《求婚嗰日，我發現我女朋友鍾意食屎》: 四十一

老實講，作為一個五星級酒店員工，喺餐廳入面見到有生勾勾嘅青蛙出現，完全係一件唔可以接受嘅事。
如果喺香港發生，我相信啲員工已經俾一大班西客投訴到死。
只不過，當呢件事發生喺愛惜動物，萬物皆平等嘅祖國入面，有隻青蛙出現喺酒店餐廳似乎都唔係一件太新奇嘅事。
我本來打算將呢件事話俾敏敏知等佢笑下，但係當敏敏同八仙果師父傾完計之後，我發現隻青蛙已經走咗，所以就當無咗件事。
 
「咁我哋聽日朝早九點，酒店大堂等。」八仙果師父臨入房之前同我哋交代咗一句。
「收到，聽日見啦師父，晚安。」我向八仙果師父揮手，然後就閂咗房門喇。
「喂，點解你個袋咁重㗎！」敏敏呢個時候就喺度搬緊我哋啲行李，因為佢向來都有呢個無論去到邊度都要將啲嘢執得整整齊齊嘅習慣。
「無啊，都係啲衫褲囉。」我走咗過去幫佢手拎起咗我個袋，然後又突然醒起，「吖！我仲帶咗我親手整俾你盒朱古力啊！」
「做咩帶過嚟啊傻佬？你想自己食啊？」敏敏推住佢個行李箱嘅時候問。




「其實呢，呢盒朱古力，自從我求婚嗰日之後，我日日都帶住㗎。我最大嘅希望，就係可以等你一無事，就即刻攞出嚟同你求婚。」我放低咗行李，好認真咁望住敏敏。
「知喇傻佬。」敏敏好似望住一個小朋友咁露出咗好單純嘅笑容，「聽日我哋就見到向彩萍，我相信件事就可以告一段落㗎喇。」
「嗯，咁我都希望你聽日就可以食到呢盒朱古力啦！」我將敏敏拉近自己，然後細細力錫咗佢一啖。
呢一刻嘅我哋，都同樣期待緊事情將會有美好嘅發展。
 
為咗聽日可以養足精神去搵向彩萍，我同敏敏未到十一點就已經瞓咗。
雖然呢間酒店饍食方面麻麻，但係好彩張床都尚算舒服，所以我同敏敏好快已經各自瞓咗。
但係唔知瞓到幾點，我喺張床度轉身嘅時候，隻手摸到隔離竟然空咗。
我嘗試打開咗半對眼，發現敏敏真係唔喺我身邊。
不過就算佢真係唔係我身邊，最多都係去咗廁所啫，都無咩事吖。




 
當我咁諗之後嘅下一秒，我慢慢甦醒緊嘅身體機能發現咗另一樣奇怪嘅事。
我聞到，房入面有一陣好特別嘅味。
係朱古力。
仲要係特濃朱古力。
 
本來一間房有朱古力味都無咩問題，但係當我一聯想到朱古力味同敏敏唔見咗，我即刻成個人喺床度彈咗起身。
我連拖鞋都未著就跑咗去廁所度，門一打開，果然，敏敏喺度。
呢一刻，佢挨住座廁，不斷咁從入面撈緊啲屎出嚟食。
 




「夠喇敏敏，唔好再食啦！」我唔忍心睇住自己心愛嘅人受苦，所以唔理污穢，一下就過去想將敏敏從座廁拉走。
我出力一拉，敏敏竟然出力反抗，一手拉住座廁嘅邊，另一隻手繼續瘋狂撈起啲屎。
呢個時候，我留意到敏敏嘅表情好奇怪。
佢而家係雙眼反白，完全似係失去咗常理，只係不斷咁想用屎去填滿自己個口。
 
無論如何，我實在睇唔過眼佢咁樣不斷糟塌自己，所以我只可以掹開佢拉住座廁嘅手，然後格硬將佢拉出廁所。
「我要食……我要食……」呢刻嘅敏敏完全好似一個失去意識嘅癮君子，咩都唔想要，成個腦都只有屎。
我同敏敏嘅糾纏一直出到廁所依然繼續緊，呢一刻我哋兩個都已經跌咗落地，而我個身同塊面都已經沾上咗敏敏手上嘅屎。
但係最大問題係，我感受到敏敏想衝翻入廁所嘅力道係完全無減過，換言之只要我而家一放手，敏敏就會即刻衝翻入去。
 
唔知點解，喺呢一刻，我竟然喊咗出嚟。
「敏敏你可唔可以醒下啊！唔好再食屎喇！爭一日咋，聽日你就好翻啦，頂住啊！」我一邊流眼淚，一邊對住敏敏大叫。
但我知道，雙眼反白嘅敏敏完全接收唔到我嘅信息。
呢一種無能為力咁睇住所愛嘅人受苦，就係令到我忍唔住喊嘅原因。
 




就喺我同敏敏喺地下糾纏緊嘅時候，房門，毫無預警咁突然打開咗。
有兩個陌生嘅男人慢慢行咗入嚟，而其中一個滿臉鬍鬚嘅大叔望住敏敏，再望一望佢手上同臉上嘅屎，表情好滿意咁用普通話講：「就是她了！」
而另一個身型肥過部電單車，成個球體咁嘅大叔亦都發出相當高音而難聽嘅笑聲咁用普通話答：「沒想到終於撿到一件好貨啦！」
 
當我錯愕咁望住呢兩個明顯來者不善嘅男人嘅時候，我望到有一樣嘢跟住佢哋跳咗入嚟間房度。
呢樣嘢，就係頭先我喺酒店餐廳所見到嘅紅色青蛙。