執到叮噹 殺死大雄: 10. 相信大雄

“咚咚咚！”一個鐘聲連響左十一下，四周嘅人一聽見鐘聲就自動自覺咁作出各種收拾，整理嘅動作，明顯呢個係休息時間已到嘅提示。

融入左呢到嘅大雄，好自然咁做出反應，佢企起身擦一擦眼角嘅眼淚，同我講：“我要講嘅係咁多，我覺得我唔會係到留太耐，到我出返嚟後，希望你可以話俾我知叮噹係邊，多謝你。”

我抆住已經準備想走嘅大雄，係佢側邊細聲講：“等等大雄，我信你，我可以幫你。”

老老實實，聽完大雄所講，我認為大雄比起叮噹更為可信。根據我睇左咁多集叮噹嘅經驗，大雄每當有事要用法寶，叮噹都好少話托手踭嘅。既然係咁，大雄根本就無誘因，為左法寶而去殺叮噹。

大雄聽到我話幫佢後，轉身直視住我，問：“你幫我？你點幫我？”





我拍一拍收埋係心口嘅果把空氣炮，一切盡在不言中－－－幫你殺叮噹。

“點解你要幫我？”大雄碌大隻眼。

我思考左一陣，答：“因為我想企係好人嘅嗰一邊。我信你，你係一個好人。”

呢個時候四周嘅人已經陸陸續續咁離開，班工作人員亦都開始望過嚟，再多嘢講，都只能留待下一次。

“我之後會再嚟搵你。”我對大雄講完後，轉身就離開活動室。





搭車加食埋嘢，返到屋企已經係點零鐘。係呢段時間，我不停諗緊叮噹同大雄呢單嘢。我發覺有一樣好重要嘅嘢無問到大雄，就係“衣家個百寶袋係邊到”？

我無問到。

假如百寶袋係大雄身上，我先會幫佢手隊冧叮噹。但如果百寶袋唔係大雄身上，例如係胖虎小夫到，咁我就唔可以輕舉妄動了。

我返到屋企，打開房門，我原本預期會坐係角甩頭扮公仔嘅叮噹，呢刻竟然坐係我張電腦椅上面，仲用緊我部電腦！

“你返嚟啦。”叮噹望都無望過嚟，淡淡咁講。