執到叮噹 殺死大雄: 1. 執到隻叮噹

1. 執到隻叮噹

我叫陳強，係香港一個平凡嘅大學生。平凡嘅我，同日本普通高中生一樣，注定左不平凡。

呢一日，我係屋企附近四圍游蕩。我即將大學畢業，準備要踏入社會。身邊嘅同學都好有計劃，而我，唔知道自己可以做啲咩，應該做啲咩，想做啲咩...

我行左好多我平時唔會行嘅地方，直至係一條暗巷發現一隻藍白色嘅機械公仔。

我行近一望，藍色嘅身體，白色嘅手腳臉腹，正正就係一隻典型嘅叮噹，不過呢一隻係合埋左雙眼嘅叮噹。





人一迷惘，就特別多野諗，特別多幻想。

“喂，整幾件法寶嚟駛下丫老世。”我對住叮噹塊面起勢咁拍。

“屌！無袋嘅！”我忽然見到，呢一隻叮噹佢個肚係無袋。喂，大佬啊，粗製濫造都唔好咁求其啊，叮噹竟然無袋？我嬲到一個飛腳踢落去叮噹公仔個肚到。

“啊。”

呢一聲唔係我發出嘅，但呢條巷得我一個......我懷疑自己有幻聽。我再踢一腳試試，但呢次已經再無聲響。雖然係咁，直覺話我知，呢隻叮噹相當之有古怪，我都唔知自己係啲咩心態，總之，最後我承受住路人怪異嘅目光，抱住呢隻叮噹返屋企。





一返到屋企我馬上進入虛脫狀態，痴左綫，呢隻野重到仆街！我將叮噹推入我間房嘅角落後，然後入廁所梳洗一下自己滿頭嘅大汗。

“咦？”返入房既我，心入面打左個問號，心諗：“隻野應該係面朝下架喎，唔通我記錯左？”我帶住疑惑咁越行越近，突然！原本死氣沉沉嘅機械公仔，張開左雙眼！一雙漆黑嘅眼珠出現係我面前！我當堂嚇左一跳，成個人差啲坐落地下到。

面前嘅叮噹，企起身，竟然對我揮揮手講：“你好啊，多謝你救左我。”

我大腦開始hang hang地機，仲未嚟得切俾反應，有一把咆哮嘅聲音搶先發出：“衰仔！你又執啲咩垃圾返黎啊！”係我啊媽返左嚟。

“正衰仔，執埋啲垃圾返嚟，出面啲街坊個個都係到笑緊你啊，咁大個人，正經事又唔見你做。”老媽子一踏入門口就一輪咀咁數落我。





換轉係以前，我一定好嬲，會駁幾句咀。但依家，我望住識行識走，識講野嘅叮噹，我似乎見到我光明嘅未來。我向住門口敷衍講：“得啦！我有分數！”

我對叮噹做個殊嘅手勢，等到啊媽講夠，靜落嚟之後，我細細聲咁同叮噹講：“你係...叮噹？點解你會出現係條暗巷到？”叮噹嘅出現雖然係好難以置信，但事實擺在眼前，都唔到我唔信。

叮噹好有禮貌咁回答：“係啊，我係叮噹，你識得我？”我秒答：“我地呢到個個都識你。”

叮噹歪一歪頭講：“竟然有啲咁嘅事？”我唔理叮噹嘅不能理解，先馬上嚟個自我介紹：“我叫陳強。”

叮噹對我點點頭：“陳強你好。估唔到你嘅媽媽同大雄媽媽一樣，都係咁惡。”我笑左笑，問：“係呢，大雄呢。”

一問起大雄，叮噹臉色都開始變左。叮噹陰沉住臉講：“大雄都跟我過左嚟。”仲未察覺到叮噹臉色嘅我講：“哦，咁佢人呢？”

“唔知，但為左殺我，大雄佢好快就會搵上門。”

叮噹聲綫平靜咁講完呢一句說話，而呢一句說話，搞到我個心都離左一離。我心諗：“咩話！大雄竟然要殺叮噹？我係咪聽錯左？”