［愛情純愛］我地之間嘅友誼純度絕對等於零！！！: 94. 不為人知

「唉⋯阿諭呀⋯你對我到底係點？」沈心怡喺心裏問道，「你搞到我好混亂⋯」

沈心怡自己都唔清楚，亦唔肯定自己對潘景諭嚟講係喺一個咩定位⋯

「阿諭如果係唔中意我，咁點解要同我講好想見我之類嘅說話⋯？」沈心怡喺心裏不解地問道，「但如果佢係中意我嘅話⋯好似又唔會完全係⋯」

「我喺你面前⋯你都唔理我呀⋯？」

「唔得⋯離我太遠⋯」





「想見多你一陣⋯」

「你唔會走住㗎可⋯」

「呀⋯點解要同我講啲咁嘅嘢⋯？」沈心怡伏喺枱上，完全冇辦法集中精神做功課，心裏又道：「因為病咗所以先會特別⋯嗲⋯？」

沈心怡悄悄地回頭望熟睡中嘅潘景諭一眼，臉頰頓時泛起淡淡嘅紅霞

「我點解會喺度⋯搞到好似我係佢嘅邊個一樣⋯」沈心怡雙手掩住自己嘅臉，「佢會唔會都對其他人咁樣撒嬌⋯」





沈心怡不禁有啲擔心，潘景諭呢個模樣，對自己表露出嚟就好，唔好比其他人見到佢呢一面

沈心怡嘅雙手捧住臉頰，佢知道自己都係個有佔有慾嘅人，佢知道自己嘅感情，知道自己對潘景諭係咩感覺，但佢唔敢踏出一步走近

「唉⋯」沈心怡輕嘆一口氣後企起身，拎起放喺枱上嘅退熱貼輕手輕腳地行出睡房

沈心怡將門輕輕輕掩上嘅同時，潘景諭醒過嚟，睜開眼後嘅下意識反應就係望向書枱嗰邊

「佢走咗⋯？」潘景諭雙手撐住成個人坐起身，頭仍然有啲暈眩嘅感覺





沈心怡將退熱貼放到雪櫃中，佢只係想令自己冷靜一下，一直留喺潘景諭嘅睡房嘅話，佢嘅內心完全冇辦法平靜落嚟

「呼⋯」沈心怡輕呼一口氣後閂上雪櫃門，然後行番去潘景諭嘅睡房

一打開房門就見到潘景諭坐咗起身，雙腳都已經踩到地上

「去邊呀⋯？」沈心怡問道

「冇⋯」潘景諭靜咗一靜後講道，然後雙腳又放番喺床上

「佢係唔係以為我走咗，所以想搵我⋯？」沈心怡喺心裏獨自猜想道

潘景諭咩都冇講就再次瞓喺床上，呢一刻沈心怡就喺佢嘅身邊令佢心底裏有種安心感

「你瞓啦，我⋯同襪子都喺度。」沈心怡微微一笑講道，因為唔想自己難為情，所以唯有拉埋白襪落水





「嗯⋯」潘景諭微微點頭

有時潘景諭都覺得自己幾過份，都唔知自己以咩身份留住沈心怡⋯雖然沈心怡唔會真係拒絕佢，有時覺得沈心怡對自己好似有啲咩，但有時又不禁覺得，沈心怡只係同自己熟先會肯咁樣對佢

「煩⋯」潘景諭喺心裏講道，微微睜開眼偷望沈心怡，「睇唔透佢⋯我再主動啲嘅話，佢真係會避我⋯」

睇唔透沈心怡嘅想法令潘景諭覺得好煩躁，冇辦法知道沈心怡會做啲咩、會點諗，就好似一個未知數一樣⋯

⋯

「搞掂⋯」沈心怡合上作業簿，將筆放番喺筆袋入去，回頭望向潘景諭，「未起身⋯」

沈心怡安靜地起身行到書包前，將自己嘅嘢都收好





「阿諭。」沈心怡伸手打算叫醒潘景諭，同佢講佢走，但喺指尖快要掂到潘景諭嘅手，沈心怡縮咗手，細聲地道：「算啦⋯等佢瞓下啦⋯」

「咔！」

聽到大門同鐵閘都閂上嘅聲音後，潘景諭先緩緩地睜開眼

「呼⋯」潘景諭默默地鬆一口氣，手輕拍自己嘅額頭一下

放喺枕頭邊嘅手機一震，潘景諭伸手拎起手機，見到沈心怡send咗個message過嚟

沈心怡：我走先啦，見你瞓咗就冇叫醒你

沈心怡：退熱貼我放咗喺雪櫃

沈心怡：快啲好番！





潘景諭嘅嘴角微微上揚，沈心怡一個「快啲好番」嘅message就令潘景諭心都甜晒，即刻覺得好咗好多

潘景諭行出廳打算食藥，但一打開房門就見到白襪坐喺飯碗前

「喵～」白襪望住潘景諭，對潘景諭喵咗一聲，然後起身行到去潘景諭嘅腳邊蹭

「知啦知啦為食貓⋯淨係掛住食⋯」潘景諭無奈地從旁邊嘅櫃中拎出白襪嘅貓糧，然後蹲低喺白襪嘅飯碗前，「你同心怡一樣冇良心⋯一個掛住貓，一個掛住食⋯」

⋯

李逸彤抬頭望住貨架上嘅零食，一手拎住購物籃，一手伸向貨架，好快地拎咗包薯片放到購物籃中

外套袋中嘅手機震動吸引咗李逸彤嘅注意，李逸彤拎出手機，邱旻顥send咗張相比佢





「你喺邊？」李逸彤回覆道，邱旻顥send咗一張李逸彤拎住購物籃嘅背影嘅相比李逸彤，「好可怕」

邱旻顥：啱啱喺你後面經過

邱旻顥：宜家應該喺⋯

「喺⋯」李逸彤好奇地問道，連忙快步行出零食區，行到旁邊嘅層架探頭望，「你仲喺supermarket？」

邱旻顥：係

邱旻顥從貨架上拎咗兩pack公仔麵落喺抱住喺懷中

「估下我喺邊格」邱旻顥send咗個message比李逸彤




IG Link: https://www.instagram.com/nd_cotttoncandy/?hl=zh-tw