執到叮噹 殺死大雄: 6. 去青山 探大雄

標題九個大字－－－大雄俾人捉左入青山！

我拿拿林禁入去睇，樓主自稱內容為內部人士爆料，入面話有個人扮大雄扮出禍，指大雄俾差佬塔左返差館之後，差佬見佢無身份証，講嘢又瘋瘋癲癲，最後決定將大雄移送去青山醫院治療。

美其名係治療，事實上就係唔想著手處理呢個望落好麻煩嘅人。可憐嘅大雄，就係咁樣俾人送咗去青山。

我話晒睇住大雄長大，得知大雄俾人捉左入青山，我個心唔多唔少都有啲唔舒服。再加上，我好想知道叮噹同大雄之間發生咗啲咩事。究竟係咪真係好似叮噹咁講，大雄變左，變到為咗啲法寶而要殺叮噹呢？直覺話我知無咁簡單。

基於以上嘅原因，我決定要去青山探大雄！





諗到就做！我即刻請出google大神，輸入：“青山 探望”，我花咗啲時間研究，終於睇好晒啲相關資料，原來一切都無我想像中咁複雜，依家係二十一世紀，做咩都十分之方便。我上網填好份表格，book好晒啲時間，成個過程都唔駛十分鐘，咁就已經成功約見大雄。

時間，係一星期後嘅星期六！

一樣，我無將我準備要去探大雄嘅事話俾叮噹知。係呢段時間，我推住叮噹四處出出入入，但係始終都係搵唔到嗰個所謂嘅時光機入口。

時日太快，轉眼間就嚟到星期六。我坐港鐵去到屯門，再轉程小巴，終於嚟到屯門白松觀路。我靠住牆邊覓路而行，行左大概七分鐘，由石柱形成嘅入口，再加上牆壁四個綠色大字，“青山醫院”，我終於嚟到目的地。

我懷住忐忑不安嘅心情，由門口一直往前行。我，係一個普通人，一個普通人對精神病院懷有些少敬畏之心都係人之常情。





或者係因為懷住呢種心情，成間醫院俾我嘅感覺都係異常地安靜，靜到我有啲驚，靜到我背脊有啲涼。

好彩，一路上都總算見到個著住制服嘅工作人員帶住個病人走動。見返啲活人，我個心都定左啲。我同佢地兩個越行越近...越行越近...

原本一直低頭行路嘅病人，忽然病發咁“啊”左一聲，我當堂嚇到個心離一離。我趁我仲未嚇到腳軟，急急腳咁係佢地身邊行過。我完全唔敢望佢地，雖然我全程望住地下，但仍然感受到有雙充滿惡意嘅眼神啤住我。我下意識咁猛捽後頸，試圖驅散內心嘅不安。

(p.s. 樓主唔想花時間研究青山醫院，以上所有描寫，皆為樓主意識中嘅青山，如有冒犯，實屬巧合。)