(輕鬆 | 校園) 只有一年回憶嘅高中生涯: 12章 - 新一代回憶 (一)

如果讀者喜歡此故事，希望你能正評+留言，或到penana點「喜歡」，謝謝你的支持！
 
https://www.penana.com/story/90093/輕鬆-校園-只有一年回憶嘅高中生涯
 
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
 
12章 - 新一代回憶 (一)
 
「三位，差唔多喇，啲題目都開始重覆緊，接住要自己努力喇。」家姐掀手上份卷講。
 




書銘︰「唔該阿輝家姐，真係幫我哋慳好多時間。」
 
呢條友真係好做作。
 
「我好想講一句嘢好耐架喇！」皮蛋突然眼睛一亮。
 
唔係衝擊的告白吖嘛？咁嘅開頭，我好驚喎。
 
「多謝胡老師教導！」皮蛋坐住鞠躬。
 




嘩，竟然係呢句，呢句嘢真係好耐冇講過。
 
「我唔係你哋老師呀，你會唔會同補習老師咁講？」家姐收好支原子筆。
 
皮蛋︰「唔會，但係真係好想講！仲讀緊中學，但係勁耐冇講過呢句！」
 
我︰「多謝胡老師教導。」
 
我跟住皮蛋講同一句台詞，但係賤笑、點咗幾吓頭，家姐又掘住我。
 




「兩位同學仔，唔洗同我講多謝，你哋嘅阿輝同學會幫你哋還，同佢講多謝得喇。」
 
痴線架？！點解要我一個人還三份債？！
 
我同對面兩個變態佬交換咗一個眼神。
 
「…」
 
「…」
 
對面好似講緊…「我真係好羨慕！」痴線架！
 
「三位，我其實有啲興趣，你哋呢三年點讀書架？」家姐望住枱面我哋睇筆記嘅平板電腦講。「真係好難想像而家啲中學番到好似大學咁，筆記係一本本架嘛，點會係一個個電腦File？番工吖？」
 
我︰「我日日喺廳上堂，你唔知咩？」




 
家姐︰「挑！鬼知你咩！你上堂時我番工，會唔會係知道晒吖？」
 
呢條友，對外人特別溫柔。
 
「阿輝家姐，你有所不知喇。」書銘摔卷。「以前我哋真係睇實體筆記、用原子筆寫字架。」
 
「而家變晒做一個個file，上堂係鬥快打字。」皮蛋補充。
 
家姐︰「咁樣叫番學？我哋都仲話對住電腦筆記去課室上堂，你哋係對住Google meet喺屋企上堂。」
 
「所以咪入唔到腦，所以咪左耳入右耳出囉。」書銘毫不羞恥咁講。「明明聽完嗰一吓都識架，但係轉個頭就唔記得。」
 
家姐︰「會架咩？」
 




書銘︰「真係會，唔知關唔關氣氛事，喺屋企太舒服喇，冇咗種緊張感，轉個頭又可以玩、可以瞓，邊有考DSE嘅感覺。」
 
皮蛋︰「同埋我哋覺得中學時代失去太多。」
 
皮蛋又學埋晒麗連啲嘢。
 
家姐︰「咁你哋識幾多同學吖？」
 
皮蛋︰「咪阿輝，仲有幾個中一開始識嘅同學，中四番得幾個月就成日停課，識鬼咩。」
 
家姐︰「咁其他人點算？中學唔適吓人，大個咗就冇呢啲咁純粹嘅機會。」
 
書銘︰「所以…我覺得我哋多少有啲幸運，有幾個由中一就識嘅圈子，其他人真係唔知點算，可能中四冇朋友，到中六都冇朋友。」
 
家姐︰「咁好影響社交能力喎，讀書係重要，但係學同人相處都重要架嘛。」




 
呢啲說話平時又唔見同我講吓！
 
皮蛋︰「阿輝家姐，你當年畢業年有咩活動呀？」
 
家姐︰「當年吖？多嚕。環校舞獅、水塔影相、扯旗接力…」
 
「吓？『扯旗接力』？」皮蛋好奇。
 
咩嚟架？未聽家姐講過嘅？
 
「『扯住班旗去跑接力賽』，係九唔搭八嘅八乘一百，只係俾畢業班玩嘅，等啲人有個好回憶。」
 
嚇死，以為係咩嚟。
 




家姐︰「你哋應該冇晒運動會架喇？」
 
我︰「有鬼，堂都唔知有冇得上，仲點運動會？」
 
家姐︰「成個中六咪冇嘢記得？聖誕聯歡、旅行、乜乜班際嗰啲。」
 
書銘︰「咪記得讀書囉。」
 
家姐︰「其他呢？」
 
「…」「…」「…」
 
我哋三個都靜咗。
 
有乜嘢慘得過︰回望，先發現自己原來冇走過？
 
家姐︰「咁做lab點算呀？你哋理科架喎？」
 
呢個問題問得好。