(輕鬆 | 校園) 只有一年回憶嘅高中生涯: 17章 - 畢業先嚟聚會

如果讀者喜歡此故事，希望你能正評+留言，或到penana點「喜歡」，謝謝你的支持！
 
https://www.penana.com/story/90093/輕鬆-校園-只有一年回憶嘅高中生涯
 
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
 
17章 - 畢業先嚟聚會
 
「喂！愛上番學嘅輝記喎！」一個唔多熟嘅同班同學過嚟搭訕。「中四嘅逃課小王子，今日連last day都嚟埋，真係要影相留念喎。」
 




「屌你啦。」我用年輕人嘅打招呼方式求其應。「喂，點解你哋會約嚟呢個球場嘅？」
 
同學A︰「屌，唔通真係跟指引︰喺屋企對住四面牆唱歌咩？不如一齊落街玩吓喇，還掂最後一日。而家嚟公園限制又少，學校係室內就話唔俾啫。」
 
同我哋諗嘅嘢一樣。
 
同學A︰「陳sir仲要遲到，如果唔係約人出嚟，下線就唔會再出現。咁你哋呢？」
 
書銘︰「基本上諗法一樣，本來諗住幾個玩埋一齊就算，結果咁多班都有人同我哋一樣思路，last day終於有番啲感覺。」
 




同學A︰「係唔著校服差咁啲囉，其他還好。」
 
講起套校服…真係唔會再有派上用場嘅機會，我哋所有人都係著便服。以前好期待便服日，因為便服日係全年唯一一日可以著便服喺同學面前出現；而家，我反而唔太記得同學著起校服係咩樣。
 
我︰「咁其他同學呢？唔趁呢個機會出嚟玩吓？」
 
同學B走咗過嚟一齊傾偈，都係呢三年好少見面嘅同學，一聚埋，竟然咁好傾。
 
同學B︰「佢哋去咗唔同運動場呀，邊度近咪去邊度。分流都好嘅，唔係幾班夾埋成百幾人喺一個運動場，而家係犯法。位位幾千都成廿幾三十萬，好過去搶。」
 




「喂！輝記！」同學C又走埋嚟。「你真係嚟咗喎！」
 
「佢哋話嚟吖嘛。」我指住皮蛋佢哋，試圖轉移視線。
 
「扮嘢？你老味我拆穿你！」書銘即刻嚟督爆我。「話俾你哋知，輝記第一個到呀！仲同皮蛋兩個人聽埋晒啲老餅歌。」
 
「正式上堂日子就走堂，而家私下約就第一個到。」同學C舉起姆指。「好嘢！」
 
關你鬼事！
 
同學A︰「陳sir未到，不如我哋出去影相喇！難得咁多人！真係好耐未試過咁多人聚埋一齊喇！」
 
順應場合，原來只有五個人嘅last day聚會，融入咗幾十人嘅集體球場聚會，如三年嚟見面唔多嘅嗰位同學所講︰呢種感覺真係好耐冇試過，我哋學校連PE堂都cut埋，上一次咁樣聚埋一齊玩，記憶中係中四停課之前嘅事。數一數，已經成兩年幾前嘅時間，可以用「回憶」呢個詞形容。
 
「企埋啲喇！」




 
肺炎期，所有人都戴住口罩；疫情放緩嘅而家，無阻我哋難捨難離嘅合照時間。即使相片映唔出笑容，V字手勢仍然係開心嘅佐證；少咗搭膊頭嘅合照，但係三年嚟最近嘅距離，好似代表咗︰其實我哋曾經喺同一班、同一間學校上過堂嘅友誼。都係一種證明嚟嘅，其實唔少面孔都係初中時候番學放學間唔中都見面，都有認識，雖然未必知道、記得個名。
 
影過好多張「蒙住面」嘅合照，突然覺得︰其實呢三年都唔係白白走過，我嘅高中三年，並唔係只有電腦。好彩有聽書銘佢哋講︰出嚟玩吓。
 
「喂皮蛋！你試吓玩Gwiyomi！」書銘要求皮蛋幫手助興。
 
皮蛋︰「吓？！我？！你傻咗呀？」
 
書銘︰「你玩吓喇，最多一陣我陪你玩！」
 
「嗱，你話架。」
 
──Gwi，gwi，gwi，yomi。
 




屌！皮蛋真係扮呀！好柒呀！幾十部機對住佢，點解仲有勇氣跟住扮！俾著我真係頂唔順！
 
同學D︰「呢位皮蛋同學真係好放。」
 
「阿同學，我叫Peter呀！」皮蛋又不憤人哋叫佢皮蛋。「喂書銘！到你！」
 
皮蛋望咗幾次周圍，搵唔到目標人物。
 
麗連︰「你俾人賣咗喎。」
 
「屌你個仆街仔…又話陪我玩！我扮完就閃人！」皮蛋低聲磨牙切齒。
 
佢想睇你柒咋嘛。
 
「sorry各位同學，遲咗少少。」Google meet間房終於見到陳sir。