(輕鬆 | 校園) 只有一年回憶嘅高中生涯: 16章 – 捉得住嘅尾巴
如果讀者喜歡此故事，希望你能正評+留言，或到penana點「喜歡」，謝謝你的支持！
https://www.penana.com/story/90093/輕鬆-校園-只有一年回憶嘅高中生涯
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
16章 – 捉得住嘅尾巴
──需跨多少個山，漫漫長路與海，方可真正覓到心裡精彩。
「…」
──需經多少次哀，幾多的障礙賽，才勝利會換來。
坐喺公園長凳，十足十著拖鞋去公園聽收音機嘅公園一族。我已經行得好慢，到咗之發現︰原來我係第一個到。
「死火，比兩個巴渣婆早到，陣間實有嘢聽。」
今日last day，約咗人出嚟玩，但係而家一個人都冇，超空虛。
──強人是你，能飛天遁地。
除咗鳥語花草、冇乜幾何曬到嘅太陽好似愈嚟愈熱，就剩番手邊嘅音樂一直播緊，重覆咗唔知幾多次。
唔係話隻歌特別好聽，只係覺得啲歌詞有啲意思。作為零零後，又變得唔太鐘意情歌嘅我，最近一聽就鐘意咗，好似盤古開天闢地嘅時候，已經有把聲同我講「加油！」一樣。
──強人是你，能頂天立地。
以前曾經成日聽情歌，而家覺得呢啲都唔錯吖，唔係咩？
「喂輝記，早到成咁？」突然出現嘅皮蛋拍我膊頭。
我︰「我坐咗喺度幾個字喇。」
「邊有人一落堂就出嚟架？hea吓先架嘛。」皮蛋講。「你做咩咁早出嚟呀？」
我︰「書銘又話咩『照計劃行動』，麗連又成日嘈last day點點點，我以為你哋會早到咪早啲出嚟，點知得我一個。」
皮蛋︰「唔緊要，我陪你等。」
兩個佬，單對單，坐喺配公園一角嘅長凳。每一陣春天微風，皮蛋陣酸醙體味都會吹咗啲過嚟。
好基…
──不知幾番跌倒，旁人斜視喝采，很不好過但我衝刺不改。
「嘩……呢首歌幾耐之前？」皮蛋聽到我播埋晒啲咁嘅歌，五官扭埋一舊。
我︰「冇『告別校園時』咁耐咪得。」
皮蛋︰「哈…告別校園時，首歌嘅出版年份可能做得我老豆。」
「屌，呢首歌一九九一年出，你老豆十二歲生你出嚟呀？」聽到皮蛋又九唔搭八，我一句板落去。
「咪係囉，皮蛋你可唔可以醒少少？畢業都仲係戇尻尻咁。」
「都話我叫Peter咯！」皮蛋又九唔搭八。
早就冇再著過校服嘅我哋，係一如以往嘅便服。所謂牛津嘅last day竟然得咁嘅排場，真係笑出聲。
「書銘你條友！」我向住聲源大叫。「咁遲！」
書銘︰「唔通一早嚟踎咩？」
「輝記咪咁囉。」皮蛋即刻指住我打小報告。
輝記︰「我冇輝記而家咁鐘意番學吖嘛。」
我︰「無－聊。」
「『無－聊』！」書銘用乸型聲重覆我講嘅嘢。「咁係咪啫？皮蛋講得啱唔啱啫？」佢箍住我條頸。
我︰「屌，我好似俾你條友昆咗咁，講到自己會早到，結果得我一個到咗。」
書銘︰「即係好掛住番學喇，陣間又話俾陳sir知！」
「屌你收皮喇。」我一巴車埋去。
「手里劍！」
「我擋！」我擋住書銘飛過嚟嘅汽水蓋。「太弱喇垃圾。」
「再嚟手里劍！」
今次我避開咗，書銘嘅汽蓋飛咗去我後面。
「你飛到我呀！」光秀呢句同當年嘅「忍界大戰」受害者一樣。
「I am sorly。俾番個蓋我，我幫你飛死輝記。」書銘扮道歉。
「唔理你哋。」喺光秀旁邊嘅麗連拎咗部平板機出嚟。「係咪差唔多時間喇？」
「未呀，等吓先喇，其他人都未上線，阿sir又未到。」我對住平板電腦嘅Google meet介面講。「我喺度諗︰陣間所謂last day會唔會得我入去同陳sir傾偈呢？」
光秀︰「唔會喇，至少有我哋陪。」
麗連︰「係囉，我哋都係想一齊玩吓所以先約咋嘛！」
其他人都一齊拎咗部平板電腦出嚟，同我一齊入咗Google meet本來得我一個嘅房。
成件事冇咩氣氛、感覺，我覺得似我哋五個玩咗六年嘅朋友，用「last day」做主題出嚟玩吓咁。咁樣就為中學人生畫上句號？可以嘅話，真係想做多少少。
我︰「其實我見你哋出，我先出，唔係因為last day。」
「輝記唔認喇，明明好想番學！係咪有一個詞形容呢個行為？」麗連望向皮蛋要求支援。
皮蛋︰「你想講︰『傲嬌』？」
果然皮蛋好熟呢啲嘢，一講就記得。
「你哋係咪傻架？俾著你哋，得自己一個仲會唔會出？咩day都唔出喇，都冇味道。」
麗連︰「算你喇輝記，記得我哋。」
「不過得五個又真係…」書銘望住公園圍欄外面行緊嘅幾個人，講講吓嘢停咗。
皮蛋︰「咦，咁熟口面嘅？」
「佢哋係隔離班架！」搵到心有靈犀嘅同學，麗連有少許興奮。
唔通…
我哋五個人望住佢哋幾個帶住口罩兜過公園圍欄入嚟球場，一知道我哋幾個隔離班嘅同學一早到咗，就對望點咗吓頭。話唔定，口罩入面都係情不自禁嘅微笑，只係遮起咗，先俾人一種冷淡嘅感覺。
「喂，唔止隔離班，同班嘅人好似都有。」光秀指住求先嘅方面講。
嘩…竟然有咁發展，睇嚟今日last day幾得意喎。