(輕鬆 | 校園) 只有一年回憶嘅高中生涯: 13章 - 新一代回憶 (二)
如果讀者喜歡此故事，希望你能正評+留言，或到penana點「喜歡」，謝謝你的支持！
https://www.penana.com/story/90093/輕鬆-校園-只有一年回憶嘅高中生涯
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
13章 - 新一代回憶 (二)
皮蛋︰「唔洗做lab，實驗評核取消咗，變晒考試。阿sir試過幾次放實驗片出嚟俾我哋睇，同上網睇教學冇咩分別。都唔係自己做，邊記得。」
家姐︰「咁讀完三年理科，咪試管嗰啲都未用過？」
書銘︰「中四用過兩次，之後冇掂過。」
講起都心傷，讀理科讀到冇入過lab咁滯。
皮蛋︰「我連試管係咩樣都唔係好記得。」
唉…咁樣就中學畢業。
「中六差唔多完，記得去last day呀。」家姐溫馨提醒。
同麗連一樣，又係講last day。
我︰「個個都講last day，last day有乜咁特別？」
「特別在︰人生得中學last day係會特登拎嚟玩。」家姐好似回憶起幾年前嘅事跡咁，雙眼轉咗幾個圈。「小學last day唔會玩；大學last day又人人唔同，得中學係所有人同一時間。中六人又成熟啲，可以玩到好喪。last day係最最最自由架，成間學校係中六人嘅遊樂場。」
last day…
「平時唔番學都好，last day要番去呀。」家姐語重心長咁講。
皮蛋︰「點解呢？」
家姐︰「last day係中學嘅終點，中學人生最特別嘅一日，一生人只有一次，過咗就冇架喇。」
「一生人只有一次」…雖然可以問︰「有幾多嘢，喺人生係有第二次？」但係中學人生嘅最後一日，又真係得一次咁大罷。
「你哋睇吓阿輝。」書銘突然指住我。「佢諗嘢諗到出晒神。」
我︰「收聲喇。」
「番去影吓相，記住嗰一日喇。」家姐打算企喺身。「中學總會有完嘅一日。相，影完都未必會睇，但係佢係嗰日嘅紀念，回憶係一世嘅。」
書銘︰「阿輝家姐，你當年影咗咩奇怪相呀？」
家姐︰「多嚕。咁多年都好鐘意嘅學one piece舉手影背脊、扮龍珠合體、學最尷尬嘅MV姿勢，仲有我嗰個年代好興玩Gwiyomi (註︰可愛頌)，唔知你哋仲興唔興。」
我︰「咩嚟架？無啦啦講句英文唔似英文嘅嘢？」
家姐︰「好無聊架，你上網搵吓。我哋嗰時要啲男仔扮，好好笑。」
書銘搵咗條片出嚟，我哋睇到眼都突埋。
「嘩，唔係掛，要男人做呢啲動作？係咪Gay味濃咗啲呢？」皮蛋好似唔係幾接受到有男仔模仿片段裡面嘅女性化動作。
家姐︰「一定要男仔扮，唔係唔好笑。」
「係囉，你哋諗吓︰牛高馬大嘅阿輝扮可愛、做呢啲動作嘅樣，都咪話唔…『可愛』。」書銘打量我嘅身型笑住講。
你條友，求先一定想講個「柒」字！
家姐︰「除咗呢啲…仲有借位相囉，千手觀音、人體幾何嗰啲，要玩可以玩足一日。」
「人體幾何」…係咩痴線嘢？
家姐︰「吖，有個一定要試吓︰扮名畫，呢個好玩。」
我︰「有冇例子？」
家姐︰「大把喇，一定有同最易扮嘅『吶喊』、搵一堆人抱住一個人扮『創世紀』，最好玩一定係『蒙羅麗莎的微笑』！」
書銘︰「『蒙羅麗莎的微笑』唔係有個人對住鏡頭笑咩？有咩特別？」
「特別在模特兒一定做唔好，佢會不停對住鏡頭傻笑，影出嚟又似癲佬，拍埋影片仲好。」家姐講到七情上面，睇嚟已經陶醉喺當年嘅瘋狂同低能。「幾年後放出嚟睇，呢啲先係最好嘅回憶！」
「但係呢…我哋應該影唔到『蒙羅麗莎的微笑』。」書銘有啲口疾。「就算我哋真係有last day玩，應該都要帶口罩番學，仲點影微笑？」
幻想嘅last day係一齊狂歡、一齊低能，但係現實係即使番到去，我哋連行近少少都未必得。
「係囉…」皮蛋都開始有啲sad。「室內唔可以聚集，我哋好耐冇去過學校集會喇！室內聚集犯法，除口罩再犯多次法，點玩『蒙羅麗莎的微笑』？」
「咁…」家姐好似幫我哋諗緊解決方法。
書銘︰「我哋都好想影，但係而家肺炎期，要影唔帶口罩影相真係唔易。」
「如果真係想影，可以咁。」家姐好似有橋。「去室外影，室外聚集限制比較細，咁可以親密少少。」
「咁…阿輝家姐嘅建議都唔錯嘅。」書銘諗咗陣講。「又真係合法，學校冇鑊揹應該都吹我哋唔漲。希望我哋有last day啦。」
「有嘅話真係要番去呀，寧願對卷日走堂都唔好last day走堂呀。」家姐終於企喺身。「你哋慢慢喇，我出去啦。」
咔嚓。
分享完幾年前和平世界嘅last day，家姐帶住口罩出街，屋企嘅廳剩番我哋三個佬，六目交投，一時唔知講咩好。
「點吖？我家姐點吖？」見完佢哋想見嘅人，我問皮蛋同書銘嘅感想。
「唔錯。」書銘點咗幾下頭。「人品唔錯。」
「輝記家姐都講得啱，last day對中學生真係別具意義，對我哋…可能係唯一剩低嘅聚會機會。我哋一定冇謝師宴，考完DSE嘅畢業活動都唔覺得有，放榜日都係message通知算數，即係未必再有機會見面架喇。」皮蛋語調有啲難捨難離，即使字裡行間唔多覺。「如果中四真係last day，其實我哋真係畢咗業，唔會再番學校。」
「睇吓模擬試嗰期點先喇。」心存少少希望咁，我講。「話唔定番到呢？」
「至怕番幾日又停課，考考吓模擬試先停，邊有心機考？邊有氣氛last day？」皮蛋好似同last day有仇咁，凡事都諗到最壞。
「咦，輝記考試先嚟番學呀？你想番學？」書銘捉住我有少少想番學嘅心情。
「咁…咁耐冇番去，畢業之前有機會咪番囉。」我有少少難為情。
對面兩個賤人聽完我講嘢，即刻奸笑。
「即係認咗啦，輝記原來想番學。」書銘俾第一腳。
「逃課小王子胡耀輝而家想番學，話俾老師知！」皮蛋俾第二腳。
「話俾老師知」…你仲細咩…
「番到先算啦。」
Last day，之前又有模擬試，究竟仲有冇機會番學校？定還是如皮蛋把臭口所講，我哋一早已經畢咗業？