出租女友: 《十六話 不控的一步》

（好彩水原有隨身帶備化妝品，情急之下由一之瀨化身成水原）

（木部為咗揾和也同麻美都啱啱好都場，驚訝咁不停問點解水原嚟咗）

「和也，你唔係話女朋友同學屋企有急事嚟唔到㗎咩？」估唔到木部咁好記性，我都睇得到水原緊張咗一下，藉口藉口？快啲諗個藉口先得：「其實水原老家就係呢度附近。」

「咁啱水原又處理完屋企啲事，咪過嚟同我會合囉，哈哈。」我都知我好似講得有點牽強，所以木部就半信半疑咁追問水原：「係咪真係咁㗎女朋友同學？」

「嗯，大概都係和也咁講。」水原再次發揮專業，淡淡定咁答木部。





（對於水原同和也共處一室嘅事實嚟得大突然，麻美好唔容易先回過神來）

「女朋友同學嚟咗實在太好啦，我好想親自向你為嗰晚嘅事好好道歉，好對唔住呀。」麻美見到水原竟然無嬲，仲咁大方同水原道歉，點算好？我仲點同麻美講清楚？

「唔好意思，我要去打個電話，不如你哋買飯返去先，食住等。」麻美要去打電話，無端端打咩電話？睇嚟都係好啲嘢咁，不過我都無辦法追去問，唯有一陣再揾機會。

(於是和也佢哋就先返沙灘，不過途中水原就拉和也去一邊）

「做咩突然拉我過嚟？」我唔知水原又有咩計劃要實行。





「我要返去我朋友度，你就自己諗個藉口解釋啦。」水原要走？又要諗藉口？

「你哋兩個靜雞雞喺度傾咩呢？打情罵俏？介唔介意我同你哋一齊行返去呢。」點解麻美次次都會咁啱出現㗎？我俾一俾眼色水原示意一齊返咗去先算，因為根本無辦法叫麻美一個人行先。

（就係咁，水原硬住頭皮一齊返去沙灘度午餐，而和也一行見水原都嚟咗就對水原好有興趣咁不停問水原嘢）

「估唔到水原同學你係呢頭人，咁呢到附近有無咩隱世嘢玩？」水原呆一呆，竟然問到咁深入，等我嚟答：「其實水原佢係大小姐嚟嘅，所以平時都無咩點出門，就連呢度附近呢路佢都唔係好熟。」

「原來咁呀，咁和也你係點同大小姐認識㗎呢？」仲問？我真係吹唔到落去，扯開個話題閃人先：「嘩！咁多沙喺褲入面嘅，我落水沖沖先。」





（和也就咁抛低水原自己走咗落水，水原就自己一個應付和也啲朋友，而和也就係水入面回望水原）

無論點睇水原都係超級美女，清醒啲咁諗，我完成配唔上水原，我仲妄想水原會對我有好感 ，今次又逼左水原做我（女朋友），就算我事後俾返錢，水原都一定唔會原諒我。

所以今次旅行之後，我一定會講出口，對嫲嫲，對大家好好交代我哋（分手）嘅事，仲有就係麻美方面都要鼓起勇氣去講清楚我嘅感情。

（講起麻美，麻美就喺唔太遠嘅大石後面揮手叫和也，和也亦即去行過去睇下麻美有咩事）

「和也，我掉咗條手鏈落水呀，條鏈好珍貴㗎。」我當然即刻幫麻美四圍揾。

（麻美突然跣一跣腳背靠向和也，和也就雙手扶住麻美膊頭）

「你無整親呀嘛麻美？」麻美有我即刻扶住應該都無整親，不過麻美個膊頭好滑，我都差啲扶唔實。

（麻美無答和也，反而成個人挨落和也度，然後回頭望住和也，麻美成塊臉都紅晒）





（和也同麻美對望住一眼，一瞬間，麻美就轉向和也，雙手抱住和也臉脥錫落和也嘴度）

（水原直覺敏銳咁望一望大石嗰邊，可惜咩都望唔到）

「水原同學你真係大方，竟然放心和也同學原本自己一個同其他女仔一齊旅行，俾著係我，我一定唔得。」其中一個女仔問水原。

「因為我對和也佢非常信任嘛。」水原笑得有啲牽強咁回應。

（水原呢個牽強嘅笑樣引起咗木部嘅注意）

（另一面，麻美錫完和也之後就埋咗個頭入和也心口度，然後向和也道歉）

「和也，對唔住，不過我真係忍唔到。」究竟有無人可以話我知點解事情會發展得咁快？