我有一種好變態既超能力: 少女
自從發生假陽具事件既悲劇之後,我再無用運用過哩一種能力。因為每當我運用哩一種能力,我就會回憶返自己身處係陌生男人屎眼入面既情境。果一種濃郁既屎味,狹窄既大腸仲有滑不溜手既腸壁,嗚...諗起都令人想嘔。點解我要有哩一種咁無用既超能力?點解!我諗唔通呀!呀!!!!!!!!!!!!!!!!!!!!!!
房門外既母親問:「呀仔,近排做乜成日困埋自己一個係房呀?呀仔,你有冇事呀?呀仔,係唔係有咩唔開心呀?呀仔?呀仔聽唔聽到我講野呀?呀仔?」
「我打緊J呀!得未呀!?」我被母親既一連串問題問得有少少唔耐煩。誰不知佢又再問。
「呀仔,咩打緊J呀?」母親果然天真過天真嬌,連我講「打緊J」都趕佢唔走。
事實上,我並唔係打緊J,而係我參悟緊點樣運用哩一種超能力。點參悟?好簡單,咪就係上高登問人點做囉。不過我得到既回覆都相當之廢下,包括「仲洗問?緊係用黎裝人沖涼啦#good# 」、「返工」、「扮假鳩」、「扮飛機杯#hehe#」.......
房門外既母親果係不到黃河心不死,又再次問我:「呀仔,你仲未答我咩叫打J呀。」
我為左敷衍母親,就回應話:「打緊J即係做緊功課,係電腦上打一篇Writting Jornals。」
母親聽到之後就讚我:「果然係乖仔呀,咁你慢慢打J啦,唔阻你。」
母親離開了我既房門外,我樂得耳根清淨,剩低既聲只有窗外既蟬聲同樓下公園小朋友玩耍既叫聲。我望出窗外,倚靠住窗邊,欣賞下安穩日子既黃昏。
黃昏過後,小孩逐漸離去,只有一個女學生坐在公園旁。從佢既身高同樣貌,我估佢係一個年紀與我相若既女學生。哩一個女學生令到我回想起我第一次發動「靈魂依附」果時既情況。而家諗起都覺得有少少不可思議,邊個會估到自己會無端端有超能力,仲要入左張十蚊紙飄出街。
講返起果時個女學生同哩一個女學生又幾似樣,樣子又係有幾分青澀,又係藍白既校裙配上一件冷衫,又係好似果種不凡脫俗既感覺。屌!原來係同一個人黎。究竟佢自己一個人坐係度做咩呢?
佢從裙袋之中拎出一張十蚊紙,我心諗莫非就係當時我依附果一張?但係洗乜諗喎,試一似咪知道係唔係囉。
正當我準備講「我是你」既時侯,我又再次回憶起一條暗黑既隧道,一條佈滿屎既隧道,我猶豫了......我盡量做到心無雜念,一心諗住化身為十蚊紙,再試多一次,再準備講「我是你」。
今次好少少,我並未進入果一條隧道,我只不過係隧道外面等待,就好似一架私家車係紅磡隧道既收費廣場進退不得。但係要過海就點都要經過隧道,但紅磡隧道點會咁暢通呢。我不斷嘗試,幾經辛苦先駛至大型廣告版之下,但係廣告版上面既廣告賣既並唔係金光閃閃既別墅或者山庄,而係暗啞啡黑色既金茹肥牛,仿似警告我「千奇唔好入去呀!」但係既然都入得黎我就唔應該放棄。我不斷重覆,由起初乜都講唔到,之後開始講到單字「我」,再講到「我是」,最後終於講到「我是你」。
得左啦!我終於擺脫到個陰影!我成功依附係十蚊紙上啦!可惜女學生已經將我塞返入袋離開左公園......
每一日,我都好期待女學生會再次黎到公園,等佢將我拎出黎既時候比驚喜佢。我不斷等,不斷等,始終都係唔見佢。
直至係某一個滂沱大雨既夜晚,佢又再次出現係我樓下既公園。女學生並冇擔遮,佢被泛黃既燈光照射之下,佢既背影顯得格外蒼涼。佢又再次拎出十蚊紙,而我又係時係依附係十蚊紙上。
「十蚊紙,我又再次比屋企人趕出黎啦,哈哈。每次比佢地趕出黎,我都會諗:『究竟佢我係唔係佢地個女?』點解每次都好似係我錯咁?明明係我細妹既錯就入我數。話我讀書唔好所以呀妹有樣學樣。點解兩個都係佢個女,我就永遠都係錯果一方?」女學生淚流滿臉地說話。
其實我唔係幾識安慰人,如果要我安慰人我係做唔到,所以我都係做返平時既自己......我趁女學生喊到花容失色,大叫:「嘩!係咪好驚呢?哈哈!」
女學生個表情就好似「好心你幾廿歲人就唔好咁多性幻想」個女仔咁望住我。
我壓低聲線話:「我係一張被咀咒既十蚊紙,相傳拎到我既人以後個銀包都得返十蚊紙。」
女學生聽到之後終於展現笑容,之後拎住我去左某涼亭到坐。佢話:「估唔到當時我係無聽錯。」
「嗄?」
「你當時係公園曾經講過野,我好肯定冇聽錯,所以我拎你返屋企,但係當我拎你返屋企之後你就再無講過任何野。之後我每一日都同你講野,希望你總有一天有反應。然後我就養成一個習慣,就係將我開心同唔開心既事都講比你知。直到今日,你終於都開口講野。」
哩一個女仔比到我一種好特別既感覺,平常人都唔會覺得係街邊會有一張十蚊識講野,但係佢居然一聽就覺得係我,或者哩一種就係叫緣份,所以我真係好想深入認識佢。
「十蚊紙你仲係唔係度?」
「係,係度!」
「你以後可唔可以都係公園陪我講野呀?」
「當然得啦。」
之後既每一日我地都會係公園傾計,佢有時會講下佢學校既事比我知,又有時講下屋企既事比我知。甚至佢會分享佢自己既秘密比我知,就好似佢係咩CUP、沖涼係邊個部位沖先、佢會唔會痾屎、初戀對象係點樣同有冇同人啪啪啪過(冇)之類我都一清二楚。
但係佢愈分享咁多自己既事比我知,我就覺得好內疚。我一路以黎都呃緊佢,我無話過比佢知我其實真係存在。我好希望有一日可以用真人既身份同佢一齊傾計一齊笑,我好希望同佢係埋一齊。
凡事會唔會咁順利?如果我佢同講我其實係真人黎會點?不過以我地相處咁耐,當我講完之後佢只係會當我講笑。如果我唔係佢面前出現,佢係唔會相信我。然後呢?佢會唔會接受我?定係好抗拒我呢?假若我永遠都唔行動,我就永遠都係以一張十蚊紙既面目見佢。但係我行動,我就有機會以後用真面目見佢,但都有機會失去佢。不過,我決定左啦!只要係有一絲機會我都要嘗試。
為左同佢見面,我終於第一次靠自己去買衫、買鞋同剪頭髮,希望比到佢一個好既印象。
衣著方面,我選擇去一間國際知名品牌「Bossini」。首先,我揀選左一件綠色既背心,背心正中央印有椰子樹既圖案,我相信哩一件衫可以為平時充滿毒氣既我注滿朝氣。然後,我又買左一條米黃色既短褲,去配搭返夏天應有既形象,比人一種涼爽同自然既感覺。
![](http://d2wd7qnlteg23c.cloudfront.net/product/BOSSS13/01/210907020/210907020-67-1-4.jpg)
鞋方面,當然係我長期支持Mazuno系列啦。透氣通風再加上優雅既設計,簡直係令到我今次見面如虎添翼!
![](http://img03.taobaocdn.com/bao/uploaded/i3/T1IWhcXhdzoACN0C6a_122340.jpg)
至於髮形方面,我係高登睇過下其他人既意見,大家都係推薦大熱既比比鳥頭,所以我去到QB house二話不說,一野遞張周柏豪既相比佢。理髮師見到之後就拍哂心口,然後就開始剪啦。雖然冇想像之中咁好,但係我都好滿意。
![](http://news.shangdu.com/gaoqing/20120413/P_5608259_0__666630199.jpg)
我從來都唔相信神,但係我今日去見佢一面之前都祈求上帝要比我成功。
我比女學生更早一步到達公園,預先埋伏係平時傾計既位置附近,希望比到佢驚喜然後等佢接受我。我左顧右盼,望下佢幾時會黎到,而我既心已經緊張到好似要跳出黎咁濟。當我聽到熟悉腳步聲既時候,我就開始進入「靈魂依附」既狀態。
平時都係佢主動呼喚我,但係今日我比佢更早說話:「HI。」
女學生走到平時我地係公園傾計既位置,問我:「點解你今日咁早出現既?」
我好凝重咁問講:「咳咳...我今日有一樣野想問你。」
「係,請講。」
「你鐘唔鐘意我?」
「哈哈!白痴!點會唔鐘意你呀,你咁特別。」
係時候啦,我要同佢坦白咁講我既秘密!
「假如我同你講其實我並唔係一張十蚊紙,而係一個真人呢?」
「有咩可能呀,你係唔係想講自己係青蛙王子,然後叫我kiss你?你都好蠱惑喎。」
「你合埋眼,唔好眨眼。」
「合埋眼又點眨眼喎,妖你。」
返回肉身之前,我講:「我可以。」
今次我講既「我可以」係有兩個意思。第一:平時返回自己肉身必要講。第二:我可以令到佢鐘意我!
我企起身,大力吸一口氣,不斷重覆同自己講:「我可以!我可以!」然後輕聲地走到女學生面前。我開口講:
「芯慈,你可以打開眼啦。」
女學生佢一面錯愕,勢估唔到平時傾訴既十蚊紙如今竟變成一個人。錯愕過後,女學生並無任何話要說,但見佢眼泛淚光,咬緊下唇,好似對我怒目而視。佢舉起手上既十蚊紙,然後係我面前清脆利落地撕爛,好似無聲地話比我知哩一段感情已經完結。
我唔敢再望住佢,並且用因鼻酸而攪到沙啞既聲線問佢:「你鐘唔鐘意我?」
佢冷冷冰冰咁回應我:「如果你唔出現係我面前,我會鐘意。」
哩一段就係我地最後既對話。