(輕鬆 | 校園) 只有一年回憶嘅高中生涯: 8章 - last day係咪一早完咗？
如果讀者喜歡此故事，希望你能正評+留言，或到penana點「喜歡」，謝謝你的支持！
https://www.penana.com/story/90093/輕鬆-校園-只有一年回憶嘅高中生涯
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
http://8章 - last day係咪一早完咗？
我︰「咩被選中嘅細路呀？你中學喇。」
而家又係冬天，都唔係八月一日。
皮蛋︰「光秀嘅意思係︰所有嘢都巧合得出奇。你諗番吓，我哋出世嗰年發生咩事？」
我︰「咩事呀？鋼鍊第一部呀？」
「你竟然諗到呢個。」書銘同其他人有啲意外咁望住我。
「你個撚樣真係，屌你都廢事。」皮蛋側目。「又係肺炎呀！」
咦？係喎？唔講唔記得。
皮蛋︰「結果又係肺炎搞到我哋人生冇咗啲嘢，唔覺得成件事巧合到令人懷疑咩？」
我︰「『懷疑』？懷疑咩？」
書銘︰「懷疑…懷疑係咪我哋帶肺炎嚟…」
我︰「痴撚線，關我哋尻事咩！」
唔好當生草藥噏得就噏！
書銘︰「有人話起源唔係佢哋，所以有呢個講法。」
屌，原來係佢哋…
麗連︰「唔FF呢啲吖，我覺得下一年嘅師弟妹同我哋應該差唔多，佢哋比我哋仲衰，連中四都冇埋。」
光秀︰「嘩，咁仲叫中學？中三尾揀完科，中四到中六連同學都未記得晒就畢業，分分鐘見樓下看更仲見得耐過啲同學，咁都叫讀過中學吖？」
「唔講年份，仲以為我哋走晒所有堂去考DSE。」書銘苦笑。
「有能力走晒堂又過到DSE又唔同吖。」麗連望去微微擺舞嘅樹枝。「你哋睇吓，而家感覺幾似暑假，係感覺到冬風嘅暑假。」
皮蛋︰「所以話我哋一早已經畢咗業。」
「皮蛋！」麗連掘住皮蛋。
「做咩喎…」皮蛋淆底。「我都係講事實啫。」
「輝記冇晒型嘅機會先喇，你有冇咩感覺呀？」光秀提起我。
我︰「關我咩事？」
光秀︰「以前一講到班際比賽，就會諗起你。力大、速度快，年年運動會個人總成績頭三都有你個名，而家所有運動比賽冇晒，你唔覺得可惜、冇任何嘢想講咩？」
光秀講到我要喊晒口咁，我作為當事人又冇乜嘢，反而…
「喂，問你喎。」
旁觀嘅佢哋比我更著緊︰咬牙切齒、眼甘甘、嘴郁郁，好戥我唔抵咁。
我又冇咩感覺嘅，反而輕鬆咗。算啦，都係配合做吓樣好啲。
麗連︰「輝記，一畢業就未必再有架喇。」
我︰「而家想有都唔得啦！大多數地方都唔俾聚集，莫講話運動會，番學都成問題喇；畢咗業又唔睇運動會成績，拎過四年獎杯又點？唔通將來面試同人講︰『我跑得好撚快、推鉛球推得好撚遠架』咁樣咩？」
光秀︰「都係嘅。我哋係想講︰間唔中抽一日出嚟fing吓咁，對個人成長都有幫助。有用好，冇用都好，以前啲人有得揀去定唔去，但係我哋一定冇得去，好似拎走咗我哋成長嘅機會咁。」
皮蛋︰「呢啲機會冇咗，要去邊度補番呢？時間冇咗，可唔可以番番嚟呢？」
得就好喇。
書銘︰「我記得有一年呢，旅行日畢業班去咗離島，結果有唔少人留宿，成為熱話，呢啲真係高中先會開放嘅選項。」
我︰「唔洗溫書咩？畢業班喎？」
書銘︰「俾晒所有時間你，你會溫咩？喂阿輝記，不如我問你，放咗成兩年假，你溫咗幾多呀？」
屌，問到我好老尷。
我：「你贏囉。」
書銘︰「係咪呀？都話咗摺一日唔代表做多一日嘢架喇，咁不如出嚟fing吓。呢啲機會，摺埋會溫書嘅人都想去喇。」
唓，講咁多，而家咪又係…
光秀︰「乜都冇晒，到老一場空。空空如也個空。」
皮蛋︰「輝記你恨到喇。」
「又係我？」我一盒羽毛球車落去皮蛋個肚上面。
皮蛋︰「你成日唔想番學，俾你恨到以後都唔洗番，開唔開心呢？」
「…」
我突然講唔到嘢，唔係因為火滾，但係又唔知咩原因…
「…」
有種講唔出嘅感覺，好實在，但係形容唔到。唔通係因為我讀書少？學番得太少？
「喂輝記！喂！」書銘拍咗我兩吓。
我︰「又做咩呀？」
「你求先好似諗緊嘢喎，唔通…」書銘望晒其他人嘅表情，視線又番嚟我身上。「唔通…你呢刻諗住轉死性？」
「咦，新聞喎。」麗連聽到花生指數爆登，即刻出聲。「成日唔番學，咁多年都低空升班嘅輝記。冇得番嘅時候反而想番學呀？點解之前唔番呀？」麗連搭住我膊頭不停潤我。
個死八婆真係對花生特別靈敏。
「我冇講嘢喎。」我耍手擰頭。
書銘︰「當我哋死架咩？我哋識咗你六年喇，你趷高個屎忽就知道你係屎尿定想打飛機啦！」
屌！俾佢用番同一句寸到一棟都冇！
書銘︰「喂，不如我幫你出post吖，『浪子回頭！輝記終於想番學！』咁樣，阿sir聽到一定好開心。」
我︰「我冇講過吖！唔好屈我！」
「冇講，輝記你冇用口講，你係用表情講。」麗連扮安慰我。
食屎喇你！你班人渣喺度催眠我！我冇想番…
「怪唔之得轉死性。」光秀乘機伸多我兩腳。「以前請都唔出嚟，而家一叫就出，原來係想番學。」
「嗚───！！輝記內心好少女呀！唔用口講，但係流露出嚟；俾人發現就面紅話唔係。」麗連喝倒采。
你班人…咁講嘅話，我講咩都冇用架啦！
「而家想番學已經冇機會喇！畢咗業喇！」皮蛋將同麗連講嘅說話，原封不動送俾我。
今次麗連伸手頂住皮蛋下巴等佢出唔到聲。
麗連︰「唔驚！我哋仲有last day！一定有last day架！阿sir話我哋一定有last day架嘛！信佢！到時我哋一齊影相！」
書銘︰「但係阿sir都講過今年會復課喎，你睇吓結果。」
結果係我哋冇埋中六上學期。
好似睇政府俾唔俾我哋影、會唔會製造機會俾我哋影咁。
Last day一齊影相，仲有可能咩？