出租女友: 《十四話 真假的情意》

（和也入讀大學都已經一段時間，天氣越嚟越熱，意思住和也即將迎接大學一年級嘅第一個夏天）

（和也已經熱到頭昏腦脹，就咁趴咗喺屋企嘅地板度）

「琴晚點解我會對麻美講啲咁嘅嘢㗎？」諗真啲我依家先識後悔，我正一白癡，水原只係Part-time，我幫水原講好說話咪只會激嬲麻美。

「之後喺大學入面見到麻美都唔知點面對好。」我一諗到咁就好想死，但係再諗後啲，點解水原會講嗰番話？

（「如果你唔介意，我可以陪你」）





水原竟然都會講出呢啲說話，或者水原都唔係我成日講嘅咁自我中心。

（突然係信箱口跌左封信入和也屋企，和也望一望封信署名一之瀨，然後飛身開門追出去，可惜水原都已經極速落咗樓）

水原竟然主動接觸我？仲要係用信？唔通經過琴晚，水原對我有講唔出口嘅嘢要對我講？

（和也開始幻想水原臉紅心跳嘅樣，然後對自己講：「和也，我…我已經無辦法，無辦法將你當係客咁看待啦。」）

（和也自己都諗到面紅紅，不過一打開封信，和也即刻臉色一沉，原來係水原嘅延長費用支付申請）





「原來係催我俾錢。」我死死氣咁去銀包度攞錢放入水原準備好嘅信封，呢封信提醒咗我，水原温柔對待（客人）係理所當然嘅，而我無論點都好，都無可能一直將水原租落去。

（返到大學，和也老死木部就拉住和也有事商量）

「誒？去海邊玩？」我一邊撥住扇一邊反問木部，木部就一口氣向我解釋：「係呀！伊豆半島兩日一夜，係之前聯誼會嘅前輩搞嘅，成員都會係嗰晚嘅人，所以就叫埋你。」

（和也第一時間就係諗起麻美）

「如果我應承去啲話，麻美佢應該就唔會想去。」我頭耷耷咁同木部講，不過木部就拍一拍我膊頭話：「呢層你放心，前輩早一步就去問過麻美同學，麻美同學話唔介意和也你嚟，仲話和也你可以帶埋女朋友同學就更開心。」





（和也聽到木部咁講有啲驚訝，然後揞住咀喺度偷笑）

我嗰晚對麻美講咗啲唔好嘅說話，居然都無嬲，麻美真係天使呀！

「點呀！女朋友同學嗰邊點呀？」我個心仲係麻美天使度，咁係好聽到木部講咩，所以我回過神再問木部：「咩咩點呀？」

「我係問你嗰晚之後有無同女朋友同學和好呀。」原來木部係問水原嘅事，水原係專業嘅，根本就無嬲，應該叫和好咗掛，所以我有啲心虛咁答木部：「和好咗啦，我哋有好好傾過。」

「你哋兩個嘅事，我唔想管太多。」木部真係明白事理，但係木部突然又好認真咁望住我：「不過，和也你係真心鍾意麻美同學嘅事我係知嘅，但係你唔好忘記要好好珍惜依家嘅女朋友。」

（木部認真勸勉和也就專注返自己電腦度，而和也伏喺枱度沉思）

木部根本咩都唔知，要好好珍惜？我都想，如果係（真正嘅女朋友），我一定會好好珍惜。

諗返去海邊呢件事，首先係水原根本唔會答應，之前講好只去探病，其次就係麻美水原同場嘅修羅場，我唔想經歷第二次。





（另一邊廂，水原嘅化身文學系市原嘅同學都為熱情嘅夏天熱烈討論緊消暑活動，例如係去海邊之類。）

（好快就到去海邊嘅日子，大伙兒分成兩架車前往目的地）

「和也！女朋友同學呢？」我打算側側膊唔提，點知木部都係問，我就隨便答木部：「佢屋企有急事，所以嚟唔到囉。」

（經過一段車程，終於到達目的地，大家先分配房間，然後放好行裝換好泳裝就去海灘集合，其間一直目不轉晴咁望住心情相當好嘅麻美）

麻美睇落果然唔似嬲緊咁，我嘅事，水原嘅事，究竟麻美係點諗？之前分手，妒忌水原，邀請我上佢屋企又係咩一回事？趁今日水原唔喺度，我一定要確認麻美嘅感情。

就算要同嫲嫲講我同水原分手呢件事，只要同時帶麻美去見嫲嫲，嫲嫲肯定會接受，所以今次海邊之旅，我一定要同麻美表明心跡。

（和也鬥志旺盛咁想要抱得美人歸，不過和也並唔清楚麻美嘅陰暗面，麻美表情厭惡咁喺自己房間自言自語：「居然喺我面前袒護佢，我絕對要令佢哋分手。」）





(另外和要面對嘅除咗麻美之外，文學系市原其實都同佢嘅兩位朋友登陸咗伊豆半島呢個地方）

（大伙包括麻美已經喺水中歡樂暢玩，只有和也獨自一個坐喺一邊用電話搜尋「和前女友和好的方法」）

「和也？做咩唔去玩？」著住比堅尼嘅麻美真係好煞食，麻美主動嚟關心我，似乎我真係有機會，我急急收起電話回應麻美：「無，我覆一覆埋個訊息就諗住一齊去玩。」

（麻美去攞飲品，順便遞一樽俾和也，然後就坐咗喺和也隔離）

「嗰一晚好對唔住呀。」麻美望住我向我道歉？然後麻美揼低頭繼續講：「其實我有好好反省過，我唔應該咁樣話和也你，我完全係講嘢唔經大腦。」

話說我聽得出麻美對呢件事都好在意又好內疚，果然麻美係一個好女仔，其實我比麻美更在意同內疚，所以我都唔係好識點令麻美釋懷。

「雖然我哋只係拍咗一個月拖，不過值得記念嘅事一啲都唔少。」麻美一伸懶腰就轉咗話題，不愧係麻美。

「其中最難忘嘅回憶就係6月14號，我哋拍完拖返屋企之前，我乘機錫咗你一啖，係我哋唯一嘅kiss。」麻美真係記得一清二楚，當然我都係，麻美嘅嘴唇係何其軟熟。





「我哋嗰陣時天真到連將來嘅仔女叫咩名都諗埋，係叫咩呢？」麻美一浪接一浪咁回憶從前，我當然都要表現吓自己，諗都唔洗諗就答麻美：「叫麻也！由我哋個名各取一個字，第時無論仔定女都好，都用呢個名。」

「但係，和也你依家已經有女朋友同學，你哋感覺仲要好好感情，所以（麻也）已經唔會出世。」到底發生咩事，麻美嘅表情好寂寞，我真係唔忍心見到麻美傷心，我真係好想同麻美講，我同水原係無（將來），我係因為俾咗錢，水原先會喺我身邊。

（和也不忍麻美咁寂寞，自己都諗到咬牙切齒，更加喺腦入面補完同麻美麻也一家三口幸福情景，諗到咁，和也企起身決定要同麻美交代一切）

「麻美，事實上，我同水原佢…」我決定向麻美坦白。

（真巧合，文學系市原三人組嚟到海邊並同和也一伙其中一個女同學相認而引起各人嘅注意）

（和也當然都俾呢個巧合嘅相認打斷咗，和也一望三人組，成個人驚嚇到石化咗）