我有一種好變態既超能力: 恐懼鬥室之咁猖狂
「時昌迷你倉，81777778。」
係啦！係迷你倉！迷你倉內外都可以用鎖匙開！只要我將果條鎖匙收埋係迷你倉既某一個地方到，咁就可以困住自己，又可以比自己走到。至於收埋條鎖匙去邊......我諗我應該要買一個保險箱放係迷你倉入面。
至於點樣確保果個人唔會係倉入面求救，我就有一個諗法，就係令到佢驚。為左令到果個人產生恐懼，我會係倉入面擺多幾樣野，包括迷你電視機、噪音計同假炸彈，之後就會進行一次現實中既《恐懼鬥室》！
不過一切只係猜想，要知成唔成功就需要測試。倉就已經租左啦，不過測試之前就需要做準備功夫。
我戴住Jigsaw既面具，對住電腦前既鏡頭講：「Hello. You don't know me, but I know you. I want to play a game. Here's what happens if you lose. You will die because......算......我都係講返中文。如果你輸左哩一個遊戲，你就會死。遊戲玩法好簡單，門口附近有個噪音計，只要你大叫或製造嘈音既話就會爆炸，至於幾大聲先會爆，你自己估。There is only one key to open the door. I put it outside this room......Look around. Know that I'm not lying. Better hurry up. Live or die, make your choice.」
將段影片入完去部電視之後，我就開始帶埋保險箱、迷你電視機、噪音計同假炸彈出發去迷你倉。
我按照我既計劃，將自己鎖於迷你倉之內，然後將條鎖匙放入保險箱。跟住用電線將噪音計同假炸彈連埋一齊，再測試下噪音計係唔係真係用到。當然所有野就如我所料啦。既然都完成哂所有準備，我就要開始搵一個人用黎訓練我「靈魂依附」既能力。
搵人依附係好大既難題，因為要接觸超過一分鐘並唔係一件易事。如果我再搵返呀郎既話佢實會知道係我，所以佢都係算數啦。咁究竟有咩人選呢？
正當我係街上一路徘徊一路思考既時候，我就見到某個呀叔好風騷咁從某唐樓走出黎。我再望一望棟唐樓，原來係盲人按摩。於是乎我靈機一觸，就諗到有咩人選啦......
不過入到去我覺得好奇怪，點解咁多男人係度既？仲有哩一間咩按摩店黎架，啲盲人技師按到咁鬼大力既？隔住道牆都聽到「啪啪」聲。
我問坐係我隔離戴眼鏡既肥佬：「先生，請問哩一度係唔係盲人按摩呀......」
戴眼鏡既肥佬笑住同我講：「細路，隔離果間先係盲人按摩呀，哩一間係橫琴按摩。」
我又再問：「咁兩間都係按摩姐。」
佢聽到之後將隻手搭係我膊頭，另一隻手就指向門外既招牌：「見唔見到有個『笑哈哈』圖案？」
我：「咁又點？」
起初佢猶豫左一陣，後黎就好認真咁答：「有『笑哈哈』就代表哩一間野得到認可。」
我：「係？先生你都幾熟喎。」
佢：「係呀，我成日幫襯哩一間店既。入面果個Miki幾好手勢呀！」
我：「唔知先生點稱呼呢？」
佢：「我就唔方便透露。不過做個朋友就冇問題。」
然後佢就遞左佢部手機比我，叫我輸入我既電話號碼，話得閒就約出黎一齊去按摩。等等先！我剛才入自己個電話號碼就入左一分鐘，而入之前佢就已經搭住我膊頭，咁即係我可以走得啦喎！唔洗搵個技師按摩，唔洗上技師身！
最後，我同個肥佬講突然有事要做，所以按摩都係等下次先。然後我就返回迷你倉，進行我既訓練大計。不過上肥佬身之前，我都好希望知道佢係邊個，所以我就依附係佢電話。
個肥佬應該用緊電話上網，而佢上緊既網係......141！？哎，Hi Hi，唔小心幫佢噤左讚好。
可能我習慣左一做錯事就講道歉，所以下意識地以電話既身軀講：「對...對唔住...我幫你取消返個讚好...」
我用前置鏡頭望住佢，見到佢既表情由咸咸濕濕變成奇奇怪怪，再由奇奇怪怪變到驚慌失措。之後佢就衝左去問人打電話講：「司徒師傅，係我呀！」
不過我冇理佢，我只係好希望盡快幫佢取消左果個「141香港囡囡資料庫...」既讚好，但係已經太遲啦！Facebook上已經有人留言話「咁猖狂？」如果我而家幫佢取消既話應該只係會比人覺得「身有屎」，所以都係由佢啦，希望到時個肥佬識得兜，同人講比人Hack入個戶口算啦。
我再用前置鏡望返個肥佬，我發現佢向我衝緊埋黎！於是我立即開動震機功能，完美地令自己避開佢既攻擊。然後我就好似聽到有人講「人見低頭！鬼見伏地！走！走！走！」
誰不知我聽完之後就有人用把木劍插我！由於太痛既關係，我忍唔住大叫：「Hi Auntie！」
我馬上返回自己既肉身，再依附係肥佬既身上望下係邊個咁對我。我一望！原來係鼎鼎大名既司徒師傅！不過有名氣還有名氣，唔好以為打完我之後我唔會還擊！於是我拉開褲鍊，射到佢周身都濕哂。不過我痾完尿之後，先意識到我係拎住肥佬果條正氣，而由於太嘔心既關係，我立即返回自己既肉身，件事就係咁告一段落。
經此一役，我好肯定自己運用「靈魂轉移」已經爐火純青，仲有我間恐懼鬥室都發揮到佢既作用。
老豆突然拍我膊頭問我：「諗咩諗得咁入神？」
我答：「冇，幻想緊司徒師傅剛才講佢單案既情景姐。」
老豆聽完之後笑我諗埋啲低能野，之後叮囑我訓之前要熄哂所有燈。而係佢入房之前，佢話：「呀仔，聽日見果份工要努力呀！」
我背向老豆，擺出一副奸樣講：「佢地一定請我。」