我有一種好變態既超能力: 喪心病狂謝師宴
「仔，做乜見你成日都望住樓下既公園？」老豆拍我賻頭問我。
我轉身望向老豆回答：「有靚女...」
老豆好猥瑣地笑住問：「係？係邊？」
我指向老豆後方既娘親，然後老豆擺出一副驚訝既表情。娘親身上散發住一股好強既氣，佢走近老豆，用高八度既聲線罵老豆：「你個死佬又將你對死人臭襪放入洗衣機！叫左你幾多次要分開洗！次次你又......」
娘親一路跟住老豆入廚房再一路罵，而我就一路坐係窗邊。當我坐係窗邊既時候，我就會諗「女學生你幾時黎？」每一晚我都會重覆咁做，但始終都係見唔到女學生。
坐下坐下又幾日，坐下坐下又幾個月，坐下坐下又一年。
17歲了，轉眼間就完結中六生涯，轉眼間又完成文憑試。文憑試過後，就係人生交叉點。你可以去繼續升學，你可以去工作，將來條路要點行就自己決定。但係係行之前總會有障礙出現－謝師宴。
仲記得係幾個月之前，班上就展開左一場謝師宴渣FIT人既選舉。
班房第二行頭馬肥傑說：「英姐，話哂你都做左咁耐班會主席，好順理成章就係你做班代表去參加籌委會啦。」
班會主席英姐聽到肥傑既一番話之後大力拍檯，再指向肥傑：「啦，唔好亂講呀，班會還班會，籌委會還籌委會。」
肥傑攤開雙臀，再用甚具挑釁既語氣問：「喂，咁而家點呀？冇人肯去做喎，咪自然係你去做囉，咁多位兄弟係咪咁話先？」
坐係肥傑附近既男仔立即起哄表示支持。
英姐眼見形勢不利，立即企起身用高居臨下既姿態話：「而家算點？搵咁多人兇鳩我咁話啦喎？我果一邊都好多人架喎，姐妹們！」
其他女同學立即企起身聚集到英姐身後。其中一位女同學，即中文科坐館，瓊姐，佢話：「冇人去做你自己唔識去做架？」
而其中一位男同學就回應：「就係冇人去做，所以咪要由職位最大果位去做囉。」
果位男同學就真係大撚獲啦。個個都知瓊姐係個死八婆唔好惹，今次仲要串佢，個男同學既下場一定好慘。仲有就係我都覺得好對佢唔住，我居然唔記得佢叫咩名。
瓊姐突然好似某個黑人女星上身咁，頭搖又尾擺咁串返佢：「咁叫領袖生長去做囉，橫掂都係我地班，我相信佢個職位比班會主席大。呵～」
可憐既領袖生長被拖落水，佢好唔甘心咁話：「吓，我冇諗住去喎。」
瓊姐同其他女生話：「唔去都要比！」
領袖生長：「咁都得？」
肥傑今次出奇地讚同英姐派系人士既說話，佢話：「謝師宴有一半既錢係用黎謝師，一半用黎宴會。」
英姐回應肥傑：「既然你今熟，就你去做啦！」
肥傑立即推辭：「咁又唔好，都係職位大既去做好。」
其實謝師宴籌委會係一樣好煩既事，又要諗地點，又要諗價錢。揀個平既酒店去食就話地方遠質素差，貴既酒店就話呃錢。到大家選擇好地點，開始收錢就會收唔齊。總之就係冇人會願意去做。
正當大家爭持不下既時候，我地班既完美男神，呀郎，佢提議：「不如我地攪珠啦！攪珠最民主，大家係咪咁話？」
我地班房內設有一部迷你攪珠機，係每次我地上堂時冇人肯去答問題既時候就會出動。不過哩一部攪珠機有一樣好神奇既地方，就係佢永遠都唔會抽中我。點解？因為我已經從佢買返黎果一刻開始就完成「靈魂依附」既條件！呀郎，你果然係我多年黎既好朋友，多謝你！
眾人返回座位，然後由呀郎主持攪珠儀式，而我都係時候開始發動我既超能力：「我是你...」
呀郎轉動攪珠機，而我就睇準時機，唔好比佢抽到屬於我既號碼。之不過呀郎佢突然停哂手，究竟點解呢？佢走向某同學既方向，並且好神色凝重咁問：「喂！佢係唔係暈左！？」
當佢走到去某同學身邊既時候，我先發覺原來佢講緊我！
瓊姐輕輕一撥佢既頭髮，就話啦：「肯定係扮暈啦！就一於佢做啦！」
其他女同學附和瓊姐既建議，而男同學都因為事不關己，所以都舉腳贊成。
點會咁架？說好的民主呢？哩一個擺明係小圈子選舉啦。就算係選舉都應該比所有人提名，而唔係由瓊姐話係邊個就邊個！我接受唔到！瓊姐我屌你老母！唔得，我要盡快返回我既肉身。
由於我太心急返回肉身，所以我不斷重覆：「我可以！我可以！我可以！我可以！我可以！」
但係係我返回自己既肉身既時候，瓊姐已經走到去我身邊，並且問我：「你可唔可以去參加籌委會？呵～」
「我可以！」今次仆街啦，我趕唔切收口呀...
所有人都企起身為我鼓掌，但我並唔覺得光榮......我只係覺得自己好似抽中左生死籤既江湖中人去冧友咁......一步天堂，一步死亡。入到去籌委會，大家都要宣誓。講真，我都唔知點解我學校有哩一個傳統習俗。係哩一刻...我覺得自己好似「黑社會」。
「既提名於班會，必盡忠於籌委會。今日團結一致，終生肝膽相照，忠心義氣，運財到尾，倘若奸心反骨，有始無終者，神昭其上，鬼鬫其旁，三刀六眼，五雷轟頂，報應分明，人神共鑒。」
經過一輪既籌備，終於黎到謝師宴既日子。為左迎接哩一日，我已經將自己改頭換臉。我唔希望有一日係高登到見到自己被標籤為「Grad Din毒男」，所以我特別為自己買左人生第一套西裝。一條小煲呔加上一套標準既西裝，我覺得自己好似出席緊奧斯卡金像獎！
我雙手插袋，踏上紅地氈，幻想自己好似荷里活影星進入會場。果然我一入會場，大家都注視緊我，其他班既某一位同學對我講：「Waiter，可唔可以快手少少？」
「Er...我唔係Waiter...我係B班果個...」當我既說話講到一半時，佢已經好尷尬地返回自己個坐位。不過論尷尬，佢一定唔會夠我勁，因為我同Waiter著埋同一件西裝！
呀郎見到我之後向我招手，示意我地今晚要坐既位置。我地坐既係4號檯，係最接近講台既位置，而係哩一張檯有齊我地B班既風雲人物，包括英姐、肥傑、瓊姐同呀郎。另外仲有兩個唔出名既人就係無名同學同埋我。
呀郎問我：「喂，你做乜著到成個waiter咁？」
我苦笑咁講：「暑假part-time係到返工呀...哈...哈...」
肥傑突然企起身並舉起杯同在座既各位講：「果日選舉一事，如有得罪請多多包涵！嗱！今日以水代酒，過往既恩恩怨怨一筆勾銷，好唔好！？」
瓊姐聽到後又發揮佢既臭串本色：「好你老母。」
肥傑聽到後不甘受辱，佢話：「瓊姐，唔洗咁串呀？話哂都係最後一日見面，比少少面我好喎。」
英姐向瓊姐舉起手指公，說：「瓊姐呢鋪我就撐你啦，上次條友咁串係度話職位最大果位做，你都傻既。」
呀郎為左緩和氣氛，就向大家提意：「不如我地哩一檯人影張相呀？」
大家聽到呀郎既提議之後就收左口，然後就圍住呀郎影相，而我呢？佢地並無注意到我既存在，所以我企係佢地身後。但由於身高關係，我完全被佢地遮掩了。
合照過後，佢地就各自四散同人影相，希望係畢業前留低開心既回憶。但係我並唔開心，反而仲有少少傷感。我回想起咁多年黎，中學既朋友加埋都唔多於5個，深
交既又只有呀郎一個。
我一路坐係自己既位置到，祈求會有人黎搵我影相，一路等一路等，結果終於有人黎啦，佢就係呀郎。佢話：「我頭先發覺原來我仲未同你影相，不如我地黎影一幅好唔好？」
「咔擦」
我問呀郎：「今晚過後，我地都仲會係好朋友個可？」。
呀郎又一展佢平時燦爛既笑容回答：「咁緊係當然啦！」
由於我太滾動既關係，我無意之中流下兩滴淚水，所以就立刻低住頭衝去廁所，反鎖自己去某個廁格之內，任由眼淚流過痛快。
但係接下落黎，我將會聽到一段改變我一生既對話。
「喂，你見唔見到成日痴住呀郎個男仔幾撚毒呀，成晚自己一個坐係檯果到，冇人搵佢影相，哈！」
「有呀，咪呀郎囉！哈哈！不過我都唔知點解呀郎要識佢哩一種毒撚，肥矮柒毒中三範。平時講埋哂啲低能野，做乜都唔掂，同佢做朋友我諗應該冇咩話題可
言。」
「冇錯，明明兩個唔同世界既人黎。講真，我都覺呀郎係我地級入面可謂無人能及。身高180，DSE應該接近30分，途手可以游出公海。」
「我諗個毒撚以為呀郎真係同佢好friend，所以成日痴埋去佢到，不過呀郎對每個人都咁friend架啦！但係呀郎又唔好意思拒絕佢喎，於是一路忍佢忍到今晚。我相信今晚過去呀郎唔再當佢係朋友。」
「嘩！你把口仲衰過我，咁賤都有既，哈！」
「講事實姐。佢都話過佢係毒撚架。」
我唔知佢地係邊個，都唔想知佢地係邊過。只係心入面有種心灰意冷既感覺......我估唔到我地多年黎既友誼只不過係建立於「容忍」之上，並無真心真意咁樣交流過。不過佢地講得又係正確既，好似我哩一種毒撚，邊有人想同我做朋友？
我好唏噓地坐係個屎塔上講：「呀郎，如果我是你，我都唔會同個毒撚做朋友。」
奇怪啦，點解我會係宴會廳？我記得我明明係廁所架...4號檯3號位...哩一個咪係呀郎既座位？
我立即衝向附近既鏡，我發現自己居然變成呀郎！而我點都估唔到我既超能力「靈魂轉移」原來係可以用係生物上面，點解我一早諗唔到！？
我對住鏡中既呀郎講：「呀郎，既然你話過我係毒撚，我都要你變成獨撚。」
我利用呀郎既身體走上講台，而大家都將目光集中係我身上。我話：「今日係我最後一日見大家，我好希望送上我既祝福。」
台下遠處就有女生同男生呼叫：「快點強姦我！」
聽到佢地既一番話之後，我搖晃食指，然後大叫：「我祝大家年年有今日！歲歲有今朝！」
現場氣溫急速降至攝氏零下273.15度，原子停止活動，所有人靜止不動，就連「針」緊水既Waiter到呆住了，連水都係停頓係半空中既狀態。
我又再講：「我都好希望各位明年、後年或者再後年既DSE再努力，考取好成績去讀毅進！多謝！」
現場有人開始離開會場，但係都有人問：「佢係咪飲橙汁飲到醉撚左？」
正當我再想講落去既時候，一個熟悉既面孔站立係擠滿人群既宴會廳出口之中望住我。果一個就係我，同時果一個就係呀郎。
我輕聲地講：「我可以。」然後返回自己既肉身，之後頭也不回咁，跟從大隊離開會場。
係果一日，我發誓我唔要再做以前既毒男，我唔要比人睇唔起，我要運用我哩一種變態既超能力去改變自己既命運。
順帶一提，自從哩一件事之後，我再無聽過呀郎既消息。