(輕鬆 | 校園) 只有一年回憶嘅高中生涯: 7章 - 我仲有嘢想番中學做！

如果讀者喜歡此故事，希望你能正評+留言，或到penana點「喜歡」，謝謝你的支持！
 
https://www.penana.com/story/90093/輕鬆-校園-只有一年回憶嘅高中生涯
 
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
 
7章 - 我仲有嘢想番中學做！
 
我第一次喺泥地上面打羽毛球，仲要冬天、喺山上面，周不時都有一陣風吹過，好彩中午時份風唔算大，還可以嘅。
 




「嘩屌，又有風喇！」我追唔到個飄移嘅波講。
 
書銘︰「唔理，總之輝記你輸，求先我咪又係咁，你都當我輸！」
 
屌那星，早知唔計佢，結果我因為咁輸得仲多！
 
「唔玩住喇，抖抖先啦！」
 
書銘︰「輸咗就話唔玩！你老味你買硬嘢飲呀！」
 




書銘拎起支球拍打過嚟，我反射性用支球拍擋住，片咗兩嘢，兩條友由打波變到玩球拍劍擊，間中發出兩個武俠片比武嘅叫聲︰「喝」、「我擋」，弱智得嚟又幾好玩。
 
「你兩個幾多歲呀？」麗連睇我哋唔順眼。「牛高馬大玩埋晒啲小學生嘢。」
 
「佢撩我先架！」我強調自己自衛嘅立場。
 
「輝記輸就話唔打，你話抵唔抵打？」
 
書銘再嚟一下，又俾我擋住。
 




「你打唔到我架喇。」響起清脆嘅一聲「鏘」，我得意洋洋。「你條友頭大冇腦，思想簡單，趷高個屎忽就知道你係屎尿定想打飛機啦，你當我傻架咩？」
 
「打你個飛機！」書銘支球拍向住我嘅要害攻擊。
 
我︰「我再擋！」
 
鏘！
 
我︰「契仔，你都係落山練多十年先啦！」
 
書銘︰「唔得呀，鬥力鬥快呢啲嘢真係鬥唔過輝記，佢運動好勁呀！」
 
我諗大力係我唯一優點，讀書方面我真係冇半分天賦。
 
「見到呢啲低能嘢我就諗起中四嗰年。」麗連突然拎番塵封咗年幾嘅嘢出嚟講。「仲記得嗰年班會買咗啲棋俾我哋小息、放飯玩。同同班同學見咗幾個月，叫做開始熟， 開始搵啲棋嚟掟。」




 
皮蛋︰「唔係話咩忍界大戰咩？當啲棋係手里劍咁掟，掟到唔知去晒邊。」
 
「螺旋手里劍！」書銘即刻示範一次當年啲低能嘢︰極速喺褲袋拎嘢出嚟飛，等對方反應唔切、避唔到，最後「中劍」。「臨兵鬥者皆陣列在前！火爆符！」
 
「就係呢啲戇尻仔。」麗連搵番當年嘅不滿，指住那些年有份掟棋嘅書銘講。「搞到冇副棋齊，要用汽水蓋當棋玩。」
 
皮蛋︰「咁盲棋點算？」
 
「屌你個皮蛋，汽水蓋點玩盲棋呀？」麗連冇咁好氣。
 
皮蛋正白痴。
 
麗連︰「我想再捉多次唔齊嘅棋吖。」
 




我︰「我同你捉喇，你去買幾支汽水俾我哋，我哋用汽水蓋捉。」
 
「屌你輝記，好橋喎。」書銘搭我膊頭講。
 
我︰「我哋有嘢飲，你有棋捉，一石二鳥呀，仲唔去買？」
 
麗連︰「收皮喇！」
 
我︰「麗連你做咩呀？成日諗番以前啲嘢。」
 
皮蛋︰「條友成日唔肯接受現實，成日想番中學上堂。麗連你聽我講︰你已經畢咗…」
 
「你收皮！我哋仲有last day架！」麗連揞住皮蛋把臭口。
 
「last day？last day嗰日番到去先算喇。」皮蛋繼續刺激麗連。「中四咪已經last day咗囉？」




 
「屌你！」麗連開始落手打皮蛋個臭口。「仲講！仲講！」
 
光秀︰「麗連今日係咁講以前嘅嘢，又講冇做過畢業班啦啦隊，又話冇玩畢業班競技，數咗好多師兄姊一定做過但係我哋冇嘅嘢。」
 
「唔制吖！我要著班T喺跑道影相！」麗連又中埋去光秀身上面。
 
「嗱。」光秀指住身上面嘅麗連。「喂！你條友抽夠水未呀！有男人喺度架！」
 
嘩，呢個發言不得之了，有男人喺度唔可以抽水，咁冇男人喺度咪…我記得佢哋會上對方張床，咁究竟佢哋係咩關係？
 
我：「要喺跑道影班T相真係難啲喎。」
 
你話想捉棋我都可以陪你捉，補影喺跑道嘅班T相，呢個真係做唔到，我哋連班T都冇呀，想番學都難，仲點訂班T？
 




「講開又講，我覺得時勢對我哋好唔公平。」書銘竟然同麗連一齊傻、一齊抱怨。「成個中學最精彩就係高中，因為自由度最高，好多低年級唔俾做嘅嘢，高中都可以做、夠膽做，喺班房打康樂棋已經係。」
 
麗連︰「呀！！！康樂棋！！！」
 
麗連嘅「思校病」已經冇得醫，唔係鐘情於老師，而係昔日嘅自己未夠盡興、理應有嘅回憶都冇晒。
 
書銘︰「我哋學校中六先俾喺班房打康樂棋，結果我哋冇打過，你話係咪屌出聲。」
 
「係，冇有錯。」光秀都參加抱怨大賽。
 
本來我想講︰康樂棋咪去老人中心打囉，但係講出口一定俾佢哋打。唔係「冇得打康樂棋」係遺憾，係「冇得喺中六班房打康樂棋」先係遺憾。
 
「成個中學最精彩嘅時候嚟停課，一停停到畢業，對高中嘅印象就只有電腦，有邊個估到係咁嘅結局？」書銘不斷揮球拍，成晝發發聲。
 
光秀︰「係囉，我都唔明點解係我哋，搞到我哋好似被選中嘅細路咁。」