《求婚嗰日，我發現我女朋友鍾意食屎》: 四十

到達雲南之後，因為高醫生嘅醫學聚會喺昆明，而我哋就要轉機去文山市，所以佢暫時就要同我哋分道揚鏢，聽朝先再獨自過嚟同翻我哋會合。
文山市係雲南嘅首府，所以城市發展相當先進，睇落其實同深圳嘅感覺相差無幾。
但係，根據向彩萍留低嘅地址，佢所身處嘅位置係喺遠離文山市中心嘅鄉野位置，所以我、敏敏同八仙果師父決定先喺文山市留宿一晚，等聽日養足精神之後，再出發去搵向彩萍。
 
於是，我、敏敏同八仙果師父就喺文山市首先出發去我哋嘅酒店。
沿路上，由於文山市相當發達，道路兩旁嘅商舖千奇百趣，波鞋店「New Balun」同「Addodis」、唔知賣體育用品定保險嘅「Buma」、仲有專門賣中式包點嘅「麥當佬」，令我同敏敏都睇到得啖笑。
「唔好睇文山市呢度咁先進，唔好忘記，呢度同時亦都係『苗族』自治區，所以喺你哋身邊隨時都有擅長用蠱嘅高手。喺苗人嘅世界，蠱係無處不在嘅，例如佢哋有一種下蠱方式叫做『拍花』，就係輕輕喺小朋友嘅頭上一拍，蠱就係咁樣留咗喺小朋友嘅頭上，然後小朋友就會被控制然後跟住下蠱人走。所以，萬事小心啦。」八仙果師父一直保持嚴肅嘅表情，同我同敏敏完全投入觀光嘅心態好唔同。
 
差唔多夜晚七點幾，我哋就去到酒店。
為保安全，八仙果師父專程安排咗一間五星級酒店，貪佢安全性高啲。




本身我同敏敏諗住難得嚟到雲南食好啲，想試下酒店自助餐，但係八仙果師父提醒我哋雲南蠱毒處處，真係要步步為營，所以最後我哋唯有各自點咗一份晚餐，再喺餐前食咗幾粒八仙果先敢開餐。
 
「聽朝九點，我哋就準時出發。不過我都要提下你哋，到目前為止我哋都未知向彩萍底細，所以你哋最好跟實我，以免佢靜靜雞向你哋下毒手。」八仙果師父一邊切牛扒，一邊講。
「講起呢樣嘢，師父我都想同你傾下可以點樣應對向彩萍。」敏敏接過話題，就開始同八仙果師父傾聽日嘅策略。
而無所事事嘅我，除咗享受自己嘅晚餐之外，亦有空閒望下周圍嘅事。
 
我哋而家所身處嘅係西餐廳，但餐廳另一邊就劃分咗做自助餐區。
我睇住一班食客前仆後繼、奮不顧身咁撲去一兜兜啱啱煮好嘅嘢食度，完全盡顯我國珍惜食物嘅美得。
另外，所有海鮮嘅食物盆前面一定有人潛伏喺度，基本上只要有新海鮮出現，頭一兩個排隊嘅人一定會成盆分哂佢咁濟，呢種先見之明嘅部署，完全係表現緊中華五千年嘅智慧。
而最厲害嘅，莫過於大家衝向一盤食物嘅時候，你我拳腳來往，疾如風、猛如雷，到頭來都只係為咗搶一個揚州炒飯，可見我國人民為咗響應國家嘅「光盤行動」，係幾咁認真，幾咁身體力行。




坐喺老遠咁睇住呢場表現緊我國極致嘅情操嘅自助餐大戰，我突然有啲慶幸自己揀咗住喺西餐廳，否則以我體質咁孱弱，恐怕成晚連碟邊都未必舔到。
 
我唔忍心睇到咁慘烈嘅激戰，所以就打算將目光收翻過嚟。
呢個時候，我就喺我哋枱腳，發現到另一樣嘢。
一隻青蛙，唔係，係一隻「紅蛙」。
因為我眼前望到嘅，係一隻紅色嘅青蛙。
而隻青蛙，亦都碌大隻眼望實咗我。


= = =




作者IG：Ｗindblowssilently
如果想加速追故，連登講故台及Penana正領先連載中!