(輕鬆 | 校園) 只有一年回憶嘅高中生涯: 14章 – 完結永遠都係突如其來

如果讀者喜歡此故事，希望你能正評+留言，或到penana點「喜歡」，謝謝你的支持！
 
https://www.penana.com/story/90093/輕鬆-校園-只有一年回憶嘅高中生涯
 
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
 
14章 – 完結永遠都係突如其來
 
距離學生證上面嘅有效日期只係剩幾個月，但係畢業班已經要離開學校，話唔定，真係唔會再番嚟。
 




相信唔會有學生鐘意考試，因為溫書，係痛苦嘅；面對分數，係殘酷嘅。但係我哋呢屆中六，竟然有唔少學生想番學考模擬試，當然唔係因為單純想考試啦，而係我哋一直冇考試嘅氣氛，想趁住正式DSE前唯一一次機會，番學校拎少少現場感覺先上路。
 
事前，搣時阿sir都大派定心丸，同我哋講已經安排好考場呢樣嗰樣，但係開考之前冇耐，香港又有第N波爆發，據說係因為有個打過針嘅人冇補打增強劑但係除咗口罩所致。全香港嘅防疫措施又收緊，學校作為人流密集嘅地方當然冇得幸免。
 
期待已久嘅考試氣氛，結果又係Google meet操卷，日校搞到勁似補習社，分別係影片裡面唔係咩補習天王，而係成日講「我聽日答番你」、著衫又頹嘅搣時阿sir。
 
四季同我哋講︰春未正是考試之時。然而我哋班冇咩人準備好，我哋係未ready嘅DSE考生，亦係未ready畢業嘅畢業生。
 
咁未ready，有冇得唔考住呢？
 




二、三月梗係可以唔考住啦，而家係培養考試感覺嘅時間，即使冇咩土壤去培養呢種感覺。
 
「咁last day點算？」呢個係麗連日日都問嘅問題。
 
睇嚟真係如皮蛋把臭口講︰last day其實一早就完咗，只係我哋唔肯承認事實…
 
正當所有人都打定輸數嘅時候，轉機竟然出現。
 
喺原本模擬試嘅尾聲，香港嘅新增確診人數大幅下降，由原本嘅近百，跌到得番唔夠十，政府放寬防疫措施。
 




「咁即係可以番學？」好多人都問咗呢個有啲唔自然嘅問題。
 
「唔得。」呢個係學校嘅答案。
 
「咁放寬啲乜？」
 
只係冇最嚴時候咁多限制，但係學校始終唔敢安排面授課，怕奶嘢，呢個係好多學校嘅心態。
 
學校咁怕奶嘢，即係冇last day啦！果然皮蛋係啱。
 
係嘅，冇得番學校last day。果然我哋中四已經畢咗業，唔會再面對面見到同學喇！
 
又唔係。
 
吓？即係點呀？冇得番學校，但係又可以見同學？Google meet？




 
冇有錯，係Google meet。
 
日日都用架喇，冇啲新意。
 
咁用Google meet做Last day又試過未？
 
結果我哋學校真係用Google meet搞咗次Last day，叫做同我哋餞行，考DSE前最後一個同同學嘅回憶。
 
唉…最後嘅回憶竟然都係Google meet，真係慘情。
 
班主任陳sir喺某日嘅「兩點鐘阿sir」環節講︰「搞緊last day，用Google meet嘅last day。」
 
聽完真係又嬲又開心，點解成件事可以咁九唔搭八？番學校就叫「有last day」，留屋企就叫「冇last day」，咁喺屋企last day係咩概念？我諗成件事真係幾「特別」。
 




「輝記，咁你去唔去last day呀？」書銘八卦問我會唔會參加。
 
「有幾九唔搭八你都唔係唔知架喇！你睇吓個安排，邊叫「day」？好似一個環節咁，完全唔知想點！」我有少少發侮氣。
 
「其實我都覺得好怪。」之前好興奮雀嘅麗連，知道最後安排之後成個人冷靜好多。
 
「咁你去唔去呀？之前你咁恨去，而家搞last day喎。」皮蛋講嘢有骨咁。
 
麗連︰「名啫，咪去囉，反正都要上堂。」
 
光秀︰「不過真係好奇怪，學校last day，竟然喺屋企過都有。」
 
「總會有嘢玩嘅。」書銘講咗句有頭冇尾嘅說話。
 
我︰「你有好橋？」




 
書銘︰「我諗都叫『橋』嘅，學校唔俾我哋番學校，要我哋對住部電腦過last day吖嘛，我哋遵守規則咪得。」
 
我︰「即係點呀？」
 
書銘︰「即係呢……」