊企左兩個人，一男一女。

我唔駛望佢地個樣，從衣著打扮，就可以知道佢地一定就係大雄同靜香。

當我想坐起身同佢地打個招呼時，我先發覺我手腳都已經俾人緊緊綁住左，全身都不得舒展，極度辛苦。

呢個時候，大雄都察覺到我醒咗。

“係咪你！係咪你用空氣炮打到叮噹變成咁樣嘅！”大雄激動咁叉住我條頸質問我。





躺係地下，手腳被綁嘅我完全反抗唔到，大雄異常用力，好似想殺左我咁。

企係旁邊嘅靜香見狀，邊拉住大雄邊講：“大雄啊，你冷靜啲先啦。”

俾靜香咁講完之後，大雄先捨得鬆開叉住我嘅雙手。

“咳！咳咳！”我咳咗幾聲，喘咗口氣，如果唔係靜香，我諗我應該死咗。

“傻咗啊大雄你！你係咪痴架！我明明咁幫你！你想殺咗我啊！”





我啱啱醒，個人仲暈暈地，都仲未知頭知路，就俾大雄咁樣對待，我不禁怒火中燒，破口就想大罵。

“你幫我？你幫我啲咩！你講！係咪你搞到叮噹變成咁！”大雄兇狠咁指住我。

我望向旁邊嘅叮噹，只見叮噹昏迷不醒，左手同左腳焦爛成一片，感覺已經同廢咗一樣。

呢個時候，我先醒起，我係為咗追殺叮噹，先會追到嚟呢到。

“係！係啊！明明係你話叮噹殺左靜香！我先會幫...幫你...我..我先...”我話講到一半，成個人都呆咗，把口雖然張開，但已完全不能夠再繼續講到任何嘢。

一時之間，我嚇到背脊都出晒冷汗，心入面即時跳出：

“靜香！點解靜香會生勾勾企係到！大雄呃我？！”

“唔係！大雄又點解會出現咗係到？呢到唔係應該係另一個世界嘅日本咩？大雄明明就係青山醫院先啱架！”





我呆若木雞，大腦已經停止運作，面前嘅呢一切，我完全不能理解。