《求婚嗰日，我發現我女朋友鍾意食屎》: 三十九

Any肥，就係咁，三日之後，我哋就出發坐飛機前往雲南。
比較意外嘅係，原本以為係三人同行嘅旅程，最後竟然變咗四人遊。
第四個人，就係高醫生喇。
「其實我都係咁啱有個醫學Conference喺雲南，所以我先跟埋嚟嘅啫，你哋唔需要太在意我。」高醫生解釋完呢一句之後，就低頭喺佢個飛機位度繼續睇佢嗰啲成本字典咁厚嘅醫學書。
「唔好信佢啊，佢知道我要去雲南嗰日，佢先話要去拆穿迷信嘅面紗，話要我從此以後都只係相信科學喎。所以佢今次呢，擺明就係有目的而嚟㗎！」八仙果師父笑咗一笑咁細聲話我哋聽。
我同敏敏聽到都忍唔住笑，估唔到咁古板嘅高醫生都有好似小朋友一樣嘅好勝心，係都要用科學去贏八仙果師父嘅風水命理。
 
香港往雲南昆明嘅呢程機話長唔長，大概三個鐘左右。
為咗打發時間，我揀咗套「南洋十大邪術」嚟睇。
雖然電影絕對比現實誇張，但係消磨下時間、得淡笑咁都算係唔錯嘅。




只不過，當我睇完戲之後，發現身邊嘅敏敏竟然喺度睇緊風景。
佢一向都係一個好瞓得嘅人，所以無論長途定短途機，佢通常都會選擇一上機就瞓。
但係佢今日難得竟然成程度電視又無睇，覺又無瞓，似乎應該係另有心事。
 
我細細力捉起敏敏隻手問：「諗緊咩啊？」
「你覺得，向彩萍對我爸爸嘅算唔算真愛啊？」敏敏將頭望向我，個樣十分認真。
「你點解咁諗嘅？」我睇得出，敏敏似乎諗緊好多嘢，所以索性唔開聲住，聽下佢講咩先。
「我純粹諗，如果我唔愛一個人，又點會得閒用廿幾年去憎佢？愛嘅反面就係恨，咁即係恨嘅反面亦都係愛。所以我一直喺度諗，話唔定向彩萍呢二十年嘅恨，代表嘅其實係佢真係好鍾意我爹哋。」敏敏解釋佢嘅諗法。
 
「的而且確，恨同愛並唔係咁容易可以分得清。相隔二十年，內心依然念念不忘用蠱傷害你爸爸，當中點都代表咗佢內心嘅一份感受。但係我又覺得，愛，應該係以對方嘅好處為優先。正常嚟講，根據向彩萍封信講，佢都已經有埋家室，再恨，唔係都應該放低舊怨，然後開展一個新嘅家庭生活咩？




但係佢選擇將呢份恨意一直執著唔放，我覺得比起『真愛』，其實恨意背後，式者只係反映佢係一個唔識得放低，亦唔識放過自己嘅人。」
我向來都係一個「利他型」嘅伴侶，好多嘢都習慣先考慮對方感受，所以一見到向彩萍呢種損人不利己嘅作風，我絕對唔會認同佢係一個代表「真愛」嘅人。
 
「嗯，其實我都贊成。我只係一直喺度諗，到底有啲咩，可以令一個人憎恨一個人廿年啫。如果我諗通咗，話唔定當我哋見到向彩萍嘅時候，可以有辦法勸服到佢幫我哋解蠱呢。」敏敏托住頭講，我睇得出對於單純善良嘅佢嚟講，要明白「恨」，似乎唔係一件易事。
而我開始明白，其實佢之所以諗咁多嘢，原來就係為咗代入向彩萍嘅諗法。
呢種用同理心去明白對方，然後希望可以解決問題嘅做法，果然非常有作為社工嘅敏敏嘅特色。
 
「我諗起，我曾經見過一幅掛喺酒店餐廳嘅油畫。畫入面，一隻獅子媽媽對住幾個人類狂吼，而獅子媽媽背後，係幾隻受咗傷嘅小獅子。呢幅畫所講嘅係，表面嘅憤怒，有時候係用嚟掩藏保護傷害。恨，表面睇落係激動、係憤怒，但其實可能就係為咗掩飾自己內在最深嘅傷痕。所以，你問到底有啲咩令向彩萍可以憎恨世伯廿年，我覺得除咗係世伯對佢所做嘅嘢真係好衰之外，仲有代表向彩萍內心嘅傷口一直都未痊癒，所以佢先要一直憎恨落去，從而用恨意去中和自己嘅痛處。」
我之所以可以講得出呢番說話，其實真係多得我喺「譚仔」打工嘅日子。
嗰時我成日打聽關於向彩萍嘅事，聽聽埋埋，好多「譚仔」姐姐口中嘅向彩萍都係一個有情有義、照顧同鄉員工嘅好老闆。




一個對人咁好嘅人，點解會變成一個用最毒嘅蠱去傷人嘅人呢？
唯一嘅答案，就係娟姐所講，自從失戀之後，向彩萍日日以淚洗面，亦開始會對陌生嘅衰男人下蠱懲治。
所以，除咗將向彩萍嘅行為同佢內心嘅傷痕拉上關係之外，我都搵唔到另一個解釋。
 
講到呢度，敏敏輕輕挨咗落去我膊頭度，低聲講：「我其實都想像唔到，到底今次件事最後會點收科。只不過，如果可以嘅話，我哋盡量都唔好傷害向彩萍吖。因為點睇都好，其實佢都係一個可憐人。」
「嗯，希望大家都可以好好傾下，好嚟好去就最好啦。」我將敏敏攬近啲自己，想俾多啲安全感佢，所以再補上一句，「放心，今次我一定會幫你清哂所有蠱毒，令你變翻做一個正常人。」
 
就係咁樣，我同敏敏互相挨住對方，慢慢就瞓著咗。
我發咗一個夢，夢入面我同敏敏好幸福咁結婚、生仔，好似完全無再擔心過關於蠱毒嘅事。
到底呢個夢係一個未來嘅預兆，定抑或只係存在於虛幻之中嘅夢境呢？
我都唔知。
 
但係夢醒嘅一刻，我哋就已經到達咗雲南。
亦都即係象徵住，我哋同向彩萍好快就要正面交鋒。