執到叮噹 殺死大雄: 7. 發呆的大雄

我急步前進，推開玻璃門後，旁邊就係一個接待處咁嘅地方，坐住一個身穿白色制服嘅中年女士。

“你好，我係嚟探一個叫大雄嘅人。”我望一望電話嗰時間，依家係十點半，仲係醫院嘅探望時間。

“大雄？哦...王雄。去三樓活動室可以搵到佢。”中年女士眼尾睄都唔睄下我，對住部電腦，滑鼠禁下禁下咁。

我聽從指示，轉眼就嚟到三樓嘅活動室。

稍為靠近，已經聽到陣陣嘅人聲。我行到去門口一望，入面有大約十幾個著住病人衫嘅病人，同埋三個身穿藍色職員制服嘅員工。





活動室都幾大下，差唔多成廿個人都仲係覺得好寬敞。班病人有啲係到睇電視，有啲坐係梳發睇雜誌，有啲捉棋。睇怕呢到係班病人休憩嘅地方。

估唔到佢地都幾自由下。

我係人群中掃一掃，好快就搵到大雄，大雄坐咗係角落頭係到發呆。

“先生有咩幫到你？”企係門口嘅職員問我。我指住大雄講：“我係佢朋友，我係嚟探佢。”職員點點頭就無再出聲。

雖然感覺奇怪，但我無理會佢，直接就走埋大雄身邊。





“喂，大雄，你好啊。”我伸手係大雄眼前一揚，試圖將大雄由發呆狀態拉返嚟。

大雄抬頭注視住我，過左陣，平靜咁講：“係你？”估唔到大雄仲認得我。

我拉張凳坐係大雄隔離，答：“係我，我特登嚟搵你。”

我同大雄位於活動室嘅角落頭，四周無人，只要唔大聲講嘢，都唔會俾人聽到嗰隻。但大雄仍然好警剔咁四周張望一下後，然後先問：“搵我？咩事？”

“我想問下關於你同叮噹嘅事。”我一講完就留意到大雄面色一變，但又好快咁回復平常。





大雄用好冷淡嘅聲綫講：“叮噹？我唔知你講咩。同埋，我叫做王雄。”

呢個時候，我先留意到，大雄心口有個名牌，寫住王雄兩隻字，而唔係我所認識嘅野比大野。屌，緊係啦，話自己係野比大雄，實俾人捉入青山。

...

大雄俾我嘅感覺同初初見佢好唔同，初初嘅佢，老實講，唔係知佢係大雄，我都會以為佢係有精神病。但依家，佢就好似一個普通人咁樣。

我念頭一轉，已經大約估到點解大雄會有咁嘅反應。我壓低聲音講：“大雄你唔駛咁樣，我知道你係大雄，你無精神病。”

大雄聽完後，仍然用半信半疑嘅目光望向我。於是我繼續講：“我見過叮噹，背脊俾你打左一嘢嘅叮噹。”

我講完後，由心口摸出空氣炮，偷偷俾大雄望一眼。呢一刻，大雄嘅表情終於發生變化。