執到叮噹 殺死大雄: 4. 大雄被捉

食完飯洗埋碗，我拿拿林返入房。我必須快啲落去見大雄，唔係走遠咗就弊。

入到房嘅我，認真同叮噹講，佢絕對唔能夠暴露係其他人面前，唔可以俾人知道佢係一隻識行識走識講嘢嘅機械貓。叮噹似乎都相當有呢方面嘅經驗，好快就明白我擔心啲咩，點點頭答應我。

我換上運動衫褲後講：“我依家出一出去，如果有人入嚟，你就扮唔識郁嘅公仔，ok？”

叮噹好醒目咁坐去我牀角，答：“係嘅，但你去邊？”

我邊整理衣衫邊講：“我要還啲嘢俾朋友，好快返嚟，等我。”我並唔打算同叮噹講我係去見大雄。有啲咩，留返我同大雄傾完計先再講。





“請問你有無見到一個cosplay成大雄嘅人？”我係條街捉咗個後生仔問。

果然，好似大雄呢啲裝束咁出色嘅男人，係叫人過目難忘嘅，我好快就問出左大雄嘅位置。

搵左一陣，就見到大雄。除左大雄之外，仲有四個中三中四學生咁嘅mk仔圍住大雄。

我由遠處就聽到啲粗口啊，恥笑聲咁。再行近啲，明顯就係大雄俾班mk仔玩緊。

於心不忍嘅我，雖然唔鍾意多管閒事，但此情此境，都容不得我猶疑，我大聲叫起嚟：“喂！靚仔，好啦...”





忽然“嘭”的一聲響，其中一名mk仔腳邊地下穿左一個大窿。只見大雄右手抬臂，拎住枝空氣炮，唔駛問啊貴，個窿就係大雄枝炮射嘅。

嗰班MK仔俾大雄咁嚇一嚇，大叫一聲，馬上作鳥獸散。

我快步上前，扮作關心咁講：“你好啊先生...有無咩幫到你？”我嘅人設係要扮唔知情人士，用返普通人嘅心態對大雄，我廢事俾佢聯想到我見過叮噹之類。

大雄揸緊枝空氣炮，面目有啲猙獰，佢警剔咁對我講：“多謝你，我無事。”

我唔知大雄經歷咗啲咩，但佢俾我嘅感覺同我所認識嘅好唔同。





“先生不如我請你去食啲嘢？”我一臉關心咁講。

大雄摸一摸佢個肚，點點頭後又搖搖頭咁，叫人難以捉摸。正當我想落多兩錢肉緊嘅時候，忽然警車聲響，一隊差佬全款武裝咁向我地快步跑過嚟。

我望住右手仲係揸住枝空氣炮嘅大雄，估計係有街坊聽到巨響報警。我立時舉高雙手，並且叫大雄都跟我咁做。

當然，大雄唔會聽我講。

班差佬都訓練有素，好快就制服左唔聽話嘅大雄，大雄想用空氣炮還擊嘅時間都無。佢嗰枝炮亦係混亂之中，跌咗落地下，被班差佬當做玩具咁踢埋一二邊。

初嚟報到嘅大雄，唔知頭唔知路就俾人咁捉住，佢不斷掙扎同埋胡言亂語，十足十一個癲佬咁。

而我，由於我刻意表現出我同大雄唔同路，又舉高雙手又聽話咁，班差佬盤問我幾句，認為我只不過係路過後，就將注意力去返大雄嗰邊。

最終，大雄俾人捉左去差館。





而我，執起跌左落地嘅空氣炮。