我有一種好變態既超能力: 猛鬼
肥BOB：「大家好！歡迎收睇《兩兄弟幫》，《2 BOYS 1 CLUB》！靈異事件就聽得多啦，但係有邊啲係真邊啲係假既呢？今集我地就邀請左司徒師傅黎我地既節目到分享下自己多年黎既經驗呀！你好呀司徒師傅！」
司徒師傅：「你好你好。」
陳Ｘ峰：「呀師傳，通常靈異事件就離唔開果幾樣野，好似鬼上身呀，物件無端端冧落黎呀，或者好似網上流傳果啲影到靈體既照片咁，夠竟你會點樣分既呢？」
司徒師傅：「嗱，通常要分真假就需要知道果一個地方以前係發生個咩事。好似亂葬崗呀，兇案現場果啲地方就一定有野。」
陳Ｘ峰：「咁如果唔知果個地方以前發生乜事呢？」
司徒師傅：「好簡單，你會覺得果個地方陰氣好重。就好似哩一間錄影廠咁，我都覺得哩度好重陰氣架。頭先唔同你地講，係驚嚇親你地。」
肥BOB：「咁而家又會講既師父？」
司徒師傅：「我想嚇下你地呀嗎！」
肥BOB：「嘩哈！師父真係好幽默呀吓！」
司徒師傅：「嗱，哩啲事唔講得笑，會出事架嘛。」
陳Ｘ峰：「咁司徒帥父，點解哩到會陰氣咁重？」
司徒師傅：「望返我地坐緊既位置啦，係風水勘測時，以東北45度的方位為鬼門啦，所以我地哩個位陰氣就特別重。好似角落頭到都已經有幾個女人係到。」
陳Ｘ峰：「女人？」
司徒師傅：「係呀，就我所知以前呢，係日軍既年代果時呀，哩一度係慰安所黎既，殺左好多女人，之後變成亂葬崗，算係數一數二既猛鬼地方。你地唔發覺你地既節目成日換主持人既咩？都係佢地作怪咋嗎。」
肥BOB：「師父，有冇咁多亂葬崗呀！果個我地既助手黎架，嘩！哈！」
雖然節目正在進行中，但陳Ｘ峰同肥Bob已經笑到面都青埋，而司徒師傅為左掩飾佢剛才既「瘀事」就開始講另一個話題。
司徒師傅：「我諗大家都知就黎鬼節啦，但係今年係特別多怪事發生。就好似早幾日就有一間酒店既經理就打黎同我講有個後生仔係謝師宴既時候鬼上身亂咁講野，不過哩一種事我一聽就覺得假。」
陳Ｘ峰：「師父，你又點知係假既呢？」
司徒師傅：「你地試諗下，謝師宴係一個咁多人既場合，普通人都唔會誤打誤撞入去啦，何況一隻鬼？」
肥BOB：「呀師父，我都聽到近排好多怪事發生。好似早幾日，我兩個女就同我講佢地見到玩具反斗城啲玩具無端端冧哂落黎。」
司徒師傅：「你個女應該睇得太多反斗奇兵啦......不過類似既事件我都聽唔少。好似我近排就有幾單關於物件移動既案件，隻鬼真係好猛，係我有史以黎見過最勁。」
肥BOB：「有幾猛先，師父後黎又點樣對付佢？」
司徒師傅：「果時我就作法講『人見低頭！鬼見伏地！走！走！走！』之後一把木劍打去件物件到。起初佢係用粗口罵返我，所以我再打多佢幾野，跟住佢就好痛苦咁低吟『我可以...』但係無幾耐就到個物主被鬼上身，仲對住我痾尿喎！不過惡有惡報，我估隻鬼掂完充滿陽氣之物就消失左啦。而佢走果時又係講返果句『我可以...』」
陳Ｘ峰：「咁師父有冇咩經文呀咒語之類可以用黎驅鬼既呢？」
司徒師傅：「當然有啦，跟我一齊讀『留人門！封鬼路！ 人見低頭！鬼見伏地！走！走！走！大顯威靈！』 」
正當三人唸緊咒語時，老豆就突然熄電視。我知佢其實已經聽到心荒荒，但係為左顧及面子，佢話：「有冇咁猛呀，痾尿喎！哈哈！」
其實真係有架，果個就係我黎囉。當時我痾完尿之後，先意識到我係拎住被依附果個人條正氣，而由於太嘔心既關係，我立即返回自己既肉身。有幾嘔心？咪就好似痾痾下尿摸錯左隔離尿兜果條友既正氣既感覺。
我本身都唔想攪到咁大件事，我只不過係想鍛鍊自己既超能力，特別係將自己既靈魂依附係生物上。
將靈魂依附係生物上係有別於依附係死物上。每一個生物都有佢既靈魂，若果我佔據佢既身體，佢既靈魂就會比我趕走。但係靈魂點都需要一個容器，所以佢既靈魂就會依附係我身體。簡單黎講，就係交換身體，但係主導權永遠都係我手上，即係我話要依附就依附，我要離開就離開。
另一樣野要特別注意既就係被依附生物既行為。仲記得我曾經依附隔壁陳伯隻狗公到，當我一返回自己肉身既時候，我發現我騎住自己既欖枕，條褲有少少濕濕地，而欖枕就有被磨擦過既痕跡。仲有，我曾經依附係自己屋企條金魚到，但係條金魚就唔識用我對腳行路，只係不斷地「典下典下」，最後我當然撞到頭崩額裂啦。所以自此之後我再冇諗過依附係動物既身上。
為左鍛鍊自己既超能力，但係又唔可以上動物身，咁當然係要上人類身啦，不過上人類身既危機都十分之大。首先就係有咩方法同果個人接觸超過一分鐘呢？之前就話同呀郎好朋友先接觸超過一分鐘，但唔識既人點接觸？其次就係我地交換身體之後有咩方法令到佢唔發覺自己變成第二個人呢？只要我既真身係屋企，實會搵到鏡照到自己，到時報警既話我就會被認出......又有咩地方可以限制住佢既活動範圍，唔比佢用我身體逃走呢？終於有一日我係電視搵到方法。