出租女友: 《十五話 強烈的否定》

(和也對於水原嘅出現開始懷疑自己係咪中暑，出現幻覺，直至和也一行其中一人指住水原，和也先返回現實）

「啊…我認得你，你係文學系嘅市原同學。」其中一人自信滿滿咁向水原相認，水原就禮貌地回應：「我叫一之瀨，多多指教。」

（其中一人發現自己一路都記錯人哋個姓，表現得好尷尬，以笑遮醜。）

一之瀨？係啵，水原呢身打扮係大學同學一之瀨，原來水原係大學係用真姓一之瀨，搞到我以為佢係大學都要用假姓（市原）。

「和也，你無事呀嘛？頭先開始就一直都呆企喺度，面青青咁。」木部最先察覺到我有少少唔對路，不過我應該要扮若無其事先得：「哦，無事呀！」，水原真係好犀利，在場無一個人注意到其實一之瀨就係水原。





（水原三人組一早就揾到另外一個據點，所以就同和也一行人道別，和也都鬆一口氣）

「和也和也。」一場虛驚之後，麻美拉一拉我隻手叫我。

「你頭先係想同我講啲咩？我好想知道呀。」麻美有少少臉紅紅，好似好期待咁望住我。

「不如我哋去嗰邊，只係得我哋兩個嘅地方，話俾我知和也你同女朋友之間嘅真正關係。」我都俾麻美望到面紅紅，今次係好機會。

（世事邊有咁順利，因為要決定邊個男仔去買午飯，所以木部就叫和也去猜包剪揼，天注定和也必定會輸，苦惱嘅和也係買飯前入左更衣室思考一下）





雖然已經決定同麻美交代我同水原嘅關係，不過應該點講至好呀，根本就無可能直接話水原係Part-time GF，話時話點解水原會喺呢度出現？

（係和也苦惱期間，有人打開更衣室門，和也驚覺自己無鎖到門，轉身一望，竟然係水原，水原見到和也喺入面，本能反應閂返門，不過和也秒速拉咗水原入去）

「你想做咩呀？講好咗平時我哋唔會接觸對方。」水原好激動咁怒吼，不過我無理佢，我氣定神閒咁鎖埋門先。

「依家無穿煲算好好彩，俾人見到我哋人齊就水洗都唔清。」我都好認同水原嘅說法，不過我比較在意嘅喺我應該點同麻美交代水原嘅事，話晒水原都叫做係我（週三戀人），都有必要問下佢意見。

「其實我啱啱同麻美傾偈傾得幾有氣氛，話唔埋有機會復合，我覺得你其實都對我幾温柔，所以我想問下水原你，如果我同麻美喺返埋一齊，你會唔會感覺唔舒服？」我摸着後尾枕尷尷尬尬咁問水原。





（水原依家就好似聽完個冷笑話咁，喺北極冰封咗）

「你就係想同我講埋呢啲無聊嘢，無其他事，我走先啦。」水原嬲爆爆講完轉身就走，但係我都未問完，所以我一手拉住水原，不過水原好快咁撥開我隻手，然後指住我嚟鬧。

「你千祈唔好會錯意，我同你只係有生意上嘅關係，我對你完全唔在意囉。」雖然水原係咁講，不過我依然感覺到水原對我係有一絲温柔，所以我追問水原：「咁點解你要對我講（如果你唔介意，我可以陪你）？」

「根本就無咩深層意義，我見你好失落咁，於是就講返啲Part-time GF會講嘅說話，舒緩一下你，我只係稍微同情你一下，你就以為自己好似情聖咁自以為是，你究竟有幾天真呀，就因為你想講呢啲說話，就拉我入嚟，你有冇危機意識㗎？你想同前女友重修舊好咁咪重修舊好囉。」水原更大聲咁連珠炮發我。

「我再講多一次，我肯每個星期三扮你女友，完全係為咗你嫲嫲。」水原講到咁，睇嚟真係我太天真。

「入面係咪有人呀？和也同學？」係麻美把聲。

（因為和也買飯買咗好耐都唔返，所以麻美就自告奮勇地揾和也，和也同水原想當驚慌，唔知點算好，水原就手指指，著意和也去應付麻美）

「麻美？點解你會揾到呢度嘅？」我騰晒雞咁只係推開少少道門同麻美講。





「你去買飯買咗好耐，所以咪四圍搵你囉，點解拉住道門，入邊仲有人喺度？」果然係隱瞞唔到麻美，我唯有求其講個藉口。

「係電話，我喺度同人講緊電話。」我冷汗都標埋出嚟，希望過到骨啦。

「你講大話，你部電話放咗喺沙灘嗰邊張枱度，你就係無攞電話我先出嚟搵你。」我雙手撳一撳自己條沙灘褲，今次大鑊，我真係無攞電話出嚟。

（麻美見和也無再撳住道門，就順勢推門睇吓究竟邊個喺入邊）

「你哋啲男仔真係，連大話都唔識講嘅。」俾麻美有機可乘添，我喺密室同一之瀨單獨對話，咁麻美一定會察覺到一之瀨其實就係水原，真次真係無得再瞞落去。

（麻美打開差不多一半門嘅時候，一個長直黑髮著住比堅尼嘅女生行出嚟）

「上次嘅事多多包涵，我係和也嘅女朋友，水原千鶴。」