出租女友: 《十三話 寂寞的盡頭》
（由麻美杯生啤嚟到無幾耐，聚會就落幕，大家喺樓下互相道別，木部就搭住和也膊頭一同離開）
「和也，就咁由得女朋友同學一個真係好咩？快啲打個電話氹返人啦。」木部語重心長咁勸我，不過都係嗰句，我根本就唔知水原電話號碼，再加上木部根本就唔知我囉內原嘅真正關係。
「無所謂啦，反正只係過眼雲烟，唔好再理我啦。」我向木部慨嘆左一下就同佢分道揚鑣，其實我好明白，水原見我咁丟人現眼，睇唔過眼先開口幫我，不過根本就無需要維護我，因為我同水原只係契約上嘅同伴。
（和也自己一個意志消沉咁挨喺欄杆上面嘅時侯就有個人向和也搭訕）
「果然係一個人喺度頹。」我望一望邊個同我講嘢，原來係麻美，唔通佢一路都跟住我？定係我飲大咗，麻美應該唔會係呢度出現㗎。
「和也同學，你無事丫嘛？」麻美再開口問我，我就肯定無飲大到，於是我就同麻美散下步。
「你由得女朋友同學一個，唔揾佢真係無問題？」麻美首先開口問我，我懶係無咩咁答佢:「哈哈，無問題啵，要等佢好好冷靜下先得㗎。」
「和也同學識咗你一排依家先知你咁有男人味，頭先你唔怕激嬲女朋友拎要幫住我，我真係好開心。」麻美佢成個身靠埋嚟我度同我講，臉上展現出好仰慕我咁嘅樣，我都有喺面紅紅，唔知俾咩反應麻美好。
「其實我屋企就係附近，你洗唔洗上嚟休息下？」麻美佢用期待嘅眼神望住我講，但係我酒醉都有三分醒，我婉拒麻美：「但係麻美你有男朋友，都係唔係咁方便。」
「我係講大話㗎炸！因為和也同學你帶咗個咁可愛嘅女朋友嚟，所以有少少妒忌咁囉。」我聽到麻美咁講都有少少驚喜，為咗確認一下，我追問麻美：「姐係麻美你仲係單身？」
（麻美電話響起訊息鈴聲）
「呀！對唔住呀，我細佬話依家會帶朋友返屋企，所以你無得嚟啦。」麻美望完電話之後向我交代，我依家內心血淚交織，不過諗深一層，麻美應該係真心邀請我，唔通頭先叫停水原令麻美對我重燃愛火？
（諗到如火如荼嘅和也突然注視到一個正嘔吐嘅醉漢，然後有一股噁心感湧上和也嘅喉嚨，令和也不得不坐喺地下休息）
我真係廢，明明可以邀請麻美去飲第二場，唔係啵，無得去麻美度去我度咪得囉，所以我鼓起勇氣問麻美：「你要唔要去我屋企呀？」
（麻美對和也嘅請求吃咗一驚，然後微美住摸摸和也塊面）
「對唔住呀和也！」麻美請我食檸檬，唔通真係我諗多咗？呢一刻我覺得自己真係個狗公，係垃圾，麻美根本就無特別嘅意思，我就一個人糾結係現實嘅餘戀，甚至傷害咗水原，不過真係無辦法，我除咗可以係內心祈求，祈求麻美唔好討厭我之外，我無嘢可以做到。
（麻美安撫完和也之後就整理一下自己，準備離開）
「話說和也同學你同緊一個幾有趣嘅女仔拍拖。」麻美咁講係咩意思呢？我想開口問嘅時候麻美繼續講落去：「我以為女朋友同會一直老老實實，點知佢最後都發火，真係估佢唔到，老實講呀，我覺得女朋友同學其實幾難相處。」
「齋睇樣係唔錯嘅，不過內在就差緊啲啦。」我都未猜透麻美呢番話嘅用意，不過我好認真咁麻美講：「水原佢唔係無內涵嘅女仔。」
（和也認真凝視住麻美，令麻美感覺到有少少可怕，和也察覺到自己認真過頭，就揼低頭向麻美道歉）
「唔好意思，其實我仲係對麻美你念念不忘，不過唔知點解，麻美你講水原壞話，我個心就囉囉攣咁。」我唔敢面對麻美，我再對麻美講多次對唔住我就撐起身急步離開。
點解我會對麻美講啲咁嘅嘢，連我自己都諗唔通，今次一定會被麻美討厭，不過好不可思議，我一啲都無後悔，我依家只係好想見到水原，好想同水原道歉。
（一轉眼，和也就去到水原屋企，毫無猶豫咁㩒門鐘，可惜無人應門）
唔喺度？定係仲係好嬲？咁都係嘅，我有咁多無理嘅要求，又任意莽為，仲要當眾落佢面，俾著係我，我都唔會再想見到面。
（樓梯傳嚟高踭鞋嘅咯咯聲，然後水原就出現喺和也面前）
「水原！我…」我靜咗落嚟，因為我真係好慚愧，但係如果我唔道歉的話，可能再無機會道歉，所以我鼓起勇氣：「頭先…真係好對唔住，應該點解至好呢…」
「我無嬲你啵。」水原打斷咗我，我好驚訝，水原竟然話無嬲，我淨係識瞪大對眼望住水原，水原迴避我嘅視線繼續講：「一早就講咗，我係你Part-time GF，你想點利用我係你嘅事，你會珍惜前女友都好理所當然。」
我好感動水原咁明白事理，感動到都有少少眼濕濕，水原唔知係咪怕我會喊所以就轉話題：「然後呢？你哋和好咗未？」
「無…無和好到，我反而對麻美佢講咗啲討厭嘅說話，然後就跑返嚟，我真係一個完全嘅人渣，一直被無聊野迷戀牽住走，最後仲傷害咗唔關事嘅你。」講到呢度我再忍唔到我嘅淚水，我既內疚又感恩咁再對水原講：「好對唔住，水原！」
（和也向水原道歉完之後就坐喺地下抱頭痛哭）
「根本就唔無聊，無辦法輕易忘記嘅，係因為你認真看待過，比起一時三刻建立嘅關係當然重要得多。」水原嘅安慰令我收起淚水。
（水原痞低單手托住下巴望住和也）
「（租借）繼唔繼續落去？既然有寂寞到想死嘅夜晚，就用（再見）去回應（拜拜），如果你唔介意，我可以陪你。」水原彷彿就好似女神一樣降臨喺我面前，我真係好想上前擁抱佢。
（和也完全無考慮就雙手仲向水原，不過水原見勢色唔對就一腳伸開和也）
（想要忘記一件事有兩種方法，一種係等「時間」嚟風化，另一種就係等「新嘅珍愛」重新覆蓋）