執到叮噹 殺死大雄: 3. 一個交易

“點...點解你又要殺...大雄呢？搞咩啊你地，喂，你可能唔知，香港地殺人犯法架喎，唔好講到咁簡單喎。同埋你又點殺佢呢？你又無晒法寶又盛。下化。”我俾叮噹搞到我好亂，一輪咀講咗我諗到嘅嘢出黎。

叮噹拍拍自己個腦袋，講：“可能係穿越過嚟時出咗啲問題，我暫時都唔記得點解我要殺大雄，但我知道我一定要咁做。”

我見叮噹講得咁堅定，我沉默左落嚟，我需要啲時間消化一下。但我仲未消化完，叮噹就又繼續講：“我想你幫我手......”

“痴綫架？大佬，我幫手收埋你唔好俾大雄搵到，我ok嘅，但衣家你要我去殺人啊？癲咗啊你。”我反應好大，聲綫都不自覺提高咗唔少。好彩未到食飯時間，廳出面應該無人。

“如果你幫我殺死大雄，我可以俾件法寶俾你，任何一件。”叮噹認真咁對我講。





“任...任何一件？”我口窒窒咁講。同時，我心入面即刻諗到：“隨意門，一定係隨意門！咁之後返工就永遠都唔會遲到！”

我無應承叮噹，但亦都無拒絕佢。因為係呢個時候，啊媽叫我出去幫手準備開飯。

我叮囑叮噹唔好走出我房門，唔好出聲。而我亦都趁呢個空檔，好好咁思考一下。

由準備開飯到食飯，我成程都心不在焉，不斷左思右想，到底我應該點做先好呢？殺大雄...法寶...殺大雄...法寶。

我諗到好亂，好煩，於是拎起手機，邊食飯邊漫無目的咁look下手機。突然間，我啲聊天群組炸開咁樣，啲訊息一條接一條咁彈出嚟。





“哇！笑撚死。”

“痴撚綫，好Q似喎扮得！”

“大雄！係大雄啊喂！”

我跳開呢啲訊息，點開人地send出嚟嘅片，打開一睇，裏面有個人好迷茫咁四處張望，呢個人戴眼鏡，米黃色上衣，藍色短褲加白襪仔，經典嘅大雄樣。而佢所身處嘅地方，正正就係我樓下嘅公園。

根據群組訊息，呢條片係岩岩拍嘅，亦姐係話大雄就算走左都唔走得遠。呢啲係咪叫做踏破鐵鞋無覓處？咳，雖然我仲未真正開始刮大雄出嚟。





既然大雄衣家就係我樓下，我決定要好好同大雄傾一傾計。我並唔係打啲咩壞主意，純粹係想知多啲，點解佢同叮噹會搞成咁？大雄佢係咪真係變得咁壞？究竟佢諗緊啲咩野？