［愛情純愛］我地之間嘅友誼純度絕對等於零！！！: 109. 我喜歡你

有時潘景諭都唔知自己做咩，佢好怕沈心怡會行到一個離佢有一段距離嘅位置；當沈心怡退一步，潘景諭就會即刻緊張起嚟

沈心怡就係咁樣輕易地影響着潘景諭嘅心情，什至佢嘅心跳⋯潘景諭會因為呢種唔一樣又唔起眼嘅感覺覺得煩躁不安

「好想冷靜落嚟⋯！」潘景諭仰起頭同時喺心裏用煩躁嘅聲線講道，因為佢嘅心臟由啱啱開始就一直瘋狂地跳動着，「宜家係唔係時候⋯？」

潘景諭嘅視線向下，偷偷地留意着沈心怡嘅一舉一動，佢嘅目光鎖死喺沈心怡嘅側臉上，心臟一直瘋狂地跳動着

啱啱見到沈心怡企喺自己面前嘅一刻，潘景諭嘅內心係愕然、係激動、係心動⋯佢冇諗過沈心怡會直接嚟搵佢





沈心怡耷低頭睇手機，只顧住諗自己嘅事，完全冇留意到潘景諭定睛地望住佢，心中有啲說話想同佢講

「我中意你。」潘景諭按捺不住內心嘅心動，衝口而出般講出嚟

沈心怡嘅左腳行咗細半步，然後停喺原地，本來停留喺手機上嘅目光隨住潘景諭嘅說話而遲疑地回頭望向潘景諭，有一刻沈心怡懷疑自己係唔係幻聽⋯

潘景諭清楚知道自己講咗啲咩，回避咗沈心怡嘅視線一秒後又默默地同沈心怡對視着

「嗯⋯？」沈心怡嘅雙眼裹係滿滿嘅複雜，佢嘅眼珠不安地左右望着，眼珠移動嘅速度突顯出沈心怡嘅心情





潘景諭突如其來嘅表白，無疑係令沈心怡手足無措⋯沈心怡唔知自己可以比咩反應，什至佢諗都冇諗過「我中意你」呢句說話會從潘景諭嘅口中講出嚟，所以先會顯得愕然又不安

「我認真㗎。」潘景諭喺見到沈心怡嘅遲疑後立馬講道

佢心裏最怕嘅事，係沈心怡嘅疏遠、沈心怡嘅拒絕⋯沈心怡不知所措嘅模樣令潘景諭更擔心佢嘅表白迎嚟嘅係沈心怡嘅拒絕⋯但喺將呢句認真無比又有啲突然嘅說話講出口嘅一刻，潘景諭就係認真、係真心真意，但同時係衝動無比⋯

「我⋯」沈心怡微微張嘴，猶疑着要點樣回答潘景諭

⋯





李逸彤同邱旻顥喺回家嘅路上，李逸彤手拎住奶茶，因為飲咗一大啖冰凍嘅奶茶，搞到頭痛到一個極點，頭都好似要裂開一樣

「好凍好凍⋯！」李逸彤用力地合着雙眼，右手拎住奶茶，左手扶着額角，「頭痛⋯！」

「叫咗你唔好飲咁大啖㗎啦～宜家頭痛啦～」邱旻顥望住李逸彤痛苦嘅表情頓時笑咗出嚟

「邱旻顥你仲笑⋯！」李逸彤本來想輕打邱旻顥一拳，但佢實在冇手可以騰空出嚟，「仲笑！」

「得得得！唔笑唔笑。」邱旻顥連忙收起笑容，隨即柔聲地問：「點呀？仲好痛呀？」

邱旻顥將手輕輕地放到李逸彤嘅額上，李逸彤感覺到邱旻顥嘅手嘅溫暖，令佢有少許舒緩一樣嘅感覺

「下次唔好飲咁大啖啦為食鬼！」邱旻顥輕輕地拍一下李逸彤嘅額頭，柔聲地講道

邱旻顥默默地將手收回，李逸彤望向邱旻顥偷偷地笑了笑





「邱旻顥，係唔係有妹妹嘅哥哥都咁識照顧人？」李逸彤忽然間沒頭沒腦地問道

「唔知喎，我又冇深入咁研究過。」邱旻顥聳聳肩，「可能會識同女仔相處多啲掛～」

「咁唔係應該好多女仔中意㗎咩？」李逸彤嘅邏輯完全唔知係點樣嚟，搞到邱旻顥都一臉無奈，「但唔見你有女仔追嘅？」

「可能有你唔知呢～」邱旻顥微微側着頭望住李逸彤講道

「哦？你私下同好多女仔傾計㗎咩？」李逸彤擺出一副好奇嘅表情，側着頭望住邱旻顥

「我都同女仔傾計嘅～仲同女仔出街添～」邱旻顥輕輕一笑，瞄李逸彤一眼後講道

「係咩？你咁好彩同邊個女仔出街呀？」李逸彤聽到後笑意都藏唔住，但又要扮唔知，「同你出去嗰個女仔一定係美若天仙又心地善良啦～」





「等陣先等陣先，李逸彤，你唔好兜個圈讚自己喎！」邱旻顥都奈李逸彤唔何，佢其實都幾中意李逸彤呢種調皮嘅感覺

「我冇讚自己呀～你係講緊我咩？」李逸彤裝作咩都唔知道，擺出一副事不關己嘅模樣

「唔知呢～我淨係知我冇女朋友都比人講到變有女朋友咁，唔知係唔係講緊你？」邱旻顥問道

「唔好咩？有個美若天仙又心地善良嘅女⋯緋聞女友。」李逸彤輕輕地咬住飲管，佢差啲就衝口而出講咗自己係邱旻顥嘅女朋友，「唔想嘅話，咪搵第二個囉～我又唔介意嘅～」

李逸彤輕鬆地講道，實際上佢嘅心裹期待着邱旻顥會答佢啲咩，曖昧就係咁樣嘅狀態，每一次問答都係試探，試探對方嘅心同想法，從而從中得到情報

「好！當然好啦～」邱旻顥自然地伸手繞過李逸彤嘅背，手搭喺李逸彤左邊膊頭上，微微側着頭望住李逸彤，「畢竟唔係個個都有個美若天仙又心地善良嘅緋聞女友。」

李逸彤同邱旻顥四目交投，望住邱旻顥一臉認真地講出一句玩笑話，李逸彤都係唔爭氣咁心動

李逸彤耷低頭羞澀一笑，有時邱旻顥會將呢啲說話好輕鬆咁講出口，但李逸彤唔會覺得邱旻顥係個輕浮嘅人，因為佢知道邱旻顥唔會對其他女仔講呢啲說話





「你成日同我一齊，唔驚⋯識唔到男朋友⋯？」今次輪到邱旻顥帶着私心發問

邱旻顥明知故問，如果李逸彤係要認真識個男朋友仲點會佢日同佢一齊？

「我有男朋友呀～」李逸彤認真地抬頭望向邱旻顥，邱旻顥頓時一怔，李逸彤指一指邱旻顥，「緋聞男友。」

「多謝晒。」邱旻顥一怔後點頭示意認同，接受李逸彤嘅個講法

李逸彤雙手拎住奶茶，微微抬起頭朝邱旻顥望去，眼神裹盡是甜意，奶茶都變蜜糖

曖昧係雙向關係，或者女方所做出嘅曖昧會顯得唔夠矜持，但若然喺一段曖昧中只有男方主動，咁樣又好似顯得女方愛理不理，所以唔係唔可以主動，而係女仔唔可以太主動

李逸彤唔會總係做主動嘅一方，偶然會選擇等待邱旻顥作主動嘅一方，留有餘地比自己嘅同時，亦可以留有一絲神秘感，令邱旻顥唔會睇清李逸彤每一個想法








IG Link: https://www.instagram.com/nd_cotttoncandy/?hl=zh-tw