［愛情純愛］我地之間嘅友誼純度絕對等於零！！！: 110. 足夠喜歡

「珍奶真係好好飲～雖然我就唔太中意食珍珠⋯」李逸彤將杯拎起到眼前輕輕一晃，杯裏剩下嘅都係一粒粒黑色嘅珍珠同冰，李逸彤忽然間諗到啲咩一樣一下子望向邱旻顥，「我好似，成日都係同你一齊飲珍珠奶茶。」

「係咩？我淨係覺得我地成日都去買珍珠奶茶，不過冇計住。」邱旻顥鬆開手，聳聳肩

「唉～你話點算呀邱旻顥？」李逸彤擔憂地望一眼邱旻顥，又耷低嘆一口氣

「咩點算？」邱旻顥一頭霧水地輕皺一下眉頭

「我成日都同你一齊飲奶茶嘅話，我會肥好多⋯！」李逸彤嘅聲線裏係滿滿嘅擔憂，「你會唔會嫌棄我，唔同我做朋友？」





「吓？朋友呢啲嘢睇心㗎嘛，係睇外表㗎咩？」邱旻顥無奈一笑同時將李逸彤由上而下打量一番，「邊個啱啱仲話自己美若天仙？」

「果然做開人地哥哥都唔同啲，特別識講嘢～」李逸彤對於邱旻顥講嘅嘢幾滿意，用手輕撞咗邱旻顥兩下

李逸彤忽然感覺到手機震咗兩下，拎出嚟一睇就見到原來係一個男仔朋友reply咗佢喺冇幾耐前po嘅story

李逸彤喺經過垃圾桶時，順手就將空空嘅奶茶杯掉到垃圾桶內，然後雙手拎住手機打字回覆

「邊個⋯」邱旻顥好奇地瞄一眼李逸彤嘅手機螢幕，睇下李逸彤覆緊邊個，點知仔細一睇係男同學嚟，「嘖⋯」





邱旻顥下意識就喺心入面不滿地嘖咗一聲，邱旻顥沉默落嚟冇講嘢同時將視線從李逸彤嘅手機上移開，但又會偶爾忍唔住偷望兩眼

「佢地私下仲有講嘢？」邱旻顥喺心裏猜想

佢知呢個男仔同李逸彤好熟，雖然未到形影不離，喺同李逸彤未熟嘅時候，都會聽到其他人攞佢地嚟開玩笑，話佢地係唔係有咩關係之類

不過後來，邱旻顥嘅出現令呢啲玩笑都停止咗，繼而玩笑同緋聞就去到邱旻顥嘅身上

「算啦，反正又冇咩所謂⋯」邱旻顥喺心裏道，其實佢知李逸彤唔係中意嗰個男仔，只係偶然聽到其他女仔講起都會有啲在意，「李逸彤呢種性格冇男仔追就真係奇⋯」





李逸彤回覆咗兩句之後就將手機螢幕鎖上，將手機放到裙袋後望咗邱旻顥一眼，邱旻顥察覺到來自李逸彤嘅視線後，淡然地望咗李逸彤一眼

「咩呀？」李逸彤微笑着問道

「冇嘢。」邱旻顥因為李逸彤一個微笑，佢自己都不禁微笑起嚟

「係呢～我整嗰啲cupcake好唔好食呀？你食晒未？」李逸彤忽然提起cupcake，其實就係唔想dead air

雖然每個番學日都會見到面，但李逸彤都特別珍惜只有佢地兩個人嘅時間，雖然唔知道呢段曖昧幾時先會停止、佢地嘅關係再上一層，但佢唔想同dead air嚟輕輕帶過佢同邱旻顥一齊嘅時間

路其實唔長，只係視乎於當日嘅心情、同對方講嘢嘅時候愉唔愉快，愈愉快，路就愈短

「好食，當然好食！」邱旻顥毫不猶疑地回答，就好似係預設答案一樣，唔需要思考都可以，「仲比邱茗然偷咗兩個⋯」

「噗！你咪分啲比佢食囉～」李逸彤笑起嚟，「你中意食嘅話下次再整比你食呀～」





「好呀～」邱旻顥輕快嘅聲線代表着佢嘅好心情

李逸彤行喺路上，手總會有意無意地掂到邱旻顥嘅手，邱旻顥若無其事地走着

有時邱旻顥會覺得，自己同李逸彤之間嘅關係已經夠近，就算表白都唔係一件壞事，至少都算係一種宣示主權；但有時又覺得，佢地呢種近距離，好似唔洗刻意去講一句表白台詞，嗰句台詞只係用嚟肯定彼此嘅地位⋯

但若然一直大家都唔開口，大家都唔會確認自己對對方而言係咩身份，仍然停留喺一個似曖昧但又唔係曖昧嘅狀態中

「唔知心怡點呢⋯」李逸彤嘅腦海中忽然閃過沈心怡嘅身影，「佢有冇搵到潘景諭？」

「我又唔係同佢一齊去點知。」邱旻顥聳肩，然後笑道，「不過可能佢會先過你拍拖啦～」

「咁突然嘅呢個問題⋯」李逸彤顯然有啲困惑，唔係因為覺得自己應該早過沈心怡拍拖，只係呢個問題佢冇諗過





李逸彤喺沉思嘅時候，忽然將目光放到邱旻顯嘅身上

「你估下，邊個會表白先？」李逸彤一副百無聊賴嘅模樣，輕輕踢着腿，耷低頭望一望自己嘅鞋頭

「好難講，雖然我覺得一定唔會係沈心怡先開口。」邱旻顥講道，「如果係夠中意，無論邊個都會開口⋯」

最後一句喺李逸彤嘅耳中聽起嚟就好似有弦外之音，心裏淡淡嘅難受⋯石頭就壓喺心上

「我唔表白，係唔係代表我唔夠中意佢⋯？」李逸彤喺心裏不解地問道，「佢唔表白，係唔係即係佢唔夠中意我⋯？會唔會係佢對我嘅中意其實冇咁多⋯？佢對我嘅係中意定係好感⋯？」

李逸彤由啱啱好活躍好多嘢講，到宜家一言不發，態度同心情可以話係180度大轉變

「做咩突然間唔講嘢⋯？佢係唔係覺得我啱啱講嘅嘢有咩意思⋯？」邱旻顥見李逸彤唔出聲，佢都有啲緊張，「其實我都冇特別想表達啲咩⋯」

邱旻顥安靜地留意着李逸彤嘅表情，佢唔知道李逸彤宜家係開心定唔開心，又或者係諗緊啲咩，但邱旻顥可以肯定嘅係李逸彤對佢啱啱講嘅嘢係在意嘅





仲有一小段路就番到屋企樓下，李逸彤仍然冇出聲，邱旻顥亦冇開口解釋，或者兩人一直維持喺呢種曖昧不清嘅狀況下都唔係冇原因，一個唔開口，一個唔解釋，咁就只會一直停留喺曖昧嘅輪迴中

邱旻顥輕嘆一口氣，佢有時都會唔知李逸彤諗緊咩，李逸彤嘅情緒大多數時間都唔會收得好埋，只要對李逸彤有一定嘅了解，就可以知道李逸彤嘅想法；但有時候，李逸彤往往會將佢最想比邱旻顥知道嘅嘢收喺內心嘅深處，喺面無表情嘅臉下，係各種嘅感受同情緒




IG Link: https://www.instagram.com/nd_cotttoncandy/?hl=zh-tw