出租女友: 《十一話 難忘的前度》
（經過木之下女士吵吵鬧鬧嘅週末，和也又再次回歸返平淡嘅校園生活，不過平淡只係維持得兩日，今日和也去教室途中就一不留神就輕碰到一個人）
「呀，唔好意思。」唔覺意撞到人添，嗯？竟然係前女友七海麻美，麻美佢神色自如咁同我打招呼：「哈囉，小和。」
話時話，今次都係分手以嚟第一次同麻美講嘢，麻美就好似無咩咁，不過我就尷尷尬尬咁，題外話，其實麻美佢真係好可愛，眼大大，一副蛋臉，雖然無水原長長嘅秀髮，不過清爽嘅短髮都散發住清新嘅氣息。
「做咩眼甘甘咁望住我呀。」麻美嘅話將我拉返嚟現實，然後麻美禮貌咁對我笑一笑就同我道謝：「無咩事就再見啦。」
「要報警先得啦，有人一大朝早就喺度視姦前女友。」我身後傳嚟熟悉嘅聲音，係我老死木部芳秋，雖然俾木部講中咗，但我緊係死口唔認：「唔好亂講，我只係同麻美打個招呼。」
「計我話呢，麻美小姐真係一個好女仔，佢同你拍拖拍咗成一個月先同你分手，就真奇蹟呢㗎啦。」木部呢個死仔成日串我，我咪起眼勵住木部講：「咩意思先！」
木部繼續唔停口咁講：「你睇麻美小姐，人又高腳又靚，樣靚笑容甜，衣著打扮又有品味…」我大大聲打斷木部講落去：「有無人幫有報警呀，有人視姦呀。」
（喺呢個人來人往，學生們必經之路上，文學系市原就急急腳係和也同木部身旁經過）
「嗰種女仔就唔得啦，一啲品味都無，應該話係一啲存在感都無，不過對和也你嚟講算唔錯㗎啦。」木部好明顯就係講緊低調打扮嘅水原，不過為咗唔好同水原有太多瓜葛，我詐傻扮懵咁講：「你又講緊邊個呀？」
「總之你就將麻美小姐忘記咗佢啦，作為由小學就識你嘅老友嚟講，我無老點你㗎啦，麻美小姐對你講根本就係高嶺之花。」話木部係我老死真係一啲都無錯，知道我對麻美念念不忘。
（放學後，和也歸家小睡片刻，正所謂意有所極，夢亦同趣，和也同麻美嘅美好時光出現係和也夢中）
（突然傳來持續嘅門鐘聲，和也由美夢中驚醒，臉紅紅去開門）
「等等，嚟緊嚟緊。」我急急腳走去開門，點知一個人都見唔到，再望遠啲去樓梯口就見到水原，由於我個靈魂仲喺麻美度，見到化咗妝嘅水原都未仲諗點解佢要㩒我門鐘揾我。
「你仲喺度攪咩呀？夠鐘去醫院啦。」聽水原咁講一講，我當堂醒哂：「呀…原來以經咁晏。」
（和也隨便換件衫就同水原一齊出發）
「我哋下次都係約喺外面集合先再出發啦，始終喺你屋企門口等，都係唔係幾好咁。」明明就住係隔離，有咩話好唔好，水原仲係同平時一樣咁對我冷冷淡淡。
「不過相對嘅係，呢一個鐘頭你可以完完全全將我當成你嘅（女朋友）。」水原呢一秒仲係一本正經咁講，下一秒就露出甜美笑容咁對我講：「我哋出發啦咁，和也同學。」我望住水原個心都有少少溶化。
(探病時間其實好短，和也同水原轉眼就由醫院離開，木之下女士就依依不捨咁係五樓病房窗前再三叮囑水原下星期三再嚟）
「手…可唔可以以拖住？」水原真係專業，佢應該係想嫲嫲可以安心休息，唔洗再擔驚受怕我哋突然分手，話雖如此，作為只得一個月戀愛經驗，我戰戰兢兢仲手拖住水原嘅纖纖玉手。
（就算離開木之下女士視線範圍，水原似乎無放開手嘅打算，一如以往盛裝打扮嘅水原沿途都吸引到唔少人嘅目光）
其實每次都深刻感受到，同水原一齊行嘅時候，其他男人目光嘅可怕，不過又係嘅，好似水原咁高質嘅女仔真係唔易見，木部真係無講錯，我身邊嘅都係高嶺之花。
（一講曹操，曹操就到，木部就喺去聯誼途中撞見和也）
「和也！？」木部大聲叫住和也。
（和也一聽把聲就知係老死木部，情急之下一手就甩開水原）
「和也，真係你，你喺度做咩呀？」我仲係慌失失咁答木部：「無呀，我啱啱去完醫院探我嫲嫲之麻。」明顯木部根本就唔係真係關注我喺度做咩，而係一早就留意到我身邊嘅水原。
「和也，呢位小姐係？頭先好似見你哋拖住手。」木部一副覺得不可思議咁望實水原，唔通木部發現咗水原其實就係文學系嘅市原？
（喺和也仲擔心緊點向木部解釋嘅時候，木部就一手將和也拉離水原）
「好對唔住呀呢位小姐，呢條友呢係個白痴嚟，無咩見過世面，又仙都唔仙吓，如果你想推銷佢啲咩的話，麻煩你揾過第二個。」我完全唔明木部講緊咩，唔通佢以為水原喺嗰啲靠美色揾水魚嘅女人？
（其實水原都係聽到一頭霧水，木部轉個頭就對住和也說教）
「聽住啦，和也，你唔受女仔歡迎呢個事實我係好同情嘅，不過你仲咁後生，只要你唔揀擇，醜樣嘅都照受的話，女朋友要幾多有幾多啦。」有陣時真係頂唔順木部嘅說話，所以你燥燥地質問木部：「你講咩話？」
「放心啦兄弟，有我喺度，我唔俾受傷害㗎。」木部突然攬住我講，兩條麻甩佬係度攬頭攬頸，我一下就推開木部講：「完全唔係你諗咁樣呀！」
「咁係離家出走嘅未成年少女？定係同你失散多年嘅妹妹呀？」木部更加激動咁問我，我今次真係唔忍啦：「夠啦，聽我講，你咁樣對我女朋友講嘢，唔覺得失禮㗎咩？」
（以呢種方式登場，水原有啲始料不及，木部更加係難以置信咁望住水原，不過專業嘅水原好快就重新投入角色）
「你好，我叫水原，一睇你就知你係和也嘅好朋友，多謝你一直以來咁照顧和也。」我心虛咁望一望水原，估唔到水原會咁配合我，而木部都恭恭敬敬咁向水原道歉：「頭先真係失禮晒，女朋友同學，我叫木部，為咗謝罪，我一定要請兩位嚟一陣嘅聯誼飲返杯。」
（和也驚訝聯誼個屁，一心想拒絕木部，不過木部見和也有啲遲疑就使出一招激將法）
「女朋友同學應該係嗰種和也話去邊就去邊，唔會意見多多，對和也千依百順嘅賢妻良母型女仔，所以和也你去飲兩杯，女朋友同學應該都會去嘅，係咪？」木部姐係睇死我唔敢去㗎姐，豁出去啦：「反正只係食吓飯，吹吓水，去就去啦。」
（對於和也嘅亂嚟，專業嘅水原都有一下對和發出兇狠嘅目光）
（就係咁和也同水原就跟隨木部去到聯誼地點樓下，由於電梯有啲細，所以木部就廢事逼埋一齊，指示和也同水原先上去）
「好對唔住！」電梯一閂門我就先發制人向水原道歉，不過水原仍然破口大鬧：「你究竟想點呀？你仲想講幾多個大話先至收手呀？而且講好咗只係一個鐘頭。」
「加鐘嘅錢我會照計足，木部同我由小學就玩到依家，加上佢同嫲嫲都好熟，如果我哋表現得古古怪怪咁，木部懷疑我哋，查吓查吓知道真相，話唔埋就會傳返去嫲嫲耳邊，到時就…」我將我嘅苦衷如實話俾水原知，水原好似棋差一著咁插嘴：「到時就連我嫲嫲嗰邊都會穿煲。」
「就係咁，反正等嫲嫲好返晒出院我哋就會分手，就當俾我發多一陣夢啦。」我已經唔知第幾次懇求水原。
（水原逼於無奈答應和也，電梯門一開，木部已經殷切咁等候住和也同水原，幫佢哋帶路）
「各位久等啦，我叫埋和也嚟，而且和也嘅女朋友水原同學都一齊嚟埋。」木部一推開門就熱烈咁介紹我哋出場，不過我一眼就察覺到唔對路嘅地方，同時我老死木部都察覺到咁講：「弊傢伙啦！」
(其實聯誼活動嘅其中一位參與者就係和也嘅前女友七海麻美）