執到叮噹 殺死大雄: 11. 反目

11. 反目

“我...我返嚟啦...你係到做咩？”我小心翼翼問坐係電腦椅上嘅叮噹。

“無，我見你平時用呢部嘢禁下禁下，我一個人無聊就用嚟睇下。”叮噹目光仍然停留係電腦螢幕上。

“咁你...用成點啊？你識用咩？”

“話晒我都係一個高科技嘅機械貓，呢啲嘢，我一陣就上手。好，俾返部嘢你。”叮噹由電腦椅跳落嚟，慢慢咁行開一二邊。





我個心跳得好快，希望叮噹唔好睇到啲唔應該睇嘅嘢，如果俾佢知道我知道大雄係邊，甚至見過大雄，但就唔話俾佢知，咁叮噹會點諗呢？

我走近電腦一望，真係驚邊樣嚟邊樣，電腦螢幕停留係google瀏灠器到，而此時嘅畫面，正正就係預約探望身處青山嘅大雄嘅畫面。

“大獲，穿煲。”我心入面即時跳出呢四個字。

“你係咪啱啱去見完大雄嚟？”叮噹黑起塊面咁講。

俾叮噹咁質問，身有屎嘅我，伸手往懷中嘅空氣炮摸上一摸，以求隨時應付突發嘅事情。





“er...我...”我實在係太淆底，語無倫次不特止，仲要手騰腳震，一個唔小心，竟然將空氣炮由心口裏面跌出嚟。

“噹。”的一聲，空氣炮重重咁跌落地下。

“係俾大雄搶走嘅空氣炮！”叮噹瞪大眼睛，大聲咁喝出嚟。然後，叮噹馬上用佢短小嘅雙腳向住空氣炮飛奔過嚟。

呆左一呆嘅我立即反應過嚟，係叮噹就快掂到枝空氣炮之際，我一下就將空氣炮抄起，緊緊咁捉實。

“你冷靜啲先...你誤會左啦...”我試圖解釋，但叮噹完全無理會我。





叮噹眼見搶唔到，雙腳並無停留，竟然奪門而出，走出房門。

呢個時候，我耳邊傳嚟老媽子“啊”的一聲，我追出去，只見老媽子啱啱打開門返歸，而叮噹就趁住呢個空檔，繞過老媽子，直接離開間屋。

事情變化得咁快我真係始料不及，我心入面有個聲音話俾我知，我唔可以就咁放走叮噹。叮噹知道我對佢隱瞞大雄嘅事情，再加上我仲拎住大雄嘅空氣炮，叮噹一定唔會再信任我，睇佢雞咁腳走就知。

一旦依家俾叮噹走甩左，睇怕我都好難可以再接近到佢。所以，我浪費左幾秒之後，立即邁開腳步，反正一早諗住幫大雄殺左叮噹佢，一於唔好諗咁多，就依家郁手！

我緊緊咁握住手上嘅空氣炮，風風火火咁追上去。