上流養成法: Chapter 4

這幾天的時間裏，我都隨著Edward 到處搜羅價廉物美的衣服。雖說便宜，但Edward的品味真的不錯，他可以從垃圾堆中尋寶一樣，找到出得場面的衣服。在彭老爺家中生活的時候，他其實都只對阿媽好，我一分錢都沒從他身上得到過，莫說是名牌衣服，連普通衣服也不會買給我。

「你啲衫都係喺度買？」我很好奇外表高貴的Edward是不是都在這種二手舖頭買衣服。

「以前係，而家唔係，等到你功力有反咁上下，就可以真係去啲名店買嘢。」

過了大概1小時，我們兩個人，兩對手都拿不完剛買的戰利品。收穫滿滿，但其實我只用了$1000就買完。

「返到去記得洗得乾乾淨淨，千其唔好留低有任何俾人發現係二手貨嘅痕跡。」Edward再三提醒我。





「係，師傅！咁我哋係咪買完啦？」

「未吖，我哋要去幫你買洗頭水同沖涼液。」

「吓？呢啲野都要你同我去買？唔洗啦，我用完會自己買！」我感覺自己像個小學生似的，連這些日用品都要別人幫我買。

「名牌古龍水你就買唔起㗎啦，但如果你著到咁視正，但又有臭狐，咁你咩型象都冇用啦。睇你平時都係用啲惠康減價嘅沖涼液㗎啦，我哋去買啲新㗎啦！」Edward真的是甚麼都了如指掌，令我不得愈來愈相信他的話。


回家洗完澡後，我隨手拿起今天的戰利品並穿上，看著鏡子裡的自己都覺得難以想像。明明都是同一個我，但卻少了那份頹敗感。





「我要入嚟攞啲嘢！」老媽子一如既往連門也沒有敲便進來了。

「等等。。。」我話也未說完，阿媽就走了進來。

「嘩，搞咩呀你？買咁多靚嘢唔使錢呀？」阿媽看到我，露出難以置信的樣子。

「咩呀，二手貨嚟㗎，好唔好睇？」

「好呀！唔講以為你係咩太子爺！終於唔係著住啲頹tee。你搵到工啦咩？」





「未呀！」我不想回答她的問題。

「你又亂洗錢呀？而家啲後生就係咁㗎啦，淨係識先洗未來錢，唔識儲錢㗎。」阿媽又開始了她一連串的攻勢，她露出一副鄙視的眼神便離開了我的房間。

為何她的話題從來離不開錢？她除錢之外還喜歡甚麼？

「車，睇下點！」我沾沾自喜看著鏡中的自己地説道。