執到叮噹 殺死大雄: 2. 想殺大雄

我有啲難以置信咁講：“你話大雄要殺你？究竟點解會咁？”大雄向叮噹嗌救命都嚟唔切，點會無啦啦走去殺叮噹？

叮噹拍一拍自己空空如也嘅肚皮，講：“最衰都係呢個百寶袋...我都估唔到，大雄會因為百寶袋而想殺我。”

oh...原來係咁，呢個就係叮噹個肚無袋嘅原因。我皺住眉講：“點解啊？你嘅百寶袋咪姐係大雄嘅，佢應該無必要咁樣做架喎。”以我嘅認知，叮噹係好少托大雄手踭。

叮噹搖一搖頭講：“我都唔知，可能大雄佢變左，總之，依家我個百寶袋已經俾大雄佢搶走左。”

我諗左一諗，又問：“你話個百寶袋已經俾大雄搶走左？咁佢應該無必要殺你啦？佢要殺你，唔駛搵上門，有法寶在手，隨時隨地都可以啦。”





叮噹啲法寶咁屈機，如果我好似大雄咁搶左叮噹個百寶袋，任何人對我嚟講都好似螻蟻咁，伸一伸手就殺得死嘅東西，駛嘜放係心上呢？

“因為我個百寶袋上左鎖，除非係我本人，或者我死左，如果唔係，其他人唔會係裏面拎到任何一件法寶出嚟。”叮噹完美咁解答左我嘅疑問。

“哇，原來你個百寶袋仲有個咁嘅功能？我一直都唔知添。”

“如果唔係察覺到大雄有唔妥，我都唔會開啟呢個功能。”

我自言自語咁講：“所以，為左用到裏面嘅法寶，大雄佢一定會過嚟殺左叮噹你...如果唔係，佢得到嘅只係一個擺設。但...大雄咁無用，我懷疑佢連我都未必夠抽喎...點殺人。”





叮噹慢慢企起身然後擰轉，俾個背面我睇，只見佢後背傷痕纍纍，似乎受到極大嘅衝擊，令到背上嘅油漆都掉落，露出機械結構。

擰返過嚟坐返好嘅叮噹講：“雖然我將百寶袋鎖好左，但我之前借俾大雄嘅空氣炮唔記得收返埋...我背上嘅傷，就係大雄用空氣炮打嘅。好彩，如果我唔係利用大雄間房櫃桶嘅時光機逃走，我諗我已經死左。”

直至見到叮噹背後嘅傷痕同佢果種悲傷嘅聲綫，我先至真真切切咁感受到叮噹衣家受到嘅威脅。

“唔駛驚，香港地咁多人咁複雜，我懷疑大雄搵唔搵到你都成問題。搵唔到你，就算佢有大炮都無用！”我見叮噹好似好慘咁，拍晒心口俾啲信心佢。

點知叮噹聽完我講之後搖搖頭，講：“唔係，就算佢唔搵我，我都想搵到佢。”





“下，點解啊，佢有炮喎，佢想殺你喎。”我驚訝。

“因為我都想殺佢。”叮噹淡淡咁講。

哇，我聽完簡直晴天霹靂，搞咩。佢地兩個話晒都叫做曾經朝夕相對嘅好朋友，做嘜依家變左要置另一方於死地咁樣？