［愛情純愛］我地之間嘅友誼純度絕對等於零！！！: 111. 三回事
李逸彤知道，邱旻顥同其他人唔一樣，佢亦感覺到對邱旻顥嚟講，自己同其他人唔一樣，呢種感覺好強烈，但就算成日同邱旻顥一齊、比所有人都覺得佢地係互相中意都好，李逸彤都會唔敢講邱旻顥係100%中意自己
比起其他負面情緒，李逸彤同邱旻顥一齊嘅時候都係開心嘅，佢唔會有好強烈嘅妒忌，因為邱旻顥同其他女仔嘅距離好遠，所以李逸彤知道自己係唔一樣嘅存在
所以之前沈心怡對李逸彤講嘅「假設邱旻顥有好多女仔追」而帶嚟嘅不安感，李逸彤從未有過，但有時李逸彤都會搞唔清，特別係邱旻顥咁樣講完之後，李逸彤便會懷疑，其實自己係唔係冇咁中意邱旻顥⋯
「同邱旻顥一齊嘅時候，好似成日都好開心⋯邱旻顥唔會同其他女仔都保持喺一個咁近嘅距離，唔會好似潘景諭咁有好多女仔追⋯我唔會覺得好不安、好冇安全感⋯係唔係因為我唔夠中意，所以先會有咁嘅感覺⋯？」李逸彤喺心裹自問道
忽然間，好似有一層淡灰色嘅薄霧將李逸彤覆蓋着一樣，忽然間有好多事都搞唔清楚唔明白⋯
⋯
啱啱沖完涼嘅邱旻顥灘到自己嘅床上拎起手機
「仲以為李逸彤會send咗嘢比我⋯」邱旻顥望住鎖屏上notice board一個又一個嘅通知，但冇一個係李逸彤send比自己嘅message
邱旻顥嘆一口氣後都係將手機解鎖打開IG，但一打開IG就見到李逸彤嘅icon有一個漸變色嘅圈
邱旻顥第一個反應係去睇下李逸彤有冇睇自己喺IG send比佢嘅message
「睇咗⋯？」邱旻顥輕皺起眉頭，李逸彤平時好少會真係已讀佢，佢地嘅話題終結永遠都唔會係其中一方突然消失
邱旻顥㩒開李逸彤嘅story，入面有好幾個story都係語錄po 嘅share，全部都係啲失戀語錄，其中一個卻觸動到邱旻顥⋯
「喜不喜歡、合不合適、在不在一起，是三件事；喜歡不代表合適，合適也不代表會在一起」
「所以今日佢先咁靜⋯？」邱旻顥諗起今日李逸彤嘅沉默
邱旻顥隱約覺得李逸彤或者對佢今日講嘅嘢有啲誤會，說者無心聽者有意，特別係兩個人喺呢種關係嘅狀況下⋯
有啲事、有啲感情雖然大家心知肚明，但若然永遠都唔講出口，咁永遠都會係一個無解嘅心結
「？」邱旻顥reply李逸彤嘅story，只係send咗一個問號比李逸彤
邱旻顥心情沉甸甸地嘆一口氣，望住遲遲都未彈出嚟嘅seen同跳動嘅省略號，邱旻顥又嘆一口氣
李逸彤見到邱旻顥send過嚟嘅一個問號，李逸彤嘅指尖移到去彈出嚟嘅通知上，但卻遲遲都冇㩒落去，直到通知因為冇被打開嘅指示而收回，李逸彤收回手，呆呆地望住手機螢幕
頁面又番到去李逸彤同沈心怡嘅對話，李逸彤望住沈心怡嘅「錄音中⋯」默默地等待着；沈心怡嘅錄音send到出嚟，李逸彤不急不慢地㩒播放，然後將手機放到耳邊
「係唔係你地兩個曖昧得太耐，所以先搞到大家都唔願表白？」沈心怡好奇地問道，對於愛情事，沈心怡都冇太多嘅見解
「我又唔係唔願意表白，只係聽完佢講嗰句之後，我有啲⋯自我懷疑啫⋯」李逸彤嘅手㩒住錄音鍵，將手機放到嘴前
「咁中意嘅嘢，係中意就中意㗎啦，又冇話啱定錯⋯」沈心怡回覆道
「我又冇話佢錯⋯哎呀唔知呀⋯好煩⋯」李逸彤一臉苦惱地伏喺枱上，喺第一個錄音send出去之後，李逸彤又㩒住錄音鍵，「有啲似⋯唔⋯我自己覺得，好似習慣咗呢個相處模式⋯所以就係囉，搞到唔知點樣搵一個timing表白⋯」
「所以我咪話囉！」沈心怡稍微激動地講道，「係習慣咗嘅問題⋯可能有啲嘅刺激會好啲⋯？」
李逸彤聽到沈心怡嘅錄音，心裹倍感無奈，當手要㩒住錄音鍵回覆沈心怡時，李逸彤選擇打電話比沈心怡，畢竟要等嚟等去太麻煩
「你真係好愁⋯愁到要直接打比我⋯」沈心怡戴上耳機，收起自己嘅心事，先開解李逸彤
「咁樣講方便啲⋯」李逸彤講道，然後又默默地嘆一口氣，「我嘅意思係，我仲係學生，可以有幾刺激⋯？唔通一齊逃課？」
「唔⋯我都唔係好知⋯」沈心怡自己都唔清楚，畢竟佢同李逸彤一樣都冇拍過拖，只係覺得一段關係就係要少少刺激先可以令感情增進
「唉⋯我覺得同佢一齊係開心，有一種打從心底覺得嘅甜⋯即係我會好想同佢單獨相處，唔會覺得唔自在又或者尷尬囉！」李逸彤認真地諗咗一諗後解釋道，「唔⋯佢講嘅嘢我都係會在意，所以我先諗係唔係我唔夠中意佢⋯」
沈心怡咁樣講一講，李逸彤都察覺到佢唔表白係因為「習慣」：李逸彤太習慣宜家同邱旻顥一齊嘅相處模式，如果大家相處起嚟太自然，感覺就會慢慢平淡起嚟
「其實我自己知自己係中意邱旻顥，我中意同佢相處嘅感覺，嗰種自然自在令我覺得好舒適⋯亦中意有時有意無意望向佢嗰陣，見到佢早就望住我嘅嗰種感覺⋯」李逸彤喺腦海中拉出同邱旻顥相處嘅片段回憶
有時剛好想望邱旻顥、有時諗起邱旻顥而望向佢、有時因為想多留意邱旻顥幾眼而望佢⋯喺呢啲「有時」嘅時候，目光喺尋找到邱旻顥從而落喺佢身上時，卻發現邱旻顥總會剛好同佢對上視線
喺每一次對上視線之際，李逸彤都會感覺到心裹有一種驚訝嘅感覺，係一種⋯會令人回味，想再經歷無數次嘅感覺
IG Link: https://www.instagram.com/nd_cotttoncandy/?hl=zh-tw