(輕鬆 | 校園) 只有一年回憶嘅高中生涯: 15章 - 下課

如果讀者喜歡此故事，希望你能正評+留言，或到penana點「喜歡」，謝謝你的支持！
 
https://www.penana.com/story/90093/輕鬆-校園-只有一年回憶嘅高中生涯
 
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
 
15章 - 下課
 
「各位同學，點呀，今日最後一日上堂。」張sir喺Google meet對住一堆Profile picture講，唔少仲要冇樣，得一個中、英文字。
 




「…」一如以往，冇咩人應。
 
其實都唔知有幾多人瞓咗，仲話咩last day。
 
「阿sir，我未準備好考試呀，可唔可以唔考呀？」呢把係麗連把聲。
 
張sir︰「大家有個幾月時間準備，實得嘅。」
 
麗連︰「完全未ready入去考場，都唔知點考。」
 




張sir︰「你並唔獨單，公平嘅，我哋冇得番學，其他人都冇得番學，所以做好自己就得喇。」
 
咁…都係嘅。呢幾屆中學生都係一齊過有缺陷嘅中學生活，冇偏心，好公平。
 
張sir︰「不過佢哋冇last day，我哋牛頭角政府津貼書院有。」
 
屌，講呢啲？
 
麗連︰「唔係吖嘛？咁都叫有？阿sir你有冇睇今日流程呀？相都冇得影呀！」
 




隔住個電腦點影呀？
 
張sir︰「而家情況，其實好多學校都取消咗冇搞到。雖然我哋牛津今屆嘅last day 係短啲，上年係冇架。」
 
我都唔明而家咁樣同冇last day有咩分別。
 
張sir︰「陣間你哋開相機開咪傾吓計喇，過咗今日，你哋未必有機會再見面傾計架喇，講緊放榜日都唔洗番嚟，呢個係你哋最後機會呀。」
 
「聽唔聽到呀輝記！」突然有一把我認唔出嘅聲，一嚟就叫我個名。
 
我︰「邊個？」
 
張sir︰「係喎，胡耀輝，我有睇你個wall呀，我見你呢期日日都有上堂，以前明明唔係咁。」
 
我︰「咁我都要考DSE架嘛。」




 
張sir︰「咁陣間唔好走喇，你哋同班主任阿陳sir傾吓偈喇，今日之後，佢都唔可以再用班主任身份同你哋講嘢。留低唱吓歌吖。」
 
講到我好大架子咁。
 
我︰「哦。」
 
「最後幾個月先愛上番學嘅輝記會留到散場架。」書銘大聲亂入。
 
我︰「收皮喇。」
 
「各位同學，咁今日最後一日嘅bio堂就完喇。」張sir對住冰冷嘅屏螢唱獨腳戲咁樣，又冇人應、冇人理，但係依然一個人繼續講。「好高興做你咗你哋三年bio阿sir，我永遠記得對住Google meet做Lab俾你哋睇呀。」
 
騎呢到不可思議。
 




張sir︰「如果真係不幸見到實驗題，希望你會記得我講過嘅嘢呀。有問題嘅話歡迎聯絡我，或者約時間問問題都得。DSE加油。」
 
「阿sir！」我睇住阿sir好冇癮咁自己講完，冇咩感動，準備閂相機走人嘅時候，光秀突然開咗鏡頭揮手講嘢。「拜拜！」
 
張sir︰「好似得你一個聽緊咁，多謝你呀。」
 
真係慘，Google meet上堂好似賣唱咁，有學生聽書要多謝佢架，成件事幾神奇。以前面授課唔聽書嘅話明明會俾人敲枱、開咪問咩事。
 
張sir閂咗相機，Google meet課堂無聲地冇咗幾個人。下線。只係剩番十幾個呢排見慣嘅學生。反正記出席率都冇用，喺屋企簽到，我喺張床上面都得喇。
 
所有嘢都變得好馬虎，如果唔係同麗連佢哋一早講好咗，我諗…我都會直接下線唔再入嚟。
 
「喂，書銘，咁而家點呀？」喺我哋五人組嘅群組，皮蛋問。
 
書銘︰「咁點？照計劃行動囉。」




 
個計劃…對阿sir嚟講，可能又驚又喜；對我哋嚟講，係純粹驚喜。書銘竟然諗到啲咁嘅計劃出嚟，都好嘅，所有嘢都喺規則之內。至少…
 
「有番啲氣氛，唔會咁悶囉。」