(輕鬆 | 校園) 只有一年回憶嘅高中生涯: 18章 - 一天一天的我在期待放學

如果讀者喜歡此故事，希望你能正評+留言，或到penana點「喜歡」，謝謝你的支持！
 
https://www.penana.com/story/90093/輕鬆-校園-只有一年回憶嘅高中生涯
 
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
 
18章 - 一天一天的我在期待放學
 
「阿sir，你遲咗好多呀。」
 




陳sir︰「早過胡耀輝咪…咦？！」
 
陳sir見到我一早喺間房入面，驚訝到叫咗出聲。
 
「胡耀輝早到喎。」陳sir驚訝失色。
 
我︰「阿sir，得你遲到，我哋所有人都準時呀。」
 
陳sir︰「原來傳聞胡耀輝愛上番學係真。哈哈哈。」
 




挑！搵我過橋！
 
陳sir︰「各位同學，咁last day嘅環節就開始喇。」
 
喺認真唔到嘅地方，同班同學都有啲唔合場地嘅嚴肅。
 
陳sir︰「雖然三年嘅高中生活冇咩點上過堂，但係我見證住各位三年嘅成長，唔少同學可以喺逆境中進步，真係難得；仲有同學喺疫情來襲先愛上番學，我諗呢個困難都俾到啲意義你哋嘅。」
 
又搵我過橋！我唔鐘意番學架，得未！
 




陳sir︰「今日之後，我就唔再係你哋班主任，你哋都唔再係牛津嘅學生，已經唔洗再上堂，但係DSE考試上有咩唔識、想搵支援，歡迎搵我哋。」
 
道別，先有啲唔捨得。原來今日就係中學嘅最後一日。人生總係離離合合嘅，唔想習慣都要習慣。
 
「嘩，今日咁難得，齊人喎。」陳sir數完出席人數之後講。「幾耐未試過齊人？可唔可以趁住咁齊人，嚟一次落堂敬禮呀？嚟！一！二！三！」
 
「陳老師再見……多謝陳老師教導……」
 
「要有呢種拖長句尾嘅音先似落堂敬禮。」陳sir品鑑。「話時話，點解有重音嘅？係咪我個喇叭嘅問題？」
 
唔係呀，有重音係正常。
 
陳sir︰「你哋唔會約埋出嚟掛？」
 
「係呀阿sir，俾你估中咗，好多人都約埋出嚟呀，你睇吓，我哋見到隔離班添呀。」書銘邊講邊影出去球場上面嘅隔離班同學。




 
「嘩，咁都得？！」陳sir睇到眼都突埋。「學校唔想你哋番嚟，你哋自己組隊？」
 
麗連︰「學校係室內，而家喺學校聚集就話犯法，室外唔係咁計喎。」
 
「…」陳老師冇嘢好講，因為我哋係跟住防疫指引聚集。
 
我哋又有戴口罩，可以罰我哋咩呀？
 
陳sir︰「你哋要保持距離喎，唔係臨考試先嚟病就難搞。」
 
光秀︰「我哋有保持一米距離架。」
 
「哦，咁…應該冇問題。」唔想揹鑊嘅陳sir諗咗兩秒。「咁今日last day，雖然有啲可惜，冇得影相。」
 




「唔係呀，我哋會影相架！」一位同學講。
 
「你哋影得開心啲，小心距離吖吓，我就影唔到。」陳老師好似想快啲完咗成個last day咁，講嘢節奏加快。「咁開心，不如唱吓歌喇？」
 
個安排都寫到明有唱歌。
 
「又係嗰啲歌，唱足幾十年。」皮蛋細細聲講，後面大大聲笑。
 
「Peter，我聽到你講乜架。」陳sir邊整音樂，邊強調自己有順風耳。「各位同學仔，呢次係你哋人生最後一次唱咁老套嘅畢業歌，人生唔會再有機會架喇。」
 
某同學︰「吓？我哋仲有大專大學，至少會畢多次業喇。」
 
「就咁嘅，大專大學畢業人人時間唔同，而且未必有而家咁青春︰一班同學聚埋一齊唱歌，可能都係切燒豬、射香檳就完。」陳sir好似講緊自己嘅讀書人生咁，有少少感慨。「小學畢業，會唱；中學畢業，會唱。但係人生唔會唱第三次，所以如無意外，今次係你哋嘅最後喇。」
 
「最後」…今日講到呢兩個字，唔知點解就有種哀愁，瀰漫喺每個同學嘅笑臉上面。




 
陳sir︰「唱吓拎個回憶都好呀，各位親愛嘅畢業班同學仔。」
 
「喂輝記，點呀？唱唔唱呀？」書銘用手肘頂咗我兩下。「雖然喺球場唱老歌有啲柒。」
 
我抬頭望藍天，十八年如一嘅感覺。不知不覺，原來我要離開中學人生，距離出茅廬嘅日子又拉近咗一段距離。
 
常言道︰走過先可以回味。咁冇經歷，真係回味唔到。理應有自己嘅時候，就鬥氣缺席。何不完整走一遍，由前菜食到甜品？
 
我望住老掉牙嘅歌詞，有啲尷尬。望吓其他人，佢哋又好似好期待咁，各就位，等音樂響起，就開口唱幾首因為畢業而變得有意思嘅歌。
 
過去五年，我覺得呢啲歌好無聊，因為總係覺得呢一日離我好遠；但係當自己成為主角，無奈又唏噓︰終於到我唱呢幾首歌喇！
 
我︰「唱，點解唔唱？一個人唱，係柒；一班人有自信咁唱，柒到盡頭就係型！」
 




書銘︰「果然輝記愛上番學！」
 
「音樂搞掂咗，各位同學仔準備，一，二，三。」
 
──記得當天一起唱著告別校園時，那些愉快動人琴聲仍像奏到面前……
 
 
(完)