出租女友: 《第十話 內心的坦言》

（和也由廚房彈出廳，驚訝又內疚咁面對木之下女士）

「嫲嫲！」我好慚愧咁叫咗嫲嫲一聲，嫲嫲就就繼續坐喺度對我講：「你估我真係癡呆到連孫仔嘅異常都察覺唔到咩？對於自甘墜落嘅你，千鶴公主應該已經無哂好感，你連真話都唔敢講，仲想蒙混過關，作為木之下家嘅繼承人，真係仲未成氣候。」

（和也完全無反駁木之下女士嘅餘地，因為木之下女士一句都無話錯和也）

「你唔會嬲咩？無論係對我定係對水原？」我反問嫲嫲，因為我感受唔到嫲嫲對我哋分手嘅事實上有任何怒氣。

「你由細到大，唯獨喺女仔面前就好唔受歡迎，就算係你帶返屋企玩嘅都只有男仔，我甚至懷疑過會鍾意你嘅女仔究竟會唔會出現。」
嫲嫲講吓講吓開始眼泛淚光，證明嫲嫲對我嘅戀情相當擔心。





「所以呀，對會鍾意我孫仔嘅女仔，我又點解會嬲呢。」雖然嫲嫲眼濕濕，但同時一提到水原，滿足嘅笑容又掛返係臉上。

（喺露台嘅水原一直都一句不漏咁聽住木之下女士對和也嘅說話，接下來嘅話更觸動水原嘅內心）

「我更加會想多謝千鶴公主，因為佢令我發咗一場美好嘅夢，就好似（天女大人）下凡眷顧我咁。」我聽到嫲嫲講到咁，我真係覺得自己係個白痴，水原呢啲咁高質嘅女仔點有可能同我拍拖，我仲一而再再而三咁求佢扮我女友，累歸根究底，水原千鶴係我人生中只係短暫停留。

為咗唔可以再傷害嫲嫲，我要好好向嫲嫲道歉：「對唔住，嫲嫲，我…」

（突然有人打開門入屋，和也同木之下女士都被眼前人深深吸引住）





「唔好意思呀！和也嫲嫲你幾好嗎，我煮咗少少嘢食，所以搞到咁夜。」水原呢一刻就好似煙花一樣咁耀眼。

（和也迅速上前迎接水原，震驚咁詢問水原點解會出現）

「水原？點解…點解你會喺度？」水原展現出親切嘅笑容回應：「和也，你講咩點解呀，今朝已經同你講過啦，為咗和也嫲嫲，無論如何我都會趕到㗎嘛。」

聽完水原咁講我就知道水原嘅女友模式開啟咗，所以水原應該唔係嚟講分手嘅事。

（和也剛放下心頭大石，木之下女士就一支箭咁衝去水原度，一手推開和也，扶住水原雙手）





「你終於都嚟啦千鶴寶貝，我一直都堅信你係會返嚟，我知千鶴寶貝喺唔會拋棄我哋和也㗎。」嫲嫲先係一臉如獲至寶咁對水原講嘢，轉過頭就一臉怨恨咁對我講：「和也，你個衰仔，你頭先要準備同我講咩呀吓？千鶴公主依家咪嚟咗囉。」

「都係下次先再講啦。」面對住咁複雜嘅情況，仲邊有可能繼續頭先個話題。

（木之下女士都無打算追問和也，只掛住不停向同水原尋安慰，而和也呢個時候就察覺到水原同樣怨恨咁望住自己，和也立即下跪對水原嗑頭，感謝水原嘅聖恩，希望水原可以留多一陣）

（過一陣子，和也通知左木之下和男嚟接木之下女士返醫院，和也都有幫忙送木之下女士上車，而水原就企係不遠處目送）

（當車駛離嘅時候，和也望向不遠處嘅水原，發覺水原神情空虛，好似沉思緊唔知咩咁，連和也送完木之下女士都唔發覺）

「水原諗咩諗到入哂神呢？」我自言自語，不過我總係感覺到水原個表情好似好寂寞咁，唔好亂估啦，行去水原度先啦。

（和也將一筆錢遞俾水原）





「俾你嘅。」不過水原無接，仲話：「算啦，到咗呢個時間，一早就唔可以上報俾事務所。」我當然知道啦，所以我就話：「唔係呀，呢啲錢係用嚟下星期租你嘅，你唔嚟都得㗎。」

我再遞啲錢俾水原，水原只係默默咁望住我，好似無打算接啲錢咁，正當我想放低手諗下點收科嘅時候，水原就話：「探病，你話過只係星期三，係咪？」我不以為然就答：「係呀。」

「就一個鐘頭，每個星期三都可以俾你租一個鐘頭。」我用好似中咗頭獎嘅表情望住水原，水原就擰歪塊面咁解釋：「我都唔想和也嫲嫲係出院之前咁操心，所以我絕對唔係為咗你先咁做，記得我係為咗你嫲嫲。」

「多謝你，水原。」無論係為咗嫲嫲定我都好，我都充心感激水原，水原終於都接過我啲錢，就咁樣水原就成為咗我嘅（女朋友）。

（不過和也並唔知危機將至，因為木之下和男因為木之下女士留低咗野而折返和也屋企，和也俾錢水原嘅過程俾木之下和男見到哂）