執到叮噹 殺死大雄: 8. 叮噹必須死

大雄聽完後，瞳孔放大，靜默左片刻後講：“對唔住，我唔咁樣做嘅話，肯定俾佢地關去嚴重病房嗰到，你要見我都未必見到。”我up得出叮噹受傷位置，又俾埋空氣炮佢睇，大雄不得不放下佢嘅戒心講真話。

我望望四周，無錯，其他人都似係輕度嘅病患者，雖然談不上正常，但已經唔會令人覺得好癲。相比起一開始門口見到嘅嗰個，呢班人已經好好。

睇嚟，短短一星期，大雄已經識得點樣係精神病院到生存，大雄幾時變得咁聰明？

大雄道完歉後，黑起塊面繼續講：“係叮噹叫你嚟嘅？”

“唔係，唔係，雖然叮噹的確有托我搵你，但今日嚟見你，我無話到俾叮噹知。”我連忙搖頭否認。





“哦？點解？叮噹同你講左啲咩？。”一講起叮噹，大雄目光就逐漸變得兇狠。

我唔鐘意轉彎抹角講廢話，於是直接講：“叮噹話你想殺佢。”大雄聽完後眼望地下，並沒有否認，反而問：“叮噹佢係邊？”

大雄睇嚟真係同叮噹好大仇口，人都仲未可以走出青山，就想知道叮噹係邊。

為左緩和氣氛，我語速放緩咁講：“我唔會話你知，但一樣，我亦都唔會話俾叮噹知你係邊。我想知你地點解會變成咁樣？你地明明係好好嘅朋友，你地之間究竟發生左啲咩事？”

“叮噹點講？”大雄繼續眼望地下。





“叮噹話你為左個百寶袋而想殺佢。”

大雄笑左一聲，講：“我為左個百寶袋殺佢？哈哈。好笑。”

“唔係？”我問。

“你信？”大雄答。

“咁究竟點解你要殺叮噹？”





大雄沉默左片刻，抬起頭講：“哈...叮噹講得無錯，諗諗下，我的確係為左百寶袋而要殺佢。因為只有叮噹死左，我先可以用到裏面嘅法寶，咁先可以挽救返叮噹做嘅錯事，咁先可以...咁先可以救返靜香...所以，叮噹一定要死！”